Judit 13

13 Khua a hung mui i a rianṭuan hna cu an zaam dih cang. Bakoa cu an bawipa pawng ah a taang rih mi hna kha aa hmuhsak hna hnu ah thlam kutka kha lenglei in a khar. Zu tam tuk an dinnak ah an cei i an ihkhun ah an kal dih cang;  2Judith pakhat lawng kha zu a ri tuk i a ihkhun ah a bawk cang mi Holoferni he khan thlam ah an kaltak. 3 Cu tikah Judith nih a salnu cu ihnak khaan lengte ah um i zingka poh i a tuah tawn bang in leng an chuah kha hngah awkah a chimh.  Thlacam awkah a chuak te lai i aa tinhnak zong kha Bakoa cu a chimh te lai ti kha a rak hngalhter cang hna.

 4Atu ah cun Holoferni cu an kaltak dih cang i a biapi mi zong a biapi lo mi zong aho hmanh a ihkhun pawng ah an taang ti lo. Judith cu a ihkhun kam ah dir in amah le amah kha:

“Thazaang dihlak a ngei mi Bawipa Pathian, Jerusalem sunpar lianhngan nak ca ah atu ka kut nih tuah aa timh mi hi hlawh rak tlinter ko; 5atu cu na rothil kha hmuh ṭhan awk le kanmah tuk awkah aa tlar cang mi ral hna kha den awkah kaa timh mi ka khuakhannak kha hlawh rak tlinter ko,” tiah a chim cutmat ko.

6Cu khawh cun Holoferni lu pawng ihkhun tung ah khan a va kal i a namtong kawipi kha aa lak;  7 a lu kha a vun naih, a sam in  a tlaih i amah nih, “ Israel Pathian Bawipa, nihin ah hin ṭhawnnak ka pe tuah!” tiah a ti. 8A thazaang dih-um in a hngawng ah voihnih a tuk i a lu cu a tan. 9 Cu hnu ah a ruak kha ihkhun cung in tang ah a hrilh i a puanzar cu a ihkhun tung in a phoih hna.  Cu hnu cun a chuak i Holoferni lu cu a salnu kha a pek i, 10 anih nih a sawngkhoi ah a sanh. Cu hnu ah an pahnih in thlacam a chuak mi bang riahbuk in an chuak. Khika hmun khan an chuah cangka in horkuang kha an hrawng i Bethulia tlaangpang khan an kai i kutkalei cu an panh. 

Judith nih Holoferni lu cu Bethulia ah a tlunpi

11Lamhlapi in Judith nih kutka congtu cu a auh hna i, “Kutka hung tuah u! hung tuah u! Zei tin tiah kan Pathian cu kanmah sin ah a um rih ko, nihin ah a tuah bang in Israel ah a thazaang a langhter i a ṭhawnnak cu kan ral hna cung ah a langhter cang!” tiah a ti. 12A aw an theih tikah khuami hna cu kutkalei ah khulrang in an rak tli i upa hna kha an auh hna. 13Amah a ratnak cu ruah lo tuk a si caah a hme he a ngan he an rak tli dih. Kutka kha an hun i nu pahnih hna cu an don hna, mei an vaan i annih kha an kulh lulh hna.  14 Cun Judith cu a aw kha a hler i Pathian kha thangthat u!  Amah cu thangthat u! Israel chungkhar in a zaangfahnak kha zuk lo in tuzan ah keimah kut in kan ral hna a ṭhek dihtu kan Pathian cu thangṭhat u!” tiah a au. 15Cun a lu kha zal chung in a chuah i anmah zoh awkah a hlerpiak hna. “Hihi Assiria ralbawi ngan bik Holoferni i lu a si; Hi puanthlam tang ah hin zurit in a it! Bawipa nih amah cu nu pakhat i kut in thi lak in a tuk cang! 16Ka rian lamthluan ah a ka vengtu Bawipa cung ah sunparnak um ko seh! Amah lohtlaunak ca ah ka muisam nih a tukforh cang; keimah kha ningzahnak pek awk le mualpho awkah zei sualnak hmanh keimah he a tuah lo.” tiah a ti hna.

17Lawmhnak he khat in, mipi cu an dihlak in an bawk i Pathian cu an biak, cun aw khat tein,“Kan Pathian, nihin ah na mi hna i ral hna kha nangmah hrimhrim nih na doh caah kan in lawmh tuk,” tiah an au. 18 Cu hnu ah, Uzziah nih Judith cu:

“Maw ka fanu, Cungnung bik Pathian nih leicung nu vialte lak ah nangmah cu a hleice in thluachuah in pe hram seh! Cun kan ral hna hruaitu lutannak ah lam an hruaitu van le vawlei sertu kan Bawipa Pathian cu thangṭhat si ko seh! 18Pathian ṭhawnnak philh lonak puai an tuah tik poh ah na kan hmuhsak mi zumhnak cu minung lung chung ah zungzal a cam peng lai. 19Pathian nih an pek mi laksawng cu zungzal in upatnak pek i thluachuahnak le lawmman pek si ko seh, zei cah tiah kan miphun kha khuk an bilter hna lio ah na nunnak hmanh kha ruat lo in Pathian hmaika ah dinfelnak lam kha na zulh i kan rawhnak ding in na kan luatter cang,” tiah a ti. 26Cun mi vialte nih, “Amen! Amen!” tiah an ti.