SIRACH 7

Ruahnak cheuh mi tlawm tete hna

7 Ṭhat lonak tuah hlah law ṭhat lonak nih an tlunh lai lo; 2palhnak hrial law an hrial ve lai. 3Ka fa, mi ṭha lo hna leitlang ah va vorh hlah, let sarih nolh in na zun a hau sual lai.  

4Bawipa kha a sang bik hmun le siangpahrang kha upa rian hal hlah. 5Bawipa hmai ah na dinfelnak le siangpahrang hmai ah na fimnak va aupi hlah. 6Biaceihtu thim ding khua khang hlah, zei cah tiah din lonak kha na hlo kho lo sual lai, ṭihzah deuh pakhat nih an tei lai i thangchiat na tong sual lai. 7Khuami cung khuasual tuahnak in nangmah le nangmah hmaichiatnak i pe hlah. 8Aa khat mi sualnak cu voihnih va tuah hlah, zei cah tiah voikhat na rak tuah cang mi ca hmanh ah dantatnak na huah hrimhrim lai. 9“Pathian cu tampi ka pekchanhnak nih a lung a tluanh lai, Cungnung Bik Pathian cu thawinak ka pekchanh tikah a cohlan a hau,’ ti hlah.

10Thlacam daithlang hlah, 11Pekṭhenhnak cu tlolh hlah. A ngaih a chia mi kha va nihsawh hlah, zei cah tiah mi a thlatu nih cun a cawisan khawh ve. 12Na unau cung ah siseh, na hawi cung ah siseh, lihbia va chim hlah. 13Lih nih zei ṭhatnak hmanh a chuahpi lo caah chim lo ding vaa ralring. 14Upa hna tonnak ah bia tam tuk va chim hlah, cun thla na cam tikah va nolh len hlah. 15Pathian nih khua a khaan i lai a rel mi rian har le lothlawh cu va hrial hlah. 16Dantatnak cu a rauh ti lai lo ca ah misual hna lung va puarter hlah.  17Pathian hngal lo hna i dantatnak cu mei le rungrul an si caah toi i dor.

Midang he Pehtlaihnak

 18Na hawi cu a miak hmuhnak ca le na unau taktak cu Ophir sui hmuhnak ca ah va zuar hna hlah. 19Mifim le nupi ṭha cu va ral hna hlah, na nupi cu sui nakin a sung lawi deuh. 20 Rian fel tein a ṭuan mi sal le nangmah an tlaihchan ngai mi hlawhfa hna cung ah thil ṭha lo va tuah hlah. 21A thluak a ṭha mi sal cu na lungthin dihlak in va daw law a zalonnak kha lakpiak hlah.

Fale hna

22Saṭil na ngei maw? zohkhenh hna; na ca ah san an tlaih ahcun zua ko hna. 23Fa na ngei hna maw? Fim chim hna, an hmet tein fungfek in tu hna.  24Fanu na ngei hna maw? An pum cu zohkhenh hna, nain diriamnak ah hmang hna hlah. 25Na fanu cu vaa ngeihter, cun rian nganpi naa lim: sihmanhsehlaw mi ṭha vatter. 26Na duh mi te nupi na ṭhi maw? Amah cu thlah hlah; nain na duh lo ahcun zum bal hlah.  

Hringtu Nu le pa hna

27Na lungthin dihlak in na pa cu upat law na nu i nganfahnak kha philh bal hlah. 28 Lei na bat hna kha philh hlah; na cung i an tuahsernak cu zei tin dah na cham khawh hna lai?

Tlangbawi hna

29Pathian cu na lungthin dihlak in ṭih law a tlangbawi hna cu ṭihzah hna.  30Na thazaang dih-um in an sertu cu daw law a rianthiang ṭuantu hna cu hlaw hna hlah. 31Bawipa cu ṭih law a tlangbawi hna cu upat hna; cun a covo a si mi  thlaithar, sual thawinak, thiamcheh thawinak, thil thiang hna i thlaithar hna cu pe hna.

Misifak le ngaihchia hna

32Cun misifak kha siang ngai in va pe hna, cuti cun thluachuahnak na hmu lai. 33Na siannak cu ser mi vialte cung phan seh, mithi cung hmanh ah ṭhatnak va tuah. 34A ṭap mi kha na keng va chit hna hlah law mi kha an ngaihchiatnak hrawm hna.  35Mizaw kha va hrial hna hlah; dawt na tong lai.  36Na tuah mikip ah na donghnak kha ruat law na sual bal lai lo.