Drymass

ZARHPINI BIAKNAK CAAN HMAN NING   (DRYMASS)

                "Missa a um lo caan ah"

NITIN TE THLACAMNAK

VAILAMTAH HMELCHUNHNAK   (Mt. 28:19, Gal. 6:14)

Pa, le Fapa, le Thiang Thlarau min in. Amen.

BIAKNAK THLACAMNAK 

(Bawipa Thisa hmai thlacamnak)

Tahchunh khawh loin a lianngan mi Pa, Fa, ThiangThlarau, Thumkomh Pathian, hika ah na um taktak tiah ka zumh caah ka lungthin dihlak in kan dawt i, upatnak nganpi he kan bia. Keimah cu nangmah muisam in na ka ser hlei ah na biaknak phung dingah na ka hruai pinah chunzan in na ka zohkhenh zungzal caah na cungah ka lung aa lawm ngaite.Nihin chung i ka ruahnak le ka tuahsernak vialte kha nangmah kan pek dih. Suaknak le thatlonak ral phunzakip chungin ka khamh ko tuah, tiah toidornak he kan nawl, Maw Bawipa Pathian. Amen.

ZINGLEI PEK CHANHNAK

      Maw Jesuh lungthin thiang, nihin chung i ka tuah hngami, ka ruah hngami, ka in hngami sifah retheihnak vial-te le ka cam hngami thlacamnak vialte kha na lungthin thiang duhnak he aa khat tein siter awkah a thiangmi, Mary lungthin in na sinah kan pek. Amen.

BAWIPA THLACAMNAK 

               (Mt. 6:9-13)

Vancung a um kan Pa, na min thiang ko seh; Na pennak tlung ko seh; Vancung bantukin lei cungah na duhnak tuah si ko seh.Nifa kan herhmi rawl kha nihin kan pe ko sawh. Kan cung i a sual mi kan ngaihthiam hna bangin kan sualnak kha kan ngaithiam ve tuah. Sualforhnak ah phakter loin, that lo nakin kan khamh tuah. Amen.

MAW MARY (Lk. 1:28,42)

Maw Mary, Pathian veel in na khat i, Bawipa cu nangmah he a um. Nang cu nu vialte lakah thluachuah hmumi na si i, na chungchuak Jesuh kha thluachuah a hmu. Mithiang Mary, Pathian Nu, kannih misual kha atu le kan thih lai caan ah thla kan campiak tuah. Amen.

THUMKOMH PATHIAN THANGTHATNAK (Rom.11:36)

Sunparnak cu Pa, le Fapa, le Thiang Thlarau cungah um ko seh; hramthawh lio caan bantukin atu le a zungzal um ko seh, dong hin lo in. Amen.

      LAMKALTU HNA ZUMHNAK HRAM PI (Mt. 28:10-20)

       Zeizong tuahkho, Van le Vawlei sertu Pa Pathian ka zumh. Thiang Thlarau in a pawi i Ngaknu Thiang Mary nih a hrin mi, Pathian Fapa ngeihchun kan Bawipa Jesuh Khrih ka zumh. Pontias Pailat kut ah temhnak a in, Vailam an tah,a thi i an vui, mithi khua ah a Tum i nithumnak ah mithi sinin a thoThan. Vancungah a kai i zeizong tuah kho Pa Pathian orhleikam ah a Thu. Khi hmun in mithi le minung biaceih awkah a rung tum than lai. Thiang thlarau, a thiangmi Catholic Bupi, Mithiang mi pumkhat sinak, sual ngaihthiamnak, pum thawhthannak le zungzal nunnak ka zumh. Amen.

ZUMHNAK THLACAMNAK  (MZ. 16:16)

    Maw ka Pathian, nangmah kha kan zumh i na Bupi cawnpiak mi vialte kha ka zumh dih. Zeitintiah nangmah chim mi bia a si i, na bia cu a ding.

 RUAHCHANHNAK THLACAMNAK (Rom 8:24)

       Maw ka Pathian, lei cungah na veel bawmhnak le vancungah zungzal nunnuamhnak hmuh awkah a ka khamhtu Bawi Jesuh Khrih thawngin kaa ruahchan. Zeitintiah na rak kan kamh cang i na bia cu a hmun zungzal.

DAWTNAK THLACAMNAK (Mt. 22:37-49, 1Cor 13:13)

    Maw ka Pathian, nangmah cu na that tuk caah zeizong  vialte nakin kan dawt. Nangmah caah ka innpa kha keimah pum bantukin ka dawt hna lai.

PATHIAN NAWLBIA PAHRA 

                (Ex. 20:1-17)

(1) Keimah cu Bawipa na Pathian ka si. Keimah hlei in pathian dang kha zumh in na bia lai lo.

(2) Na Bawipa Pathian min kha sersat nakin va hmang hlah.

(3) Pathian ni kha thianter va philh hlah.

(4) Na nu le na pa va upat hna.

(5) Lai va nawng hlah.

(6) Nu le Pa sualnak tuah hlah.

(7) Va fir hlah.

(8) Ahmaan lo mi tehte va khaan hlah.

(9) Midang nuva kha va hngar hlah.

(10) Midang thil kha va hngar hlah.

    BUPI NAWLBIA PANGA

1. Zarhpi ni le Biaknak puai ni ah Missa nan ngai lai.

2. Kumkhat ah a tlawmbik ah voikhat tal sualthlah nan hal lai.

3. Bawi Jesuh thawhthan caan chungah a tlawmbik ahvoikhat tal Bawipa thisa nan ei lai.

4. Sa le rawl ulh ni ah nan ulh lai.

5. Bupi riantuannak ah nan bawmh lai.

ANGELUS

H. Bawipa vancungmi nih Mary sinah thawng a run thanh.

Z. Amah nih thiang thlarau in fa a pawi.     (Maw Mary, ....)

H. Zohhmanh! Keimah cu Bawipa salnu ka si.

Z. Na bia bangin tling ko seh.    (Maw Mary, ....)

H. Bia cu minung ah a cang i,

Z. Kannih lakah a um cang.    (Maw Mary, ....)

H. Thlacam usih!

     Maw Bawipa, na veel cu kan lung chungah run khahter ko tiah kan in nawl. Zeitintiah Vanmi thawngthanhnak in na Fapa Khrih minung cannak kha kan hngalh bangin, a sifah innak le vailamcung thihnak thawngin kan nih nih a thawhthan lianngannak kan co khawh naklai kan Bawipa Khrih min in kan in hal. Amen.

THLUACHUAH HALNAK

Bawipa Pathian i veelngeih zaangfahnak cu kan cungah um zungzal ko seh. Amen.

MITHI CA THLACAMNAK

    Athi ciami hna an thlarau cu na zaangfahnak hmuh in daihnak chungah i din ko hna seh. Amen.

