BARUCH 6

6 Pathian hmai ah nan rak tuah mi sualnak ruang ah Babilonmi hna siangpahrang Nebuchadnezzar nih Babilon ah an kalpi cang hna lai. 2 Babilon nan phanh tikah cun mahka ah khan kum tampi, chan sarih tiang, nan um lai; cu hnu ah daihnak he kan kirpi ṭhan hna lai. 3Atu Babilon ah cun ngun, sui le thing in ser mi, an liang in an i zawnh i miphun dang hna kha ṭihnak in a khahter mi pathian dang hna kha nan va hmuh hna lai. 4 I veng u! Ramdang hna nawl cu va cawng hlah u, an pathian cu va ṭih naisai hlah u, 5 a biatu hna cu an hnu he an hmai he vawlei ah bawh in an biak kha nan hmuh lai.  Nan lungchung ah khan, “Bawipa, kan biak ding cu nangmah na si,’ ti tu in va chim lehlam u. 6 Zei cah tiah ka vanmi cu nanmah he a um; amah nih an zohkhenh hna lai.  

7Sui le ngun an nalh hna, an lei cu kutzungthiam hna nih mil ko in an hnur hna; a lem an si i bia an chim kho lo. 8Hnipuan ṭha a duh mi ngaknu note bang, hi mi hna nih an pathian cu sui luchin an serpiak hna. 9 Cun zeimaw can ah cun, an tlangbawi hna nih an pathian sin in sui le ngun cu an fir i anmah ca ah an hman, cheukhat cu hleihlak i hlawhhlangnu hna tiang kha an pek hna. 10Minung bang, hi sui, ngun le thing pathian hna cu, hnipuan an thuamh hna; an mahte cun hnawm le rungrul hna in an i khamh kho lo. 11Puansen an thuamh hna tikah, an cung a tang mi temple hnawm chahpi hna ruang ah an hmai cu hnawhpiak an herh; 12pakhat cu ramṭhen bawi bang luchin an chinh, nain amah a do mi aho hmanh a that kho hna lo; 13adang cu a orhlei kut ah vainam le ṭhiangṭhunh an putter, nain amah le amah hmanh mifir le ral hna kut in aa veng kho lo. 14Hi hna nih hin a fainter mi cu annih cu pathian an si lo; ṭih hna hlah u.      

15Zapi hman mi bel cu voikhat a kuai hnu cun hman awk a tlak ti lo bang, an temple ah an toh mi hi pathian hna cu an si ve. 16An mit cu a rak lut mi hna ke in a tho mi leidip in an khat. 17Siangpahrang cung a sual caah thihdan pek mi cu innka an kharkhumh dih bang, tlangbawi hna nih hi pathian hna cu mifir ṭih in kutka, thirfung le thing hna in an kharkhumh dih. 18Anmah ca nakin annih ca ah meiinn tam deuh an vanpiak hna, cun an pathian nih zei a hmu lo. 19Annih cu a chunglei in bum nih a rei mi, a chung a rawp mi an temple kaan bantuk ceo an si; ṭuangṭuan cu vawlei in an hung chuak i anmah le an thilpuan hna zong an ṭam dih hna, cun zei hmanh an thei lo. 20A hmai cu temple in a chuak mi meikhu in a nak dih.  21 Palak, pelep le va phun kip, cun chizawh hna zong, an pum le an lu cung ah an i fu i an ṭhu hna. 22 Hihi zohnak in annih cu pathian an si lo kha nanmah tein nan hmuh khawh ko lai; annih cu ṭih hna hlah u.  

