BARUCH 1

BARUCH CAUK HRAMTHAWHNAK

Baruch le Babilon i Jewmi hna

1 Hihi Neraiah fapa Baruch nih Babilon ah a ṭial mi cauk chung bia hna an si. Neraiah cu Mahseiah fapa, Mahseiah cu Zedekiah fapa, Zedekiah cu Hasadiah fapa, Hasadiah cu Hilkiah i fapa a si. 2 Kumnganak i thlakhat i ni sarihnak ni, Chaldaeans pawl nih Jerusalem kha an lak i an khangh lio caan ah a ṭial mi a si.

3 Baruch nih hi ca cu Judah siangpahrang Jehoiakim i fapa Jeconiah, Judah siangpahrang, cun bia ngaih awkah a rak ra mi vialte, 4bawi le siangpahrang fapale hna, cun upa hna; cun mipi dihlak, cucu a hme bik in a ngan bik tiang, Sud tiva kam Babilon chung um vialte hna sin ah thang ngai in a relpiak hna. 5An theih tikah Bawipa hmai ah an ṭap, rawl an ulh i thla an cam.6 Cun tangka kha a tam khawh chung in an kholh i 7 Jerusalem i Shallum fapa Helkaiah i fapa tlangbawi Jehoiakim le tlangbawi dang hna le Jerusalem i anmah he a um mi vialte hna sin ah an kuat hna. 8 Cun Sivan thla nihranak ni ah khan Judah ram ah kirpi ṭhan ding in Temple in rak lak mi Bawipa inn i thilri hna cu amah kha an pek. Hi thil hna cu – Judah siangpahrang Josiah fapa Zedekiah nih a rak ser mi ngun thilri hna an si i, 9cucu Babilon Siangpahrang Nebuchadnezzar nih Jeconiah kha siangpahrang fapale hna, soser thiam hna le phunbawi hna le mipi hna he khan Jerusalem in Babilon ah sal in a kuat hna hnu ah a si.

10Annih nih an ṭial mi cu, “Khangh thawinak, sual thawinak le rimhmui man ca ah tangka kan in kuat hna. Thawinak rak tim ulaw Bawipa kan Pathian biakṭheng ah cun thawinak rak pekchanh u. 11 Cucu Babilon siangpahrang Nebuchadnezzar le a fapa Belshazzar cu van le vawlei a hmunh chung poh an hmunh nakhnga an nunkhua a sau nakhnga, 12cun Bawipa nih thazaang a kan pek i khua a kan hmuhter nakhnga, cuti cun Babilon siangpahrang Nebuchadnezzar le a fapa Belshazzar runvennak tang ah him tein khua kan sa i anmah kha saupi kan rianh i an mithmaiṭha kan hmuh nakhnga thla cam u. 13Cun Bawipa kan Pathian sin ah thla kan campiak rih  u, zei tin tiah a cung ah kan sual cang i a thinhunnak le a thin linhnak hna cu a dai rih lo. 14Hmanung bik ah kan in kuat mi cazual cu puai ni le caan a rem ni hna ah zapi theih in Bawipa inn ah nan rel hna lai.  15Hihi nan chim lai: -

 I: SALTAANG HNA THLACAMNAK

Sual i thlahnak,

Dinnak a pe mi khamhnak cu Bawipa ta a si, cun nihin Judahmi hna le Jerusalem khuasa dih lak hna bang in, 16kan siangpahrang hna, kan bawile hna, kan tlangbawi hna, kan profet hna le kan pipu hna ca ah kannih kan ngeih mi cu ningzahnak mithmai lawng hi a si ko, 17zei ruang ah tiah Bawipa cung ah kan sual cang, 18 a nawl kan rak ngai ti lo, Bawipa nih a kan chiahpiak mi a nawlbia kha zulh awk a kan chimh mi Pathian aw kha kan rak ngai ti lo.  19Bawipa nih kan pipu hna kha Izip ram in a rak chuahpi hna ri in nihin tiang, Bawipa kan Pathian nawl kan ngai lo, zumhtlak in kan nung lo, a aw ngaih kan duh lo. 20Cawhnuk le khuaihliti in a luang mi ram kha pek awkah kan pipu hna kha Izip ram in a rak chuahpi hna ni ah Bawipa nih a sal Moses sin in a rak thanh mi harsatnak le chiatserhnak in nihin hmanh ah kan luat rih lo. 21A kan thlahpiak mi profet hna bia vialte chung in Bawipa kan Pathian aw kha ngai lo in 22kan lungthin ṭha lo nih a kan chimh mi cio kha kan zulh cang hna, pathian dang kha kan rianh cang hna, Bawipa kan Pathian lung a tong lo mi thil kha kan tuah cang.