MAW VAN SIANGPAHRANG NU (ThawhThan caan ah cam awk)

H. Maw Van Siangpahrangnu, i lawm ko. Alleluia.

Z. Zeitintiah hrin awk naa tlakmi kha. Alleluia.

H. A chim cia bangin a thothan cang. Alleluia.

Z. Pathian sinah thla kan campiak tuah. Alleluia.

H. A tampi i lawm ko, maw Ngaknu Thiang Mary. Alleluia.

Z. Zeitintiah Bawipa cu a thothan taktak cang. Alleluia.

H. Thlacam usih

Maw Pathian, na Fapa Bawi Jesuh Khrih thawhthan nakin vawlei cungah lunglawmhnak kha na umter cang. A nu ngaknu thiang Mary thlacam piaknak thawngin, zungzal nunnak i lawmhnak kha kan co khawh nak lai run kan zaang-fah ko, tiah kan Bawipa Jesuh Khrih min in kan in hal. Amen.

   ZAN THLACAMNAK

    SUALNGAIHCHIH THLACAMNAK

      Tahchunh khawh loin a thami le duh awktlak bikmi Bawipa, nangmah cungah ka sual cang i, ka sualnak vialte caah ka ngaih a chia i ngaih thiamnak kan hal ko. Bawipa, nangmah kan dawt caah kaa ngaichih cang i nangmah veel bawmhnak thawngin sual ti lo awk le sualnak lam vialte kha hrial awkah kaa tim cang i, ka sualnak caah tuahnak tha in liam awk kaa zuam lai. Amen.

          PUMPEKNAK

     Maw ka Pathian, ka thih te lai kha ka hngalh. Ka thih caan cu ka hngal lo. Sihmanhsehlaw kaa hngilh hlan ah ka pum le ka thlarau kha na kut chungah kan pek. Nangmah duhnak bantuk in na hnatlak caan poah ah thih ka duh. Khi tihphan awk thih caan a phanh tikah, Bawi Jesuh hmaizah in, ka sualnak vialte rak ka thlahpiak tuah.Jesuh, Mary, Joseph, ka Bawi hna, nanmah kha ka lungthin, ka thlarau le ka nunnak kan pek hna.Jesuh, Mary, Joseph, ka thih deng tikah run ka zoh u, run ka bawm uh. Jesuh, Mary, Joseph, nan bu chungah nunnuam tein rak thi hram ning law. Amen.

ZOHKHENHTU VANMI SIN THLACAMNAK

     Maw a tha vancungmi, keimah zohkhenhtu ah Pathian nih a chiahmi ka ceuter in ka veng law, ka hruai in ka peng ko, chun ni tlak in zan khuadei tiang. Amen.

      1.LUHNAK HLA (Dir) 

                [Tithiang thehnak]

2. BIAKCHAWNHNAK

H. Pa, le Fapa, le Thiang thlarau min in. Z. Amen.

H. Kan Bawipa Jesuh Khrih veel, Pa Pathian dawtnak le thiang Thlarau hawikomhnak cu nanmah he um ko seh.

(asiloah)

H. Bawipa cu nanmah he um ko seh.

Z. Na Thlarau he zong um ko seh.

3. SUALPHUANNAK

H. U le nau hna, a thiangmi biathuk tuah awkah timhcia kan si nakhnga kan sualnak kha ruat in phuang hna usih.

Z.  Zeizong tuah kho Pathian sinah le, nanmah ka u le ka nau hna sinah, keimah cu ka ruahnak, ka hmurka, ka tuahsernak le tuah awk ka tlolh nakin ka sual tuk hringhran tiah ka sualnak ka phuan, (taang cumh pahin) keimah palhnak in, keimah palhnak in, keimah nganbik palhnak in ka sual cang. Cucaah thluachuak mi a zungzal ngaknu thiang Mary, Vanmi hna le, Mithiang vialte hna le nanmah ka u le ka nau hna, Bawipa kan Pathian sinah thla ka campiak u tiah kan nawl ko hna.

H. Zeizong tuah kho Pathian nih kan zaangfah sehlaw, kan sualnak ngaihthiam in, Zungzal nunnak ah kan hruai ko seh.

Z. Amen.

4. KYRIE

H. Bawipa, run kan zaangfah ko tuah.

Z. Bawipa, run kan zaangfah ko tuah.

H. Khrih, run kan zaangfah ko tuah

Z. Khrih, run kan zaangfah ko tuah.

H. Bawipa, run kan zaangfah ko tuah.

Z. Bawipa, run kan zaangfah ko tuah

(asiloah)

(1) Lungthlengmi hna khamh awkah a ra mi,

Maw Kan Bawipa, run kan zaangfah ko. (2)

(2) Mi sualmi hna khamh awkah a rami,

Khrih kan Bawipa, run kan zaangfah ko. (2)

(3) Pa orhlei in kanmah ca’h kan nawlpiak,

Maw kan Bawipa, run kan zaangfah ko. (2)

5. GLORIA (bia)

Cungchin Pathian sinah sunparnak um ko sehlaw, vawlei cung lungthin thami hna sinah daihnak um ko seh.Kan in thangthat, kan in conglawmh, kan in biak, kan in sunsak, na sunpar lianngannak caah lawmhnak kan in pek, Bawipa Pathian, Vancung Siangpahrang, Maw Bawipa Pathian, zeizong tuah kho kan Pa. Bawi Jesuh Khrih, Fapa ngeihchun, Bawipa Pathian, Pathian Tuufa, Pa Pathian Fapa, vawlei sualnak a kalpitu, run kan zaangfah ko tuah; vawlei sualnak a kalpitu, kan thlacamnak rak cohlang ko; Pa orhlei kam ah a thumi, run kan zaangfah ko tuah. Zeicahtiah nangmah lawng a thiangmi na si; nangmah lawng Bawipa na si, nangmah lawng a sangbik na si, Jesuh Khrih, Thian Thlarau he Pa Pathian sunparnak chungah. Amen.

(asiloah)

(Hla in)

H.Cungchin Pathian sinah sunparnak um ko seh.

1. Lungthin tha leimi cungah,Na daihnak tlung cang ko seh; Lianngan mi kan Pa Pathian, Zeizong tuah kho Siangpahrang, Nangmah lawng kan in conglawmh, Kan in chimthiam, kan in biak, Na min thangthatnak ca’h, Lawmhnak kan in pek.

2. Pa Pathian ngeihchun Fapa, Kan Bawipa Jesuh Khrih cu, Leicung sualnak kalpitu, Pathian Tuufa, kan Bawipa, Kannih kha kan zaangfah tuah, Pa Pathian orhlei thu mi, Kan thlacamnak kha, Bawipa rak cohlang ko.

3. Zeitintiah nangmah lawng kha, A Thiangbik cemmi na si; Nangmah lawng Bawipa na si; Nangmah lawng sangbik na si; Maw kan Bawipa Jesuh Khrih,Thiang Thlarau he hmun khat in, Kan Pa Pathian sunparnak chungah. Amen.

H. Thlacam usih!

Zaangfahnak le dawtnak he a tling i zeizong vialte a tuah khotu, a zungzal a hmunmi kan Pa Pathian, kannih na fanu le na fapa hna cu nangmah biak awkah hika ah kan i pum.Kannih cu thazaang dermi kan si i harnak le sifah retheihnak a phunphun a tongmi kan si caah zaangfahnak in run kan zohkhenh ko. Pum le lungthin dam le lawm in kan um khawh nakhnga le daihnak le hnangamnak he na duhnak kha kan tuah khawh nakhnga na veel laksawng kha run kan pe ko law zungzal nunnuamnak Vancung ram phanh a tlak mi kan si nakhnga run kan bawm ko, tiah kan Bawipa Jesuh Khrih min in kan in hal.

