1 Maccabaeus 11

Atolemi VI nih Demetrius II kha tha a bawmh, asinain Alexander Balas bang khan a thi ve

11 Cu hnu ah Izip siangpahrang cu rili kam thetse tluk tam ralkap kha a pumh hna i tilawng tampi hna he, a thluak in Alexander pennak kha lak in a pennak i fonhchih awkah aa thawh. 2Daihnak lamzawh in Syria ah a kal i Ptolemy cu a pu a si bang in le siangpahrang Alexander nih amah kha don awkah a cah hna bang in khuami hna cu an kutka kha an hun i amah ton awkah an rak chuak; 3Asinain khuapi a phanh tikah a ralkap hna kha khuaveng ralkap hna bang hmunli ah a ṭ hen hna.  4Azota khua a phak tikah an khanghmi Dagon-Biakinn, cun Azota le pawngkam a rawk mi hna, a kenkip i a ril mi miruak hna le a kalnak lamthluan ah a khat mi Jonathan nih an nung in a rak khangh mi miruak pon hna kha an hmuhsak. 5Jonathan tuah mi cung ah a hnatlak lonak chim seh ti ruahchan in an chimh dih, sihmanhsehlaw zei hmanh a chim lo. 6Jonathan cu siangpahrang ton awkah Joppa ah a bawithuam he a kal, an i chawn i zankhat an riakṭi. 7 Jonathan nih siangpahrang kha Eliotherus ti mi tivapi tiang a hei thlah i Jerusalem ah a kir ṭhan. 8 Siangpahrang Ptolemy nih rilikam khua hna kha Seleucia tiang a lak i cuti cun Alexander doh ding a khuakhannak kha a fehter chinchin. 9 Siangpahrang Demetrius sin ah palai kha a thlah hna i amah kha: “Ra law hnatlaknak ser usih; atu Alexander sin i ka fanu cu kan pek lai i na pa pennak cu nangmah nih na uk lai. 10 Kha pa ka fanu ka rak pek cu kaa ngaihchih; zei tiah tiah amah nih thah a rak ka timh cang,” tiah a ti. 11 A pennak kha a hngar caah hiti hin sual a puh mi a si. 12A fanu cu a lak i Demetrius kha a pek tikah Alexander he an i ṭhen i an i huat-ralnak cu lenglang a si cang. 13Cu hnu ah Ptolemy cu Antiok ah a lut i Asia ram siangpahrang luchin kha aa chinh, a tu cu a lu cung ah Izip le Asia bawi luchin pahnih kha aa chinh cang. 14Cu lio ah siangpahrang Alexander cu Silisia khua ah a um; zei cah tiah mah hrawng rammi hna nih ral an thawh caah a si, 15sihmanhsehlaw cu thawng a theih tikah a ralpa tuk awkah a hei fuh; Ptolemy zong cu raltuk awkah hmun a rak laa ve cang i ralkapbu ṭhawng ngai he an i tu i a tei. 16 Alexander cu Arabia ram ah a va dor i Ptolemy cu uktu bawi bik a si cang. 17Arab mipa Zabdiel nih Alexander lu kha a tan i Ptolemy sin ah a kuat. 18Ptolemy cu nithum hnu ah a thi ve i ralhau chung ralveng Izip ralkap hna cu rammi hna nih an thah dih hna. 19Cucaah Demetrius cu 167 kum ah siangpahrang a hung cang.

Tuan deuh lio Demetrius le Jonathan pehtlaihnak

20 Cu lio ah Jonathan nih Jerusalem Ralhau khua i Judeami hna kha tuk awkah ralkap kha a cenhpi hna. 21 Sihmanhsehlaw an miphun a hua mi dalan pawl cu siangpahrang sin ah an va kal i Jonathan cu Ralhau khua kha lak aa tim,” tiah an va chimh. 22 Mah thawng nih siangpahrang cu a thin a hunter ngaingai. An chimh cangka in aa thawh i Ptolemy ton awkah a va kal.  23 Jonathan cu hi bia a theih tikah khua an kulh mi kha ngol lo ding in nawl a pek hna, 24cu hnu ah Israel upa le tlangbawi hna lak khan aiawhtu a thim, cun amah hrimhrim kha a nunnak thap in, mithmaiṭha hmuh ruahchan in sui le ngun le thilpuan le adang laksawng tampi he siangpahrang ton awkah a va kal, 25 a miphun chung in dalan pahnih pathum nih sual an puh nain, 26 siangpahrang nih cun a pupa hna bang in amah kha ṭha tein a cohlan i a hawikom vialte hmaika ah a rian a kaiter. 27Amah nih Tlangbawi Ngan a sinak le reng dang a rak ngeih mi vialte kha a fehter i amah i Pakhatnak Hawikom pakhat ah a telh ve. 28 Jonathan nih siangpahrang cu Judea ram le Samaria ramṭhen pathum hna kha ngunkhuai kholhnak in luatter awkah a nawl i ngun tangka talen zathum tu pek awkah bia a kamh. 29 Siangpahrang cu a hna a tla i thil vialte a huap mi ca kha Jonathan cu a ṭialpiak.

