1 Maccabaeus 1
MEKKABIS UK KHATNAK
I: BIA DOMHNAK
Alezandar le Amah changtu hna
1 1Macedon in Philip fapa Alexzandar cu Kittim ram in a ra i Persia le Medesmi hna siangpahrang Darius kha a tei, cun uktu sinak in amah kha a chan; a hmasa ah cn Hellas ah a pen. 2 Raltuknak hmun tampi ah a kal i ralhau tampi kha a lak hna; cun mah ram i siangpahrang hna kha a thah dih hna. 3Cucaah vawlei deng tiang a kal i ramkhat hnu ramkhat a ramh hna; vawlei cu a hmaika ah dai zirziar in a um ko, cun aa lungsak bal lo mi a lungthin cu puarthaunak he a por cang. 4 A ṭhawng taktak mi ralkapbu kha a pumh i ramṭhen hna le miphun hna le ramuk bawi hna kha a toi ah a chiah hna i ngunkhuai petu ram ah an i cang dih. 5Sihmanhsehlaw ka thi cang lai ti kha a hngalh caah Alexzandar cu ihkhun cung a rilh caan a phan. 6A no lio tein amah he a rak ṭhangṭi mi a zungbawi hna le phunbawi hna kha a pumh hna i a pennak kha a nun lio ah a phawt dih hna. 7 Alexzandar nih ram cu kum hleihnih a uk hnu ah a thi. 8Cun zungbawi pakhat cio nih khan an co mi ram cio cu an uk hna. 9Anmah le anmah hnu i an roco hna nih khan a thih hnu kum tampi tiang,an bawiluchin cu an i chinh i leicung ah ṭhat lonak kha an karhter.
An tiochus Apifanes: Israel cu Grik nunphung an i lak
10Mah hna hin nge ṭha lo pakhat a corh; amah cu siangpahrang Antiochus fapa Antiochus Apifanes a si i Rom ah voikhat an rak hren mi a si. Amah cu Grik pennak kum 176nak ah khan siangpahrang a cang. 11Hi caan ah hin, Israel in mi tampi kha ping ah a hruai mi nawl ngai lo phu pakhat a chuak. Annih nih mipi kha, "Ra ulaw kan velchum Jentailmi hna he hawikom ser hna u sih; zei tin tiah anmah he kan i ṭhen hnu in vanchiatnak tampi nih a kan tlunh," tiah an ti hna. 12Hi ruahnak cu mi tampi nih an cohlan, 13 cun mi tampi nih lungtho ngai siangpahrang kha an fuh, cun amah nih annih kha Jentail mi hna phunglam zulh khawhnak nawl a pek hna.14Cucaah, Jerusalem ah khan Jentail mi hna nih an ngeih bang in lentecelhnak innpi an sak, 15an cuarpar tannak kha an thuh, thisen biakamnak thiang kha an hlawt, misual hna sal bang in Jentailmi hna phunglam cu lungtling ngai in an zulh.
Voikhatnak Izip a tuknak le Biakinnpi a hrawhnak
16Antiochus nih a nawlngeihnak cu a fek cang ti kha a hmuh tikah amah le amah kha Izip ram siangpahrang le kha pennak pahnih hna i uktu ah i ser ding in aa tim. 17 Izip kha ralkap tampi, rang ralkap hna le vui (rangleng zong) he a va tuk. 18 Izip siangpahrang Ptolemy he an i tong, Ptolemy cu hnu ah aa mer i a hmai khan a zam caah tampi cu hliamhma an hmu. 19 Izip i ralhrau khuapi tampi a lak hna i cu Antiochus nih an ram cu a ramh. 20 Izip a tei hnu, 143 kum ah Antiochus cu aa mer i Israel ram le Jerusalem khualipi kha ralkap tampi he a kalhnawh. 21 Ruru hranghrang in hmunthiang kha a bauh i sui biakṭheng le mei vannak tung hna cu an ṭamhnak thilri vialte hna he, 22cun, cat lo pekchanhnak changreu hlum cabuai, thlet thawinak thilri hna, hrai hna, sui cehrep hna, puanzar hna, bawi luchin hna, cun a thianh mi Biakinn hmai i sui in ṭamh mi thil vialte hna kha a kalpi dih hna. Biakinn cu a thianh ko. 23Sui le ngun le thil mansung he a kal; thuhmi chawva hna zong kha a hmuh hna i a lak dih hna, 24 cun mah thil vialte a lak dih, thisen tampi a chuah i porhlawt ruamkainak bia tam tuk a chim hnu ah a ram ah a kir. 25 Khuazakip ah Israel ca ah ṭah-aihramnak a um.
26 Uktu hna le upa hna cu an hram, ngaknu le tlangval hna cu an uai; nu hna an i dawhnak a ziam; 27Nupiṭhi tlangvalkip nih ṭahnak hla an sa, monu cu a va ihkhun cung ah ngaihchia in a ṭhu! 28 A khuami hna ruang ah vawlei cu aa hnin i Jakop Chung cu a ningpi in puanlu aa khuh.