Z. Amen.

6. BIBLE THIANG RELNAK (thut)

7.   VOIKHATNAK BIBLE RELNAK

Reltu. Pathian bia a si..

Zapi. Pathian cungah lawmhnak um ko seh.

8.     PSALM HLA LEHNAK

9.VOIHNIHNAK BIBLE RELNAK

Reltu; Pathian bia a si..

Zapi; Pathian cungah lawmhnak um ko seh.

10 .ALLELUIA (asiloah) THAWNGtHABIA AUPINAK

(Lent caan ah Thawngthabia aupinak hman ding)

THAWNGtHABIA RELNAK

H. Bawipa cu nanmah he um ko seh.

Z. Na Thlarau he zong um ko seh.

H. Mt... Thawngtha Thiang bangin relnak a si.

Z. Maw Bawipa, nangmah cungah sunparnak um ko seh.

H. Bawipa Thawngthabia a si.

Z. Maw Bawi Khrih, nangmah cungah thangthatnak um ko seh.

11. THAWNGTHA CHIMNAK (Thut)

12. GREDO (ZUMHNAK BIA PHUANNAK) (Bia)

. Pathian pakhat ka zumh.Van le vawlei, hmuh khawh mi le hmuh khawhlo mi vialte sertu, zeizong tuahkho kan Pa kha ka zumh. Zei zong vialte um hlan ah Pa nih hrinmi, Pathian Fapa ngeihchun, Bawipa pakhat Jesuh Khrih ka zumh. Pathian in Pathian, Ceunak in Ceunak, Pathian taktak in Pathian taktak; sermi si lo in hrinmi a si, Pa he sinak an i khat; amah thawngin zeizong vialte cu ser an si. Kanmah minung caah le kan khamhnak caah Vancung in a rung tum. “Thiang Thlarau in Ngaknu Thiang Mary chungin thisasemnak a lak i, minung ah a cang”. Kanmah caah Pontias Pailat kuttang ah Vailam an tah, a thi i an vui, Cathiang ningin nithumnak ah a thothan. Vancungah a kai i Pa orhlei kam ah athu. Mithi le minung biaceih awkah sunparnak he a ra than lai i a pennak cu a dong lai lo. Bawipa le nunnak petu Thiang Thlarau ka zumh, amah cu Pa le Fapa sinin a chuak, Pa le Fapa he biak le thangthat a si, profet hna in bia a chim. Pakhat a simi, a thiangmi, le Lamkaltu hna he aa pehtlaimi Catholic Bupi ka zumh. Sual ngaihthiamnak caah tipilnak pakhat ka zumh.Mithi thawh`hannak le a ra laimi zungzal nunnak ka hngak. Amen.

Lamkaltu hna i zumh nak (Lent caan ah hman khawh a si)

Zeizong tuah kho, Van le vawlei sertu Pa Pathian ka zumh. Thiang Thlarau in a pawi i Ngaknu Thiang Mary nih a hrin mi, Pathian Fapa ngeihchun kan Bawipa Jesuh Khrih ka zumh. Pontias Pailat kut ah temhnak a in, Vailam an tah, a thi i an vui, mithi khua ah a tum i nithumnak ah mithi sinin a thothan. Vancungah a kai i zeizong tuah kho Pa Pathian orhlei kam ah a thu. Khi hmun in mithi le minung biaceih awkah a rung tum than lai. Thiang Thlarau, a thiangmi Catholic Bupi, Mithiang mi pumkhat sinak, sual ngaihthiam nak, pum thawhthannak le zungzal nunnak ka zumh. Amen.

     (asiloah) Hla in

T. Pathian pakhat lawngte ka zumh.

1. Zeizong tuah kho kan Pa Pathian ka zumh.Van le vawlei a Sertu, Bawipa Jesuh Khrih, Pathian Fapa ngeihchunh,Zungzal in hrinmi ka zumh.

2. Pathian in Pathian, Ceu nakin Ceunak; Pathian ngaite in Pathian, Serchom in si lo, hrinmi Fapa a si Pa Pathian he an i khat.

3. Amah thawngin zeizong te ser a si, Kanmah le kan Khamhnak ca’h,Vancung ram in hi vawlei ah a rung tum,Thiang Thlarau thawnnak thawngin.

4. Ngaknu Thiang Mary chungin nau a sem; Minung taktak ah a cang,Pontias Pailat kut ah Vailam ah an tah, Kan ca’h a thi i an vui.

5. Nithumnak ah lianngan in a thothan. Bible Thiang tialtak bangin; Sunpar lianhngannak He vancungah a kai; Pathian orhlei ah a thu.

6. Mithi minung vialte biaceih awkah; Sunparnak he a tum lai; A Pennak cu zungzal donglo a hmun lai Hi bia vialte cu ka zumh.

7. Bawipa le nunnak petu Thiang Thlarau; Pa Fapa in a chuakmi; Pa le Fapa he biak le thangthat a si, Profet hna in bia a chim.

8. Pakhat le a thiang Catholic Bupi; Lamkaltu he aa pehmi; Sual ngaihthiamnak le pum thawhthannak ka zumh.A zungzal nunnak ka hngak. Amen.

13. DUH HERHMI PAOH HALNAK

H. Ka dawtmi u le nau hna, “Hal u law, pek nan si lai; kawl u law, nan hmuh lai; king u law, innka hunh nan si lai, tiah kan Bawipa Jesuh Khrih nih a kan chimh bantuk in Catholic Bupi ca le a herhmi vialte kha Jesuh Khrih min in kan Pa Pathian sinah lungkhat tein hal u sih.

1. Kan Nu Bupi kha thluachuah na pek nakhnga caah.

Z. Maw Bawipa kan Pa Pathian, nang kha kan in hal.

2. Kan Pope N... kha na kilven i na zohkhenh nakhnga caah.Z

3. Siangbawi hna, Brother, Sister hna le Saya hna nih na duhnak bang an zulh khawh nakhnga caah. Z/

4. Mino tampi cungah Pathian rian`uan duhnak lungthin na pek nak hnga caah.Z/

5. Vawlei cung kakip ah remnak le daihnak a um nakhnga caah. Z/

(Atang i thlacamnak hna chung hin le a dang a tlak mi zong cam chih awk a si.)