Jewmi hna mithmaiṭha a pe mi biakamnak

30"Siangpahrang Demetrius in a unau Jonathan, cun Jew miphun hna sin ah, biakchawnhnak: 31‘Nangmah he pehtlai in kan tupa Lestheni sin ah ka ṭial cang, cu ca cu nan hngalh ve naklai atu kan in kuat:

32 “Siangpahrang Demetrius sin in a pa Lestheni sin biakchawnhnak! 33 "Jew miphun cu kan ṭanṭi hawi an si; kan cung an ṭuanvo cu an tlinh, kan cung i  lungthin ṭha an ngeih mi kha ruat in kanmah zong nih an cung ah kan ṭhatnak langhter kan duh ve. 34 Judea ram le Afeirema, Liddia le Ramatham pengkomh pathum hna cu anmah kuttang a si kha kan fehter; hi ram hna cu, anmah zalonnak he Jerusalem i thawinak a pechan mi hna ca ah ti in Samaria ram in Judea ram ah betchih mi an si i cucu siangpahrang nih kum fatin a hmuh tawn mi vawlei rawlchuak le thingthei chung in ngunkhuai hna aiawh ah pek mi an si. 35 Adang cheuhra cheukhat le ngunkhuai hna cung i kan covo, cite cerh le kan co ding mi luchin ngunkhuai hna tu cu nihin thawk in kan luatter dih cang hna. 36 Hi bawmhnak hna cu zei tik hmanh ah le khua zei hmanh ah lak ṭhan an si ti lai lo. 37 Hi ca cu ṭha tein nan i chiah lai, Jonathan kha nan pek lai i tlangthiang cung zapi hmuhnak ah tar a si lai,” ti a si.

Demetrius Pahnihnak cu Antiok ah Jonathan ralkap nih an chanh

38Siangpahrang Demetrius nih a ram cu a dai i aho hmanh nih dohdalnak an tuah ti lo ti kha a hmuh tikah ramdang tikulh ram hna in a rak khon mi ralkap hna dah ti lo cu a ralkapbu cu a hrawh i ralkap vialte cu inn ah a tlunter hna, cuti cun a pupa hna a rak rianh tawn mi ralkap hlun hna huatnak kha a tong. 39 Atu cu hlan ah Alexander tha a rak petu a si mi Traifo nih ralkap vialte nih Demetrius kong lawng an ceih ti kha a theih tikah Alexander fapa a ngakchiat lio a rak zohkhentu, Arab mipa Iamelku sin ah a va kal i, 40ngakchiapa kha a va halchih, cucu a pa chan in siangpahrang a sinak ding caah a si; amah nih Demetrius biakhiahnak le a ralkap hna lung i a um mi lungtlin lonak kha a chimh. Khika ah caan saupi a cam. 41Mah lio ah cun Jonathan nih siangpahrang Demetrius cu Jerusalem Ralhau khua le adang ralhau hna ralveng hna cu zuh ṭhan hna awkah a hal, zei cah tiah annih nih Israel kha an doh lengmang. 42 Demetrius nih Jonathan cu: "Caan ṭha ka hmuh a si ahcun hi thil hi nangmah le na miphun hna ca ah ka tuah lawng si lo in nangmah le na miphun hna cung ah upatnak tampi kan pumh hnawh lai. 43 Atu tu cu ka ralkap nih an ka kaltak dih caah ralkap tam deuh in ka kua tuah,” tiah a ti. 44 Jonathan nih raltuk thiam ralkap thongthum kha Antiok ah a hei kuat i an phanh tikah siangpahrang cu aa lawm ngaingai. 45 Khuami hna cu khua laifang ah khan thongzakhat le thongkul tluk tiang hrawng an i pum i siangpahrang kha thah an zalh. 46Siangpahrang cu innpi ah khan aa dor, cu lio ah khuami cu lam vialte an khar i doh hram an thawk. 47 Siangpahrang nih Jew hna kha bawmhnak a hal hna; annih nih amah cu an dum, khuapi kha an phih dih i mah ni ah cun khuami thongzakhat tluk an thah hna. 48Khuapi kha mei in an khangh i an chawva kha tamlak an ramh hna, cun siangpahrang cu him tein an chiah. 49Khuami nih khuapi cu Jew hna kut tang ah a um ti kha an hmuh tikah an lung a dong i siangpahrang sin ah tangdor tein nawlnak an tuah. 50"Daihnak ca na orhlei kut kha kan chan law Jew pawl cu kanmah le kan khuapi tuk kha ngol cang hna seh,” tiah an ti. 51An kut kha an i thlah i daihnak an tuah. Jew hna cu siangpahrang hmai le pennak chung rammi hna hmaika ah sunparnak he an khat.  A pennak chung ah minthannak an hmuh hnu ah Jew hna cu hranchaw tampi he Jerusalem ah an kir ṭhan. 52Cucaah Demetrius cu a bawi ṭhutdan cung ah fek chinchin in a ṭhu i ram cu amah uknak tang ah dai tein a um. 53Sihmanhsehlaw biakamnak a tuah mi vialte kha a hrawh, cun Jonathan cung a ngeih mi a lungthin kha a thlen i Jonathan nih a rak rianh mi vialte caah zei hmanh a pe ti lo i a tuah mi vialte kha a lettalam in a ser dih hna.