       23 Vawleimi vialte hna hmai ah zei hmanh lo an sinak a aupitu an sui hna cu annih kha a dawhter hna ding an si, nain mi nih thianh, an hnawm a hnawhpiak hna lo ahcun hi pathian hna cu anmah tein cu tluk an tleu lai lo, an rak thlet hna lio hmanh ah zei hmanh an thei lo. 24Zei tluk tam a man an pek zong ah an chung ah nunnak thaw a um lo. 25Lam an kal khawh lo caah mi nih an liang in zawnh an hau, cu nih cun zei hmanh an si lonak kha a langhter. An thluk sual tik ah tun ṭhan an herh caah a biatu hna ca ah ningzah awk ngai a si. 26Voikhat an tun hnu cun anmah tein an i thawn kho ti lo; an sawn deuh zong ah an i remh ṭhan kho lo; anmah sin ah pekchanhnak tuah cu mithi sin pekchanhnak tuah he aa lo. 27An sin ah pekchanh mi paoh cu tlangbawi hna nih an zuar ṭhan i a miak cu an zal ah an sanh; a cheu cu an  nupile hna nih cite an phulh, nain misifak le santlailo kha zei  hmanh an pe hna lo. Anmah le anmah an i pekchanh mi a si, cu ruang ah nusinak aa hngal lio mi nu le fangeika nu zong nih tongh awkah an ṭih lo.  28 Hi vialte sin in annih cu pathian an si lo ti mi cu nan chim khawh; annih kha ṭih hna hlah u.

       29 A ngaite in nu hna nih hi sui, ngun le thing pathian hna sin ah thawinak an pekchanh tikah zei tin dah pathian ti in auh khawh an si lai?  30 An temple chung ah an tlangbawi hna cu an hnipuan tlek, an lu le an khahmul tawite le an lu i khuh lo in an ṭhu; 31 an pathian hmaika ah cun mi nih mithi inn ah an tuahtawn bang in an au an khuang. 32Tlangbawi hna nih an nupi le an fale hna hruk awkah an pathian thilpuan kha an lak hna. 33Hi pathian hna cung ah thil ṭha an tuah zong thil ṭha lo an tuah zong zei hmanh an lehrulh kho hna lo; siangpahrang zong an canter kho lo i a ṭhumh zong an ṭhum kho hna lo; 34cu ve bang in chawva le rumnak zong an pe kho hna lo; mi pakhatkhat nih anmah sin bia aa kam mi a tlolh zong ah zei hmanh an tuah kho lo. 35Aho  hmanh thihnak in an khamh kho lo, asilole mider zong kha miṭhawng kut in an chanh kho lo, asilole 36mitcaw kha khua an hmuhter kho lo, harnak a tong mi aho hmanh an khamh kho lo, 37 nuhmei kha an zaangfah kho lo, ngakṭah cung ah zaangfahnak an ngei kho lo. 38Sui le ngun nalh mi hi thing pathian hna cu lungpang in lak mi lungtum hna ceo an si ko. Anmah a biatu hna cu ningzahnak an hmu te lai. 39 Cucaah zei tin dah mi nih annih cu pathian ti an ruah an chim khawh?

40Anmah Chaldaeanmi hrimhrim nih an upat hna lo; a holh a aa i bia a chim kho lo mi an hmuh tikah Bel sin ah an chanh, a hngalh mi bang amah cu biachim khawhnak laksawng an halpiak! 41Hiti a sinak sullam an hngalh lo tikah annih cu an kaltak hna- cu tluk in an theihthiamnak lo. 42Nu cu an tai ah hri i ṭem in lam tlang ah an ṭhu i favai kha an khangh i rimhmui bang an pekchanh. 43 Annih lak i pakhat kha lam ah aa chawk mi pa pakhat nih a char i a ihpi tikah a hawinu bantuk auh a tong lo i a hri a cah lo tikah a hawinu cu a nahchuah. 44An ca ah tuah mi vialte cu lenglei hmuhnak lawng an si.  Cu tikah zei  tindah mi nih annih cu pathian ti in an a ruah i an chim khawh?

       45Thingsaitu le sui thletu hna kutzung an si bang annih cu a tuahtu hna nih tuah an duh ning hna lawng an si kho. 46Anmah a tuahtu hna hrimhrim kha sau an nun lo tikah zei tin dah an tuah mi cu pathian an si khawh lai? 47An tefa an roh mi thil cu hlennak le hmaichiatnak men an si ko. 48Ral le vanchiatnak nih a tlunh hna ahcun an tlangbawi hna cu khua zei ah dah anmah le hi pathian hna cu thuh an ṭha lai lawng kha an ceih ko; 49ral le vanchiatnak in an i khamh khawh lo tikah pathian an si lo cu zei tin dah a theifiang rih lo mi an um rih ning a si? 50Annih cu sui le ngun nalh mi thing thil men an si caah a hnu ah cun a deu an si kha a lang te ko lai; siangpahrang hna sin bang, miphun le mi vialte sin ah annih cu pathian an si lo, minung ser mi lawng an si, cun an chung ah khuazing cawlcanghnak a um lo ti cu a lang te ko lai. 51 Pathian an si lo cu fianter a herh mi aho tal an um ti maw?