1. Khrihfa vialte hna kha lungthin khatte na siter nakhnga caah.

2. Khrih a zum rih lo mi hna kha ceunak na pek nakhnga caah.

3. Bawi Jesuh Khrih caah sifah harnak le hremnak a ing mi hna kha thazaang na pek nakhnga caah.

4. A daithlangmi Khrihfa unau hna kha biaknak lei ah na zuamter than nakhnga caah.

5. Biatak a kaltakmi kan unau hna kha na tuukawm chungah na luhter `han nakhnga caah.

6. Atu Biaknak ah aa tel mi kannih vialte kha zumhnak, rua- channak le dawtnak chungah na kan hmunhter nakhnga caah.

7. Kawlram chungah Bawipa Pennak a kauh chinchin nakhnga caah.

8. Khrihfa unau hnanih a hmaanmi dawtnak taktak ngeih in lungkhat thinkhat in an um khawh nakhnga caah.

9. Kannih le Khrihfa vialte hna kha kan thih tiang zumhnak chungah na kan hmunhter nakhnga caah.

10. A zaw mi kan u le nau hna kha damnak na pekthan hna nakhnga caah.

11. Na daihnak chungah kan thih khawh nakhnga caah.

12. A thi ciami hna an thlarau cu na zaangfahnak hmu in daihnak ah an i dinh khawh nakhnga caah.

13. Nifate kan herhmi tirawl le ngandamnak na kan pek nakhnga caah.

14. Thlaikho kha na `hanter i rawhral nakin na himter nakhnga caah.

15. Ti le mei le thlichia ral in na kan khamh nakhnga caah.

16. Zawtfahnak, mang`aam le raltuk nakin na kan khamh nakhnga caah.

17. Kan tuukhal a simi kan Bishop N... kha na zohkhenh ina miphun hna kha lam ding in a kan hruaikhawh na-khnga caah.

H. Kan thazaang le kan dornak a simi maw Bawipa Pathian,Jesuh Khrih min in na dawtmi na fale hna kan halnak hi kan copiak hram ko.  Z.Amen.

14. PEKCHANHNAK (thut)

Pekchanhnak hla: (Pekchanhnak hlasak lioah thilri pawl cu biaktheng cungah chiah a si. Khrihfa hna nih an laksawng kha an rak put khawh ahcun a tha, Bupi herhbaunak ca le mi sifak hna bawmhnak ca zong a tel ah a tha.)

H. Maw kan Pa Pathian, vawleicung kakip ah na tlangbawi hna nih changreu le mitsur hang he hmunkhat in minung hna nunnak, riantuannak, sifah retheihnak vialte le dawtnak kha nangmah sinah an in pekchanh dih. Cu bantukin atu ah kannih nih kan in pekchanhmi kan nunnak,kan ngeihmi thilri hna, kan retheih thabatnak vialte le kan dawtnak kha lungtling tein rak kan copiak hram ko. Mah vialte hi kan Bawipa Jesuh Khrih le kan Nu bupi i thaw-inak he fonh in kan in pekchanh. Kan si a fah ah siseh, kan si a that ah siseh, nangmah ta kan siter ko, tiah kan Bawipa Jesuh Khrih min in kan in hal.

Z. Amen.

15. LAWMHNAKBIA (Dir)

H. Bawipa cu nanmah he um ko seh.

Z. Na thlarau he zong um ko seh.

H. Nan thinlung i hliphlau u.

Z. Bawipa sinah kan thinlung kan i hliphlau ko.

H. Bawipa kan Pathian kha lawm cio usih.

Z. Aa tlak i a ding ko.

H. Zeizong vialte a tuah khotu kan Pa Pathian, nangmah cu Van le vawlei zeizong vialte a sertu na si.Na sermi thil vialte kha na lianngannak le thatnak in na zohkhenh hna.Kan caah san a tlaimi vialte kha na zaangfah dawtnak in na kan pek caah kan i lawm ngaite. Maw a thiangmi kan Pa Pathian, kanmah kha ceunak le thawnnak huham na kan pek i, Bupi pum kha zohkhenh awk le kilven awkah Thiang Thlarau kha na rak thlah caah kan in lawm tuk hringhran ko. Na fale kannih kha Sacrament hna in siseh, thlacamnak in siseh, relcawklo na kan pek i kan tuahmi thatnak vialte caah a zungzal a hmunmi laksawng pek awkah bia na kan kam. Zaangfahnak he a tlingmi, Maw kan Pa Pathian, kan pumsa le kan thlarau ca, vawlei cung le Vancung ca i kan herhmi veel a phunphun kha na zaangfah dawtnak in na kan pek i, na dawtnak kha a tlak tein kan in cham kho lo nain,kan aw ngeihmi vialte khan Bupi pumpi he i fonh in, Vancungmi vialte hna he hmunkhat in na thang`hatnak hla kha kan sak.

16. * SANCTUS *

A thiang, A thiang, A thiang Vanmi run Bawipa Pathian. Van le vawlei cu na sunparnak in a khat.

A sangbik hmun ah hosanna hosanna. Bawipa minin a rami cu thluachuak mi a si. A sangbik hmun ah hosanna hosanna.

        (Asiloah)(Hla aw in)

A thiang, a thiang, lianngan Bawi Pa Pathian, A thiang i lei le Van thangthatnak he a khat. A sangbik ah hosanna, hosanna, Bawipa min in a ra mi nih thluachuahnak um seh, A sangbik ah hosanna, hosanna A sangbik ah hosanna, hosanna.

17. MISSA RAITHAWINAK AH LUNGTHIN IN I TELNAK (Khukbil)

H. Maw kan Pa, a zungzal a hmunmi Pathian, atu hi caan te ah, na fale hna cu hmunkhat ah kan i pum i Bupi pumpi he hmunkhat in Missa thawinak kha kan in pekchanh. Missa thawinak ah a zungzal a hmunmi tlangbawi Jesuh Khrih kan Bawipa nih kanmah can ah nangmah kha biaknak,lawmhnak, sualman liamnak le nawlnak kha a tuah.Nihin hika hmun ah hin cun kannih nih a man a sungbik mi kan Bawipa Jesuh Khrih i pum le thi kha pekchanh kan in duh ko nain, kan in pekchanh kho lo. Cu a si caah kannih nih atu kan in pekchanhmi kan pum, kan lungthin, kan thlarau, kan duhnak le thangthatnak vialte hi run kan copiak ko. Na fapa nih an pekmi thatnak vialte ah khan kan i tel ve khawh nak lai run kan bawm ko, maw Bawipa Pathian.  Z.Amen.

18. BAWIPA THLACAMNAK (Dir)

H. Kan Bawipa Jesuh Khrih nih a kan cawnpiakmi Thlacamnak kha zumhnak in cam u sih.

 (Hla aw in)

Z.  Vancung a um kan Pa Pathian, Na min thiang thang ko seh, Na Pennak tlung cang ko sehlaw, Na min thiang thang ko seh.Vancung bantuk in lei cungah na duhnak tling ko seh, Sunparnak le lianngannak cu Nangmah cungah a um. Paw cawmnak khim in nifa rawl, run kan pe ko Bawipa,Mi nih kan cung an sual tikah, kan ngaihthiam hna bangin. Kan sualnak kha tam hmanh sehlaw, kan ngaithiam ve ko tuah.Sualforhnak ah phakter loin, thatlo nakin kan khamh. 

Z. (Bia)

Vancung a um kan Pa, na min thiang ko seh, Na Pennak tlung ko seh, Vancung bantukin Leicungah na duhnak tuah si ko seh, Nifa kan herhmi rawl kha nihin kan pe ko sawh. Kan cung i a sualmi kan ngaihthiam hna bang in kan sualnak kha kan ngaithiam ve tuah.Sualforhnak ah phakter loin thatlo nakin kan khamh tuah.

