Judit 5

Holoferni riahbuk chung ral council

5 1 Ngiathlaitu hna sin in Assiria ralkap bawi bik Holoferni nih Israel cu tuk ding in timhlamhnak a ngei, cun tlanglam tannak lam hna kha an phih cang, tlangpar vialte kha ralhau in an kulh i nelrawn vialte cu kahcham an cawh dih cang ti kha a theih. 2 Holoferni cu a thin a hung ngaingai. Cucaah Moab ramuk bawi vialte, Ammon ralbawi vialte le rilikam ram, ram ukbawi vialte hna kha a auh dih hna i 3annih kha, “Canan minung hna, ka chim tuah u: tlangram ah hmun a la mi hna hi zei miphun dah an si?  Khuazei ah dah an um? An ralkap tah zei tluk in dah a ngan? An thazaang le an ṭhawnnak hrampi tah zei dah a si? Anmah uktu le ralkap cung nawl a ngeitu tah aho dah a si? 4Zei cah dah nitlaklei mi hna nih an tuah bang in keimah an ka cohlan ve lo?’ tiah a hal hna.

 5Ammon mi hna vialte hruaitu Akhar nih, “Ka bawipa, na salpa nih a chim mi hi ngai hram ko. Na pawngkam ah khua a sa mi tlangcungmi hna kong cu kan chimh lai. Na salpa hmurka in lihbia a pelte hmanh na thei lai lo.  6Annih cu Khaldian chung an si. 7Voikhat cu Mesopatamia ah an rak ra bal, cucu Khaldia ram i an pupa hna Pathian hnu zulh an duh lo caah a si. 8Vancung Pathian hngalhnak in an theihmi, biak awk ah an pupa hna pathian cu an hnon. An Pathian hna umnak hmun khan ṭhawl an si tikah Mesopatamia ram ah khan an va zaam i cuka ah cun saupi khua an sa. 9Pathian nih an inn kha kaltak in Kanan ah khua va sak awk ah a chimh hna i cuka ah cun, sui, ngun le saṭil tampi kha an khon hna.  10A hun chang ah Kanan ram ah mangṭam a tlun tikah annih cu Izip ram ah an va ṭum i cuka ah cun khim tein an va ei. Cuka ah cun rel cawk lo ah an i chuah. 11Sihmanhselaw Izip siangpahrang cu anmahlei ah khan ṭhat lonak in aa mer i tlakrawh a tuahter hna i a hrem hna; an si ning kha a ṭhumh hna i salrian a ṭuanter hna. 12Annih nih Izip ram kha a ningpi in zawtnak ṭha lo tlangrai in a deng mi Pathian sin ah an au caah annih kha Izipmi nih an ṭhawl hna.  13Pathian nih rilipi kha an hmai ah a carter i annih cu 14Sinai le Kadesh-Barnea lam in a hruai hna. Thetse ram i a um mi hna kha an ṭhawl dih hna hnu ah, 15Amormi hna ram ah khan khua an sa i an ṭhawnnak in Hesbon miphun kha an hloh dih hna. Cun Jordan tiva kha an tan hnu ah tlangram vialte kha an lak dih. 16 Cun an hmai i Kanan mi, Periz mi hna, Jebus mi hna, Sekhem mi hna le Kirkash mi vialte hna kha an ṭhawl dih hna i cuka ah cun kum tampi an um. 17 Pathian hmai i an sual lo chung poh cu rumnak cu anmah ta a si, zei cah tiah annih cu ṭhat lonak a hua mi Pathian an ngei. 18Sihmanhsehlaw an Pathian nih anmah ca ah a serpiak mi hna lam kha an mertak tikah cheukhat cu raltuknak hna ah khan an rawk i a cheu cu sal in ramdang ah hruai an tong. An ral nih an Pathian Biakinn cu vawlei ah an thluk i an khua hna cu an lak dih.  19Cun voikhat an Pathian sin ah an hun i mer ṭhan tikah an rak i ṭhenṭheknak ram hna in an rak kir ṭhan i an Biakinnpi a umnak Jerusalem zong kha an lak ṭhan hna, cun an rak chuahtak mi tlangram hna cu an lak ṭhan hna. 20 Cucaah atu, ka saya le ka bawipa, hi mi hna nih palhnak pakhatkhat an tuah, an Pathian cung ah sualnak an tuah cang ti a si ahcun an sunghnak ruangpi an ngei cang ti kha kan i fian hrimhrim ding a si, cun va kal law va tu hna. 21Sihmanhselaw an miphun cu a sual lo ahcun ka bawipa an Bawipa le an Pathian nih a hupphenh hna sual ah na thin naa sum ah a ṭha; Vawlei pumpaluk i capo saihnak ah kan i chuah sual lai,” tiah a ti.

22Akhor nih a biachim a dih tikah thlaam khat i a um mi hna nih an hnatlak lonak kha an chim hna. Holoferni ralbawi upa deuh hna, cun rilikam minung le Moabmi hna zong nih khan amah cu can dih hnik an zalh. 23Annih nih, ‘Zei cah dah Israelmi cu kan ṭih hna lai? Annih cu a derthawm miphun an si i fakpi tuknak a celh lo ding mi an si.  24 Cucaah cun norchih, pahchih ding a si!  Bawipa Holoferni, na ralkap nih annih cu kaakhat ah a dolh dih ko hna lai,” tiah an ti.