       52Annih cu ram pakhat kha siangpahrang an pek kho lo, minung phun kha ruahti an pe kho lo, anmah rian zong an tawlrel kho lo, harnak a tong  mi mizei hmanh an chanh kho lo; annih cu van le vawlei kar a tang mi langak bang zei hmanh an tuah kho lo. 54 Hi sui le ngun nalh mi thing pathian hna temple kha mei nih a lak sual ahcun an tlangbawi hna cu himnak hmun ah an zaam lio ah annih tu cu tung hna bang in mei nih kangh awkah an dir ko hna. 55Aho siangpahrang le ral hna kut in an i dirkamh kho lo. 56 Cu tikah mi pakhat nih annih cu pathian an si ti zei tin dah a ruah i a chim khawh ning a si?

57Sui le ngun nalh mi hi thing pathian hna nih mifir le damiah an hrial kho hna lo; miṭhawng nih an sui le an ngun kha fir in an thlaih mi hri hna he an zam kho ko nain annih cu anmahte hmanh an i dirkamh kho lo. 58Hi pathian deu hna si nakcha cun a ralṭhatnak a langhter mi siangpahrang le inntek nih a hman mi tlak um si hmanh a ṭha deuh; asiloah hi pathian deu hna si nakcha cun a chungthil a huppheng mi inn kutka, asiloah hi pathian deu hna nakin bawiinn i thingtung si hmanh a ṭha deuh. 59A ceu i ṭuanvo pek a tong mi nika, thlapa le arfi hna cu nawl an ngai; 60cu bang in nimtlau cu a lek tikah zohnuam a si; cu bang in thli cu khuazakip a cul, 61minmei nih vawleipi cul ding ti mi Pathian nawl an ṭuanchuah, cun tlangram le tupi hna kang ding ah cunglei in thlah mi mei zong nih fial mi rian cu an tlinter; 62Atu, hi pathian hna nih anmah kha an i dawhnak siseh an huham ah siseh an tluk hna lo. 63Cucaah aho hmanh nih annih cu pathian an si ti in an ruat kho hna lo, zei tin tiah annih cu dinnak an lenter kho lo, cun aho cung hmanh ah ṭhatnak an tuah kho lo.  64Cu ruang ah pathian an si lo ti nan hngalh hnu cun ṭih hna hlah u.

       65Annih cu siangpahrang kha chiat zong an serh kho lo i thlua zong an chuah kho lo; 66 cun miphun hna ca ah van ah khin hmelchunhnak an tuah kho lo, asiloah ni bang an tlang kho lo, thlapa bang an vang kho lo. 67Saram hna cu an i thuhnak in anmah le anmah an i dirkamh khawh caah anmah nakin an ṭha deuh suaumau.  68Pathian an sinak ding tette a pelte hmanh a um lo; cucaah annih kha ṭih hna hlah u.

69Sui le ngun nalh mi an thing pathian hna cu zil lo chung i ritṭhih langak –zei hmanh a veng kho lo mi- bantuk an si. 70Cun sui le ngun nalh mi an thing pathian hna cu  dum chung i hlingbur bantuk an si – vate kip nih an cung ah an i fuu –cun  mui lak ah hlonh mi  miruak bantuk an si. 71An keng cung a rop thluahmah mi puansen le puan hmangṭhia hna zoh in annih cu pathian an si lo kha nan chim khawh; cun a donghnak ah ciamral dih in khuaram ca thangchiatnak an cang lai. 72 Siasal a ngei lo mi miding si hmanh a ṭha deuh; thangchiatnak an co bal lai lo.