H. Maw Bawipa, thatlonak vialte in kan khamh ko tiah kan in nawl, Atu kan chan chungah daihnak run kan pe ko law, na zaangfahnak in sualnak khan kan luatter law, lungretheinak a phunphun khan kan huhpheng ko tuah. Kannih cu kan Khamhtu Jesuh Khrih ratnak kha a sunglawi mi ruah channak in kan hngah ko.

Z. Zeitintiah Pennak, aa-naa le sunparnak lianngannak, zungzal thangthatnak vialte cu nangmah i ta a si.

(asiloah)

Z. Zeitintiah Pennak le Nawlngeihnak le Sunparnak cu nangmah ta a si. Atu le a zungzal dongh hin lo in.

H. Maw Bawipa Jesuh Khrih, na Lamkaltu hna sinah, Nanmah sinah daihnak kan chiahtak hna, keimah daihnak kan pek hna tiah na chim bangin, kan sualnak kha zoh hlahlaw, na Bupi zumhnak kha zohin, na pennak i daihnak le lung khahnak kha run ka pe ko, a zungzal a nung i a kan uktu Bawipa. Z. Amen.

H. Bawipa daihnak cu nanmah he um zungzal ko seh.

Z. Na thlarau he zong um ko seh.

H. Pakhat le pakhat daihnak hmelchunhnak i pe u sih.

(Mah le phunglam cio in hmelchunhnak kha i pek awk a si.)

19. AGNUS DEI

Pathian Tuufa, vawlei sualnak a kalpitu, Kannih run kan zaangfah tuah. Pathian Tuufa, vawlei sualnak a kalpitu, Kannih run kan zaangfah tuah. Pathian Tuufa, vawlei sualnak a kalpitu, Kannih daihnak kan pe ko.

20. LUNGTHIN IN BAWIPA THISA HLANNAK

H.   Maw kan Pa Pathian, kan thlarau kha na fapa Jesuh Khrih pum le thi in cawm siseh law, nangmah nunnak hrimhrim kha i hrawm ve hna seh ti na duh. Kanmah zong mah thlarau nunnak rawl cu hlang ve usihlaw ti cu kan duh tuk hringhran ko. Sihmanhsehlaw Bawipa thi le sa kha kan hlan khawh lo caah kan lungthin in kan Bawipa Jesuh Khrih he i pehtlaih in, kan thlarau caah thatnak kan co khawh naklai run kan bawm ko, tiah kan Bawipa Jesuh Khrih min in kan in hal. Z.Amen.

(Aa tlakmi hla pakhat sak ding)

21. A DONGHNAK THLUACHUAH HALNAK (Dir)

H.  Ka dawtmi ule nau hna, ka dawtnak chungah um ko u. Nannih nih ka nawlbia kha nan zulh ah cun ka dawtnak chungah nan um lai. Kei ka nawlbia cu keimah nih nannih kha kan dawt hna bantukin pakhat le pakhat i daw u, ti hi a si tiin, kan Bawipa Jesuh Khrih nih a kan chimhmi bia kha i cinken hna u sih.

H. Kan Pa Pathian le kan Bawipa Jesuh Khrih i veel ngeihnak le daihnak cu kanmah he um zungzal ko seh. Pa le Fapa le Thiang Thlarau i thluachuahnak cu kanmah cungah Tum sehlaw hmun zungzal ko seh. Amen.

22. DONGHNAK THLACAM

PATHIAN AUHNAK HMUH AWK CA THLACAMNAK

Vailamtah cungah kannih caah thihnak ingtu, maw a kan dawbiktu Jesuh Lungthin Thiang, kannih bu kha kan zaangfah tuah. Mi nung vialte zong nikhatkhat ah Vancung ram pel loin kan phak khawh naklai, na phung ding kha cawnpiak in na biaknak phung hruaitu a thiang mi Siangbawi, Brother, Sister le Saya hna kha kannih chungin run thim hna. Amen.

(Maw A thiangbik Jesuh Lungthin,)3 

(run kan zaangfah kotuah.)3

23.ZOHKHENHTU VANMI SIN THLACAMNAK

Maw a tha Vancungmi, keimah zohkhenhtu ah Pathian nih a chiahmi ka ceuter in ka veng law, ka hruai in ka peng ko, chun nitlak in zan khuadei tiang. Amen.

BIAKNAK PUAINI HNA I THLACAMNAK LE LAWMHNAK BIA HNA

ADVENT CAAN

Thlacam u sih....

Maw Bawipa Pathian, kannih na miphun hna nih kan Bawipa Jesuh Khrih a chuahni kha kan awt ko. Kannih nih khamhnak nih a pekmi lawmhnak kha theih in a chuahnak lawmhnak puai kha duhnak le lawmhnak he kan tuah khawh naklai run kan bawm ko, tiah kan Bawipa Khrih min in kan in hal. Amen.

Lawmnak bia

Kan Pa, zeizong vialte a tuah kho i a zungzal a nungmi Pathian, kannih nih a zungzal catlo in khuazakip ah kan Bawipa Jesuh Khrih thawngin lawmhnak kan in pek. Mi nung in kan sin rat awkah amah le amah aa niamter tikah hlan lio pi in na rak timhmi na khaukhannak kha a tlinter i, kan caah khamhnak lam kha a hun. Atu ah Khrih kan Bawipa sunparnak he a rat than tikah kanmah sin kamhmi khamhnak kha kan ta a si lai ni kha ruahchan in kan hngak ko. Cu a si caah Vancung i Vanmi hlaremhbu vialte he na sunparnak kha kan thanh i dong loin an sakmi thangthatnak hla kha kan sak ve.

A THIANG INNCHUNGKHAR PUAI

Thlacam u sih.

Kan Pa, upatnak le dawtnak in i kawmh in a thiang innchungkhar bangin kan nun khawh naklai run kan bawm ko. A zungzal a hmunmi na inn i lawmhnak le daihnak ah kan hruai ko, tiah nangmah le Thiang Thlarau he a zungzal a nung i a kan uktu kan Bawipa Jesuh Khrih min in kan in hal. Amen.

Note. Lawmhnakbia cu Christmas ni taa kha hman awk asi

NU [JANUARY 1]

Thlacam u sih.

Kan Pa Pathian, kanmah kha Ngaknuthiang Mary thlacampiaknak kha kan hmuhter zugzal ko. Zeicahtiah a fapa Jesuh Khrih thawngin nunnak le khamhnak ah na kan hruai cang. A zungzal a nung i a kan uktu Bawipa Pathian.  Z. Amen.

Lawmhnakbia

Kan Pa, Zeizong vialte a tuah kho i a zungzal a nungmi Pathian, kannih nih thluachuahnak a hmumi ngaknu thiang Mary nu a sinak puai kha kan tuah bangin a zungzal catlo in khuazakip ah lawmhnak kan in pek. Thiang Thlarau thawnnak thawngin, amah cu vawlei ceunak a si zungzalmi, na fapa ngeihchunh, kan Bawipa Jesuh Khrih i Ngaknu thiang nu ah a cang. Amah thawngin Vanmi hlaremhbu hna le Vancung thawnnak vialte nih na sunparnak kha an thang`hat i an biak. Kan aw cu an aw he fonh in dong loin an sakmi hla kha kan sak ve.