Jonathan nih Demetrius II nawl a al. Simon nih Beth-Zur kha a lak ṭhan, Hazor ah a cangsual mi  

54Cu hnu ah Traifo cu siangpahrang a cang i bawiluchin aa chinh cang mi ngakchiapa Antiochus he a rak ra ṭhan. 55 Demetrius nih a hrawh mi ralkap vialte cu Antiochuslei ah an ṭang i Demetrius cu an doh. Amah cu a mei aa pher i a zaam. 56 Traifo nih vui hna kha a tlaih hna i Antiok cu a lak.

57 Seino Antiochus nih Jonathan sin ah hiti hin ca a ṭial: “Tlangbawi ngan na sinak cu ka fehter, pengkomh pali cung nawlngeihnak kan pek i siangpahrang Hawikom pakhat ah kan thim," tiah a ti. 58 Amah kha suikheng pakhat le adang kheng le bel a kuat, suihrai in zudin khawhnak nawl le puansen le sui ṭangbenh i oih khawhnak nawl a pek. 59 A naupa Simon kha Tire ram Leddar in Izip ramri tiang i ralbawi lu-bik ah a thim. 60 Cu tikah Jonathan cu aa thawh i Transeuphrates ti mi tivaral ram hna le an khuapi hna kha a tei thluahmah hna i Siria ralkap vialte cu amahlei ah an ṭang cang. Ekalon ah a ra i khuami hna nih amah kha ramuk pakhat si ning in an cohlan. 61Mahka in Gaza ah a lan, sihmanhsehlaw khika khuami hna nih an kutka an kharkanh.  Cucaah an khua cu a kulh, a khua kiangkap vialte kha mei in a khangh i a ramh hna.  62Gaza khuami nih Jonathan cu an nawl i anmah he remnak a tuah; asinain an khuabawi hna i fapale hna cu sal in a tlaih hna i Jerusalem ah a kuat hna. Cu hnu ah amah cu Damascus tiang a tlawng.

63 Jonathan nih khan Demetrius ralbawi hna cu ralkapbu nganpi he khan amah kha a rian in chuah awkah Galilee Kades khua ah an run phan cang ti kha a theih tikah, 64 a naupa Simon kha ram chung ah a chiahtak i anmah doh awkah a va kal. 65Simon nih Beth-Zur a kulh; nikhat hnu nikhat a tuk lengmang hna i, 66remnak an hal tiang an lam a phih dih, remnak cu a ser nain khuami hna kha an khua in a ṭhawl hna, amah tu a um i ral a venter hna. 67 Mah lio  ah Kenesar tibual pawng ah riahbuk a rak sual mi Jonathan le a ralkap hna cu zingka tuan tein an tho i Hazar nelrawnpi an phan. 68 Ramdang ralkap nih amah kha tlang tlang in a thli in nam awk i an bawh hnu ah nelrawn chung ah amah tuk ding ah an rak zuang. An ralkap tlangpi cu Jew hna tuk awkah hmaitonh in an rat lio ah, 69 a thli in a rak namtu i a tuah mi hna cu an hung chuak i an tuk hmasahna. 70Jonathan a mi hna cu an dihlak in an zam. A ralbawi a si mi Absolom fapa Mattathias le Khalfi fapa Judas hna dah ti lo cu pakhat hmanh an tang lo.  71 Cu tikah Jonathan cu a hnipuan a thleh, a lu ah leidip aa phulh i thla a cam. 72 Cun ral kha a tuk, a tei hna i an zam dih. 73 A ralkapbu chung in a zam mi hna nih cucu an hmuh tikah an rak kir, ral kha an riahbuk in Kadish tiang dawi cu an bawmh, anmah hrimhrim kha cuka ah cun riahbuk an khuar ve. 74 Mah ni ah ramdang ralkap thongthum tluk an thi. Jonathan cu Jerusalem ah a kir ṭhan.