Mysark tlangtlaknak le Acra saknak
29Kumhnih hnu ah, siangpahrang nih Mysarch cu Judah khuapi hna ah a thlah. Amah cu ralkapbu tampi hna he Jerusalem ah khan a ra, 30cun daihnak bia a lo mi kha aa chimter caah mipi bochannak kha a hmuh. Cu hnu ah khuapi kha a tlakhnawh i fak ngai in a tuk caah Israelmi tampi cu a hrawh hna. 31Khualipi kha a lak i mei in a khangh dih; inn le kulhnak vanpang hna cu a duah dih hna, 32nu le ngakchia kha sal ah a lak hna i an saṭil hna cu a hruai dih hna. 33Cu hnu ah David Khualipi cu a fek ngai mi vanpang le innsang hna he a sak ṭhan i an khualipi ah a hman. 34 Mahka ah cun misual rual hna le biaknak chuahtaktu hna bu kha an dirh, hi hna cu a chung ah khan ralhruang an i sak, 35 cun hriamnam le tirawl kha an khon i Jerusalem in an ramh mi thilri vialte zong cuka ah cun an rawn hna; annih cu hnahnawhnak tampi a pek ding mi an si.
36Hi hmun cu hmunthiang ngiathlaitu hna an i thuhnak, Israel ah zungzal ṭhat lonak a chuahpitu a si. 37Hmunthiang velchum ah khan miding thisen an chuah i hmunthiang hrimhrim kha an buar. 38Anmah ruang ah Jerusalem khuami hna cu an zam.
Khualipi cu khual hna umnak hmun ah a cang; an tefa hna nih an zamtak i a fale hna nih an hnon. 39A hmunthiang cu ramcar bang a king cang, a puai hna cu ṭahnak ni ah, a Sabbath hna cu capo saihnak ah, a sunlawinak cu mawhchiatnak ah a cang cang. 40Atu a tlaknak cu hlan i a sunparnak tluk a si, a lianhngannak cu ngaihchiatnak ah aa thleng cang.
Jentailmi biaknak luhternak
41Cu hnu ah siangpahrang nih a pennak pumpaluk ah thanhnak a tuah mi cu mi vialte cu miphun phunkhat ah an cang dih lai, miphun kip nih an nunphung an hlawt dih lai ti hi a si. 42Jentailmi vialte nih siangpahrang nawlpeknak kha an zulh, 43 Israelmi tampi zong nih a biaknak cu an cohlan, siasal kha an doh i Sabbath kha an buar. 44Siangpahrang nih Jerusalem le Judah khuapi vialte hna ah khan a mi cu a thlah hna i annih kha an nunphung he aa kalh mi nunphung kha cohlan awk, 45hmunthiang ah khanghthawinak, raithawinak le thlet thawinak tuah lo ding, Sabbath ni le puai ni hna kha buar ding, 46hmunthiang le a thiang mi vialte hna kha thurhnawmhter ding, 47siasal hna ca ah biakṭheng, innte le biakinn hna kha sakpiak ding, vok le a thiang lo mi saram hna kha pekchanh ding, 48an fale hna kha cuarpar tan ding le thil thurhnom le thil fihnungkip tuahter ding a fial hna, 49cuti cun an Phungbia kha an philh lai i a phunglam zei hmanh an zul ti nakhnga lo caah a si. 50Siangpahrang bia a ngai lo mi poh cu thah ding a si. 51Mah bantuk bia kha a ṭial i a pennak ram hmunkip ah ca a kuat hna, cun siangpahrang nih mi vialte ca ah ngiatthlaitu kha a thiah hna i Judah khuapi vialte cu khuakhat hnu khuakhat in thawinak pekchanhter awkah nawl a pek hna. 52Mi tampi – cucu, Phungbia a kaltak mi vialte - cu anmah he an i kom i ram chung ah thil ṭha lo tam tuk an tuah caah, 53 Israelmi hna cu dornak ṭhakip ah a dorter hna.
54145 kum Chislev thla ni hleinganak ni ah khan siangpahrang cu khanghthawinak biakṭheng par ah khan fihnung milem a dirh; biakṭheng hna cu pawngkam Judah khuapi hna ah khan an dirh i 55 rimhmui cu innka le zalamtlang hna ah khan an pekchanh. 56Phungbia cauk an hmuhmi vialte an thleh i mei in an khangh hna. 57Biakamnak cauk pakhat aa ken mi, asilole phungbia a zul mi an hmuh mi poh siangpahrang nawlpeknak bang in thih a si ko. 58Thlakhat hnu thlakhat Israel ram khuapi hna ah khan nawlbuar an hmuh mi vialte cu fakpi in dan an tat hna. 59Thlakhat i nikul le ninganak ni poh ah khan khangh thawinak cu khangh thawinak biakṭheng par an dirh mi biakṭheng cung ah khan an tuah. 60 Chuah mi nawl bang in an fale cuarpar a tan lo mi nu hna cu an fale kha an hngawng ah oih bu in an thah hna, 61 cun an chungkhar hna le cuarpar tannak a tuah mi a dang hna he annih cu an thah hna.
62Nain Israel ah khan fek tein a dir i ralṭha ngai in rawl thurhnawm a ei lo mi tampi an um rih. 63Annih cu mah bantuk rawl thiang lo thawng in thurhnom le thisen biakam thiang buar nakin thih kha an i ham deuh i thah an tong. 64Hihi cu Israel cung ah a tlungmi ṭihnung taktak dantatnak a si.