CHRISTMAS HNU ZARHHNIHNAK

Thlacam u sih.

Maw Bawipa Pathian, nangmah cu an zumtu hna i thawnnak,nunnak le sunparnak na si. Hi vawlei hi na ceunak in khahter law miphun vialte hna sinah na biatak ceunak kha hmuhsak ko hna, tiah kan Bawipa Jesuh Khrih min in kan in hal. Amen.

Lawmhnakbia cu Christmas ni taa a si lai

MIFIM PATHUM PUAI

Thlacam u sih.

Kan Pa, nangmah nih arfi lam hruai nakin na fapa kha miphun vialte sinah na phuan. Zumhnak nih a pekmi ceunak in kannih kha Vancung i na sunpar lianngannak ah kan hruai ko, tiah kan Bawipa Jesuh Khrih minin kan inhal. Amen.

Lawmhnakbia

Kan Pa, zeizong vialte a tuah kho i a zungzal a nungmi Pathian, kannih nih a zungzal catlo in khuazakip ah lawmhnak kan in pek.Nihin nangmah nih Khrih chungah zungzal in khamhnak kong na phuan cang i, mivialte ceunak in na langhter cang. Atu ah na sunparnak cu kan lakah a ceu cang i a thi kho lomi na muisam chungah minung sinak kha na thar chuah cang. Atu ah, Vanmi hna le Van ralbawi hna le Van- cung i a ummi vialte hna he hmunkhat in na thangthatnak hla kha kan sak.

BAWIPA TIPIL-INNAK PUAI

Thlacam u sih.

Zeizong vialte a tuah kho i a zungzal a nungmi Pathian, Jordan tiva ah tipil a in lioah Thiang Thlarau cu Jesuh cungah a tum i, na dawt bikmi na fapa a si tiah na phuan cang. Ti le Thlarau in hrin a simi kannih na fale hna kha a kan auhnak ah zumhtlak kan siter zungzal ko, tiah nangmah le Thiang Thlarau he a zungzal a nung i a kan uktu kan Bawipa Jesuh Khrih min in kan in hal. Amen.

Lawmhnakbia

Kan Pa, zeizong vialte a tuah kho i a zungzal a nungmi Pathian, kannih nih a zungzal catlo in khazakip ah nangmah kha lawmhnak kan in pek. Jordan tiva ah hmel chunhnak i khuaruahharnak hna in tipilnak laksawng thar kha na tuah cang. Minung a cangmi Bia kan lak i a umnak kong kan zumhnak kha hlauhter awkah Vancung in na aw kha na theihter hna. Na Thlarau cu thuro in hmuh a si i, Jesuh cu na sal in na phuan i, misifak hna sinah khamhnak Thawngtha a phorhtu dingah thlahmi Khrih i lawmhnak chiti cu na thuh. Kan lunglawmhnak in Vancungah Vanmi hna nih an thang`hatnak hla an sakmi kha vawlei cungah kan sak ve.

Lent caan (Vutcam Puai)

Thlacam u sih.

Bawipa, thatlonak ral kan dohnak ahhin rak kan hup pheng ko tuah. Kannih nih lentcaan ulh hram kan thawk bantukin, hi caan vialte hi kan pumsa duhnak i sumhnak in rak thianter ko, tiah kan Bawipa Jesuh Khrih min in kan hal. Amen.

Lentcaan

Thlacam u sih.

Maw Bawipa Pathian, minung kha leidip in na ser i nunnak thaw kha a chungah na chemhnawh, Sihmanhsehlaw anih nih na hmai khan aa mer i a sual. Hi sual ngaihchih lungthlennak caan ahhin na zaangfahnak kha kan in hal. Nangmah sinah le na fapa nih vailamcung a thihnak in a kan hmuhpiakmi nunnak ah kan hruai `han ko,tiah kan Bawipa Jesuh Khrih min in kan in hal. A men.

Lawmhnak bia

Kan Pa, zeizong vialte a tuah kho i a zungzal a nungmi Pathian, kannih nih a zungzal catlo in khuazakip ah kan Bawipa Jesuh Khrih thawngin lawmhnak kan in pek. Hi veel ngeihnak khuacaan hi thlarau chungah kan tharchuahnak hnga, na chungkhar sinah na pekmi laksawng a si. Kan lungthin thlek awk, kan pumsa duhnak i sumh awk le luatnak in na rian kan tuan awkah thazaang na kan pek. A liam lengmangmi hi vawleicung kan nun lioah kan lungthin kha Vancungah chiah in zeitin nun awk a si ti kha na kan cawnpiak. Atu mithiang mi le Vanmi vialte he awkhat in kan in thangthat.

KUHCHUK PUAI

Thlacam u sih.

A lianngan i a zungzal a nungmi Pathian, minung vialte nih toidornak ah i zohchunh awkin Jesuh Khrih kan khamhtu kha na kan pek cang. Anih nih minung a cannak le vailam cungah a nunnak a peknak in na duhnak kha a tlin cang. A temhinning kha zulh in kannih nih nangmah kha tehte kan in khaan khawh naklai run kan bawm law a thawhthannak hrawm aa tlakmi ah kan ser ko, tiah kan Bawipa Jesuh Khrih min in kan in hal. Amen.

Lawmhnakbia

Kan Pa, zeizong vialte a tuah kho i a zungzal a nungmi Pathian, kannih nih a zungzal catlo in khuazakip ah kan Bawipa Jesuh Khrih thawngin lawmhnak kan in pek, amah cu sualnak a ngeilo nain, mi sualmi caah lungtho tein sifak temhnak kha a in. A ding ko nain, anih nih a palhmi hna khawmh awkah thihnak kha aa lak. A thihnak in kan sualnak kha a hrawh. A thawhthannak in nunthiannak ah a kan cawi. Bawipa, Vanmi vialte nih lawmhnak in an sakmi hla in kan in thangthat.

A THIANG NILI ZAN

Thlacam u sih.

Maw kan Pa Pathian, kannih nih na fapa nih a dawt nak langhter awkah a Bupi sinah a chiahtakmi zanriah hrawm awkah hika ah kan i pum. Anih nih a thihlai zan ah a kan pektak i a zungzal a hmun hngami biakam thar thawi nak in tuah awkah nawl a kan pektak. Hi Bawipa thisa thawinak ah a dawtnak le nunnak kha tling tein kan hmuh nakhnga thla kan cam, kan Bawipa Jesuh Khrih min in Amen.

