Judit 7

II: BETHULIA KHUA LAKNAK

          Israel ralthawh hnawhnak

7 A thaizing ah khan Holoferni nih a ralkapbu an zapi le a sin a rak ṭang mi bawmtu ralkapbu zapi hna kha an riahbuk kha ṭheh in Bethulialei ah i thawh awk le tlanglam tannak kha lak i Israel chimnak thawk ding in  nawl a pek hna. 2 Ralkap hna nih cun cu ni hrimhrim ah an riahbuk cu an ṭheh, ral a tu kho milu taktak cu ke-ralkap thongzakhat le thongkul, rang ralkap thong hleihnih an si, thilphor leng zohkhenhtu kekal hna cu relchih an si lo. 3 Bethulia pawng nelrawn, vacek pawng in an lut, cun a kauhnak in Dothan in Balbaim tiang, cun a thuhnaklei in Esdraelonlei a hoih mi Bethulia in Siamon tiang kha hmunhma an laa. 4Israelmi hi mibupi liangluang hi an hmuh hna tikah an lau tuk i pakhat le pakhat kha, “A tu cu kan ram pumpi kha thiang tein an liah cang lai. A sang bik tlangpar, horkuang asilole tlangbo hna hmanh nih an tuar kho hna lai lo,’ tiah an ti. 5An hriamnam an i tlaih cio, ralvennak innsang cung ah khan mei cu an van i zan khuadei hngilh lo in an hngak.

6Nihnihnak ah khan, Holoferni nih a rang ralkap vialte cu Bethulia i Israelmi hna hmaika ah khan hmunhma a lakter hna. 7Amah hrimhrim nih khan khuapi tiang a phan mi lungpang cu tha tein a zoh, tihna kha a hmuh, ralveng ṭhaṭha a chiah hna hnu ah a kir.  8 Cu tikah Esau tefa hna chung in ramuk bawi hna, Maob miphun hruaitu vialte hna le rilikam ram in ralbawi vialte hna cu a sin ah an ra i amah kha, 9“Kan bawipa nih kan bia kha a ngaih duh a si ahcun na ralkap pakhat hmanh hliamhma an pu lai lo. 10Hi Israelmi hna hi an fei hna nakin an umnak tlangsang hna kha an i bochan deuh.  Cun fiangte chim ahcun hi tlangsang hna kai ding cu a fawi hrimhrim lo.

11Cu ruang ah Bawipa, hi hna he hin raltuknak cu tuah hlah, na ralkap zong pakhat hmanh na sung hna lai lo.  12Riahbuk ah khan um law na ralkap hna cu um rih ko hna seh, cu lio ah na salle hna nih tlanghram in a chuak mi cerhtiput hna cu kan va lak lai,13  zei tin tiah khuapi nih an toh  mi ti cu mah khi a si. An ti a hal lai i khuapi cu na kut ah an i ap te ko lai. Cu lio ah kannih le kan mi hna nih a naih biknak tlangpar hna ah kan kai lai i an khuapi hna khan pakhat hmanh an zaam nakhnga lo hmunhma kan rak lak lai. 14 Rawlṭamnak nih an nupi le an fale hna he a den hna lai i vainam nih a phanh hna hlan ah an inn hmai lam cung ah an ril liangluang ko  lai. 15Cu tikah nang nih nawl an ngaih lonak le daihnak in an in ton duh lonak man cu a phung ning in fak taktak in na chamter hna lai,” tiah an ti.

16An bia nih Holoferni le a bawi rual hna cu an lung a ton ngaingai hna, cucaah ruahnak an pek hna bantuk in tuah awkah bia an khiah. 17 Cucaah Maob ralkap hna cu Assiria ralkap thongnga hna he hmai ah an rak kalchung. Nelrawn kha an tan i Israelmi hna tikhor le cerhti hna kha an lak dih hna. 18  Mah lio ah Edom mi hna le Ammon mi hna cu Dothan ral i tlangsang hna ah khan an kai i dirhmun an lak, cun Wadi Mokamur i Khous pawng a um mi Egribel ral nichuah-thlangleikap ah kha, an mi cheukhat hna cu an kuat hna. Atang rih mi Assiria ralkap bu hna cu nelrawn chung ah khan umhmun an khuar i vawlei cu an khat dih; an riahbuk le an thilri cu an minung tam zat in an tam ve.

19Israelmi hna cu an ral hna nih an kulh i zamnak ding lam vialte an khar dih cang caah lungdong in Bawipa an Pathian sin ah an au ko cang; 20 Ni sawmthum le nili chung Assiria ralkap, kee-ralkap hna, rangleng le rang ralkap hna nih an kulh cang hna. Bethulia khuami hna ti chiahnak ralca vialte cu an lawng dih cang hna; 21an tikuang hna cu an caar dih i ti kha rikhiah in an phawt cang caah an tihal riam ni a um ti lo. 22An fale tete hna cu an thisa a zor thluahmah ko cang, nu hna le mino hna zong tihal in an der dih cang; lamthluanpi ah le kutka hna ah khan an tlu cang i thazaang an ngei ti lo.

23Mino, nu le ngakchia hna cu ṭahbu in in Uzziah le khua upa hna pawng ah an i pumlulh i upa hna khawngsil hna hmai ah cun,24  “Kan karlak ah biaceihtu cu Pathian si ko seh! Zei tin tiah, Assiriami hna he daihnak nan ser duh lo caah harnak tampi nan kan pek cang. 25 Cun atu ah bawmtu pakhat hmanh kan ngei ti lo. Pathian nih tihal le rawlṭam in an hmai ah kun awkah a kan chanh cang. 26   Khuapi pumpaluk cu an hrawh nakhnga atu hrimhrim ah hin Holofernimi hna le a ralkap vialte hna cu au hna u.27 Zeizongte ruah tikah atu kan si ning nakin an hranchaw kan si hmanh ah kan i ning deuh ving lai; sal ah an kan ser lai cu a fiang ko; asinain nungdam tal in kan um lai i kan hmai ah bawhte an thih le kan nupi le ngakchia hna an rawh cu kan hmu lai lo. 28 Van le vawlei le kan Pathian, kanmah le kan pupa hna sualnak ruang ah dan a kan tat mi, kan pupa hna Bawipa min chalh in nihin ni ah hi lam zulh ding in kan in nawl hna,” tiah an au hnawh  hna. 29Tonpumhnak tuah mi mibupi sin in ngaihchiat vansang aunak a tho i Bawipa Pathian sin ah fak pi in an au. 

30Cu tikah Uzziah nih annih kha, “Unau hna, nan lungdong hlah seh! ninga te cun ngang rih usih. Cu tikah cun Bawipa kan Pathian nih a kan zaangfah ko lai; zei cah tiah a kan hlawlan bal lai lo. 31Mah caan a dih i zei bawmhnak hmanh a rat lo ahcun nan chim bang in kan tuah ko lai,” tiah a ti hna. 32Cun mipi kha an umnak hmun cio ah a kirter hna. Pa hna cu khuapi vampang hna le innsang hna ah an kir i nu le ngakchia hna cu inn ah an thlah hna. Khuapi cu lungdonghnak in a khat ko!