Lawmhnakbia

Kan Pa, zeizong vialte a tuah kho i a zungzal a nungmi Pathian, kannih nih a zungzal catlo in khuazakip ah kan Bawipa Jesuh Khrih thawngin lawmhnak kan in pek. Amah cu hi a dong kho lomi raithawinak a sertu, a zungzal a hmunmi Tlangbawi taktak a si. Anih cu kanmah khamhnak caah thawinak sa caah amah pum hrimhrim kha a pek i, hi raithawinak kha amah philhlonak ah rak tuah uh tiah a kan cawnpiak. Kan caah a pekmi a pum kha kan ei bangin, thazaang thawnnak ah kan than, kan caah a thletmi thi kha kan ding bangin kannih cu thiang tein kholh kan si. Atu ah Vanmi hna le Van ralbawi hna he Vancung i a ummi vialte hna he a cat kholomi na thangthatnak kha hla in kan sak.

A THIANG NINGA NI

Thlacam u sih.

Maw Bawipa; na fapa Khrih a temhinnak in Adam sualnak in kan comi thihnak khan kanmah vialte kha na kan khamh cang. Sernak phung in kannih nih a minung sinak he i lawhnak kha kan ken. Thiannak a pemi veel `hawnnak nih Vancung i a ummi kan Bawipa he i lawhnak kha kan i hruk khawh nakhnga kan bawm ko seh, a zungzal a nung i a kan uktu Bawipa. Amen.

[Lawmhnakbia a um lo]

VANCUNG KAI PUAI

Thlacam u sih.

Kan Pa Pathian, na fapa Jesuh Khrih Vancung a kainak ah kan lawmhter ko.Kannih nih amah kha sernak thar chung tiang kan zulh khawh naklai run kan bawm ko, zeicahtiah amah Vancung a kainak cu kanmah kan sunparnak le ruahchannak a si. Hi bia vialte hi na fapa Khrih min in kan in hal. Amen.

THAWHTHAN CAAN

[Thawhthan zarh chung hman awk]

Thlacam u sih.

Kan Pa Pathian, na fapa Khrih thawhthannak in thihnak i thawnnak kha na tei i zungzal nunnak lam kha na kan hunpiak cang. Nihin kan puai tuahmi nih kan thawhter ve sehlaw, kan chung i a ummi Thlarau nih kan nunnak kha run tharchuah ko seh, tiah nangmah le Thiang Thlarau he a zungzal a nung i a kan uktu kan Bawipa Jesuh Khrih min in kan in hal. Amen.

Lawmhnakbia

Kan Pa, zeizong vialte a tuah kho i a zungzal a nungmi Pathian, kannih nih zungzal catlo in khuazakip ah kan Bawipa Jesuh Khrih thawngin lawmhnak kan in pek. Khrih kan lanhtak raithawinak a caancan hi thawhthan zan (Ni) ah a ngan deuh chinchinmi lawmhnak in kan in thangthat. Amah cu hi vawlei sualnak a kalpitu Tuufa taktak a si. A thihnak in kan thihnak kha a hrawh; A thawhthannak in kan nunnak kha a hmuh than. Cu a si caah Vancung i Vanmi hlarembu vialte he na sunparnak kha kan thanh i, dong loin an sakmi na thangthatnak hla kha kan sak ve.

PENTICOST PUAI NI

Thlacam u sih.

Kan Pa Pathian, Thawngthabia cawnpiaknak hrawm khawh awkah kan nu Bupi cungah na rak thlahmi Thiang Thlarau nih a zummi hna vialte lungthin thawngin hi vawlei cungah a riantuan kha run peh zungzal ko seh, tiah nangmah le Thiang Thlarau he a zungzal anung i a kan uktu kan Bawipa Jesuh Khrih min ni kan in hal. Amen.

Lawmhnakbia

Kan Pa, zeizong vialte a tuah kho i a zungzal a nungmi Pathian, kannih nih a zungzal catlo in khuazakip ah lawmhnak kan in pek.Nihin na fapa ngeihchunh i nunnak kha hrawmnak in, a fale si awk caah na timhmi hna cungah Thiang Thlarau kha na rak thlah. Cuticun lanhtak biatak kha na tlinter. Nihin ah Thiang Thlarau nih mi vialte sinah a hmaanmi Pathian pakhat kha a hngalhter hna i holh phunkip nih zumhnak pakhat kha aw khat tein an phuan i, na Bupi hrawm thawhnak puai kha kan tuah.Thawhthan lawmhnak nih vawlei kha a dihlak in a tharchuah i, Vancung hlarembu hna nih na sunpar lianngannak kha hla in an sak zungzal.

THUMKOMH PATHIAN PUAI

Thlacam u sih.

Kan Pa, nangmah bia kha biatak a kan phortu le na Thlarau kha a kan thiantertu ah na rak thlah. Amah thawngin na nunnak kong biathuk kha hngalh ah kan cang. Nangmah kan in zumhnak kha phuannak le nunnak in Mi pathum ah Pathian pakhat a simi nangmah kha kan in biak khawh naklai run kan bawm ko, tiah nangmah le Thiang Thlarau he a zungzal a nung i a kan uktu kan Bawipa Jesuh Khrih min in kan in hal. Amen.

Lawmhnakbia

Kan Pa, zeizong vialte a tuah kho i a zungzal a nungmi Pathian, kannih nih a zungzal catlo in khuazakip ah kan Bawipa Jesuh Khrih thawngin lawmhnak kan in pek. Kannih nih na Pathian sinak biathuk kan zumhnak kha lunglawm ngaiin kan phuan. Na sunparnak kha na fapa i sunparnak le Thiang Thlarau i sunparnak zong in na phuan cang; huham rumraa ah aa tlukmi Mi pathum, ceudawhnak ah aa then lomi Bawipa pakhat, Pathian pakhat na si thiamthiam i a zungzal a hmunmi na sunparnak ah biak awk na si. Cu a si caah Vancung i Vanmi hlaremhbu hna he na sunparnak kha kan thanh i dong loin an sak mithangthatnak hla kha kan sak ve.

BAWIPA THISA PUAI

Thlacam u sih.

Bawipa Jesuh Khrih, na temhinnak le thihnak philhlonak ah na thi le sa kha na kan pek. Hi na pum le thi Sacrament kan biaknak nihhin na kan hmuhpiakmi khamh nak le na pennak i daihnak kha kan theih khawh naklai run kan bawm ko seh. Pa le Thiang Thlarau he a nungmi Bawipa, a zungzal dong hin loin. Amen.

Lawmhnakbia

Kan Pa, zeizong vialte a tuah kho i a zungzal a nungmi Pathian, kannih nih a zungzal catlo in khuazakip ah kan Bawipa Jesuh Khrih thawngin lawmhnak kan in pek. Hma nungbik zanriah ei lio ah a lamkaltu hna he cabawi ah a thu i, nangmah kha thangthatnak tling an pemi cotlakmi lak sawng, dotla Tuufa in nangmah sinah a pum kha a pek.Khrih nih a temhinnak philhlonak kha caan dongh hlan tiang khamhnak a pemi `hawnnak kan hmuh awk caah a kan pek. Hi Sacrament sung ahhin na mi kha rawl na dangh hna i, an thian nakhnga thazaang na pek hna i, minung chungkhar kha zumhnak pakhat i ceunak le dawtnak i khamhnak chungah na nunter hna. Cu a si caah hi khuaruahhar Sacrament kha ei awkah na cabawi ah kan ra i, a tho`han mi Khrih he i lawmhnak ah kan thang. Vawlei cu Van he sernak hla thar sak awkah aa kawm i kannih nih nagmah kha kan in biak i kan in thangthat zungzal. 

JESUH LUNGTHIN (THIANG PUAI)

Thlacam u sih.

Kan Pa, na fapa Jesuh lungthin in kan hmuhmi dawtnak laksawng ah khan kan i lawm. A nunnak kha kan hrawm nakhnga kan lungthin kha rak hung law a dawtnak in thluachuah run kan pe zungzal ko, tiah nangmah le Thiang Thlarau he a zungzal a nung i a kan uktu kan Bawipa Jesuh Khrih min in kan in hal. Amen.

Lawmhnakbia

Kan Pa, zeizong vialte a tuah kho i a zungzal a nungmi Pathian, kannih nih a zungzal catlo in khuazakip ah kan Bawipa Jesuh Khrih thawngin lawmhnak kan in pek. Khrih nih kannih kha a kan dawt tuk hringhran cacah vailam cungah sangpi in cawi a vun si lioah kan caah a nunnak kha a pek. Hma a pumi a hnak in thi le ti a rung luang, Bupi chungah Sacrament nunnak cerhti a si. A hung mi a lungthin lei ah khamhtu nih mi vialte kha khamhnak cerhti kha lawmhnak in ti than awkah a sawm hna. Atu ah, mithiang mi vialte le Vanmi hna he kannih nih nangmah kha kan in thang`hat zungzal.

 ZARHPINI SAWHSAWH.

Lawmhnakbia

Kan Pa, zeizong vialte a tuah kho i a zungzal a nungmi Pathian, kannih nih a zungzal catlo in khuazakip ah kan Bawipa Jesuh Khrih thawngin lawmhnak kan in pek. A vailam le a thawh`hannak thawngin, sualnak le thihnak in a kan luatter i, thimmi miphun, tlangbawi phun, thleidanhmi miphun ah a kan sermi sunparnak ah khan a kan auh. Khuazakip ah a liannganmi na riantuannak kha kan thanh,zeicahtiah muihnak chungin khuaruahhar na ceunak chungah na kan auh cang. Cu a si caah Vancung i Vanmi hlaremhbu vialte he na sunparnak kha kan thanh i, dong loin an sakmi na thangthatnak hla kha kan sak ve.

MARY VANCUNG KAI PUAI

[August 15]

Thlacam u sih.

Lianngannak he a tling i a zungzal a nungmi Pathian, nang nih sualnak a ngei lomi Ngaknu Thiang Mary, na fapa a nu kha a pum he a thlarau he Vancung sunparnak ah khan na cawi. Kannih nih Vancung kha kan hmanungbik hmui tung in kan hrawmter ve ko, tiah nangmah Thiang Thlarau he a zungzal a nung i a kan uktu Bawipa Jesuh Khrih min in kan in hal. Amen.

MITHIANG VIALTE PUAI[November 1]

Thlacam u sih.

Kan Pa, zeizong vialte a tuah kho i a zungzal a nungmi Pathian, nihin kannih cu caan kip le hmun kip ah a ummi nu thiang le pa thiang vialte chungah kan i lawm. Annih an thlacampiaknak thawngin na ngaihthiamnak le dawtnak kha run kan pe ko, tiah nangmah le Thiang Thlarau he a zungzal a nung i a kan uktu kan Bawipa Jesuh Khrih min in kan in hal. Amen.

Lawmhnak Bia

Kan Pa, zeizong vialte a tuah kho i a zungzal a nungmi Pathian, kannih nih a zungzal catlo in khuazakip ah lawmhnak kan in pek.Nihin kannih nih Van Jeruslem, kan nu khualipi thiang puai kha kan tuah. Na bawi thutdan veel chum ah mithiang mi, kan u le kan nau hna cu na thangthatnak an sak zungzal. An sunparnak nih lawmhnak he an kan khahter i,Bupi chungah kan i kawmhnak in veel ceunak le thazaang an kan pek. Zumhnak khualtlawn kan i namhnawh lioah an mah he i ton lai kan i ngaih ngaite. Anmah le Vanmi vialte hna he i kawmh in na thangthatnak kan thanh i aw khat tein kan au.

THLARAU VIALTE PUAI [ NOVEMBER 2 ]

Thlacam u sih.

Zaangfah thiammi kan Pa, kan thlacamnak run ngai law run kan hnemh ko tuah. Mithi sin in na thawhter thanmi na fapa cung kan zumhnak kha kan tharchuah bangin a thi cia mi kan u le nau vialte hna nih a thawhthannak kha kan I hrawm ve lai, tiah kan i ruahchannak kha run fehter ko, tiah kan in hal, A zungzal a nung i a kan uktu Bawipa. Amen.

Lawmhnak Bia

Kan Pa, a zungzal a nung i a kan uktu Bawipa, kannih nih a zungzal catlo in khuazakip ah kan Bawipa Jesuh Khrih thawngin lawmhnak kan in pek. Mithi sinin a thothan mi amah chungah thawhthannak kong kan i ruahchannak fingrei cu a cat. Thihnak kong ngaihchiatnak nih thih khawh lonak kong biakamnak kha lam a kianpiak cang. Bawipa, an zumtu hna caah nunnak cu a thleng mi a si, a dongmi a si lo. Hi vawlei kan pumsa hi thihnak ah aa din tikah Vancungah a zungzal a hmunmi umnak hmun kha kan hmuh lai. Cu a si caah Vancung i Vanmi hlaremhbu vialte hna he na sunparnak kha kan thanh i dong loin an sakmi na thangthatnak hla kha kan sak ve. 

KHRIH SIANGPAHRANG PUAI

Thlacam u sih

Zeizong vialte a tuah kho i zaangfah thiammi kan Pathian, nangnah nih khuachia thawnnak kha na khiah i na Fapa Jesuh Khrih, Van le vawlei siangpahrang chungah zei zong vialte kha a thar in na ser hna. Vancung le vawleicung i a ummi vialte hna nih na sunpar lianngannak kha theih dih hna sehlaw ngollo in in thang`hat zungzal ko hna seh, tiah nangmah le Thiang Thlarau he a zungzal a nung i a kan uktu kan Bawipa Khrih min in kan in hal. Amen.

Lawmhnak Bia

Kan Pa, zeizong vialte a tuah kho i a zungzal a nungmi Pathian, kannih nih a zungzal catlo in khuazakip ah nangmah kha lawmhnak kan in pek. Jordan tiva ah hmelchunhnak i khuaruahharnak hna in tipilnak laksawng thar kha na tuah cang. Minung a cangmi Bia kan lak i a umnak kong kan zumhnak kha hlauhter awkah Vancung in na aw kha na theihter hna. Na Thlarau cu thuro in hmuh a si i, Jesuh cu na sal in na phuan i, misifak hna sinah khamhnak Thawngtha a phorhtu dingah thlahmi Khrih i lawmhnak chiti cu na thuh. Kan lunglawmhnak in Vancungah Vanmi hna nih an thang`hatnak hla an sakmi kha vawlei cungah  kan sak ve.