Tobit 12

Tobit 12:1-22

XI: AA PHUANNAK

12.  1 Nupiṭhit puai a dih tikah Tobit nih a fapa Tobias cu a auh i amah kha, ‘Ka fapa, na khualtlawn hawi a covo pek ding cu na ruah awk a si cang; cun na chapchih rih lai,’ tiah a ti. 2Amah nih, ‘Ka pa a ka bawmh caah zeizat dah ka pek awk a si?  Keimah he a rak phorh mi chawva hnarcheu ka pek hmanh ah ka sung lai lo. 3 Himbawm tein a rak ka tlunpi ṭhan, ka nupi a damter, tangka zong a rak phakpi, cun atu nangmah zong an damter rih. Hi vialte ca ah zeizat dah ka pek awk a si?’ tiah a ti. 4 Tobit nih, ‘Na rak phorh mi tangka i hnarcheu cu a co ding hrimhrim a si,’ tiah a ti. 5 Cucaah Tobias nih a hawipa cu a auh i amah kha, ‘Na kan bawmhnak vialte ca ah na rak phorh mi lak in hnarcheu i lak law daihnak he va kal ko cang,’ tiah a ti.

6 Cu tikah Raphael nih an pahnih in leng ah a chuahpi hna i annih kha, ‘Pathian cu thangṭhat u, mithmai ṭha an pek hna caah a thangṭhatnak cu ser mi thilnung vialte hna hmai ah thanh u. A min cu hlorh in thangṭhat u. Pathian tuahsernak hna cu mi hmai ah aa tlak ning in thanh u, cun ngol lo in amah cu lawm u. 7 Siangpahrang biathli phuan lo cu a dik, nain Pathian tuah mi hna kha a phut ning in phuan le thanh cu a dik mi a si ve. Thilṭha kha tuah u, cun ṭhat lonak nih an tlunh bal hna lai lo.

8 Ulhnak he thlacamnak le dinfelnak he pekṭhenhnak cu din lonak le rumnak hna nakin a sunglawi deuh suaumau. Sui khon nakin pekṭhenh nunzia ngeih a ṭha deuh. 9 Pekṭhenhnak nih thihnak in a khamh i sualnak vialte kha a thianh dih.  10 Pekṭhenhnak a tuah mi hna cu an nun a nuam; sualnak le ṭhat lonak a tuah mi hna cu harnak kha an i pe.  

11’Zei hmanh thuh bang lo in biatak cu a ningpi in kan chimh hna lai. Siangpahrang biathli thuh cu a hmaan, nain Pathian bia aa tlak ning in phuan cu a dik mi a si ti cu kan chimh cang hna. 12 Cucaah nan hngalh ding cu nangmah le Sarah nih thla nan cam tikah nan hal mi Bawipa sunparnak hmaika ah a pechan i a reltu cu keimah ka si; 13 cu bang in mithi na vui lio zong kha a si ve. Khulrang in na tho i na rawl kha na kaltak i mithipa na vui tikah na zumhnak hneksak awkah thlah mi cu keimah hi ka si, 14 cu bantuk in nangmah le na fapa nupi Sarah, damnak pek awkah Pathian nih a ka thlah. 15 Keimah cu Bawipa sunparnak hmaika luh ding ah zungzal timhcia in a um mi vancungmi pasarih hna lak i pakhat a si ve mi, Raphael ka si,’ tiah a ti hna.

16 Annih cu khuaruahharnak in an khat; ṭihphan in vawlei ah an bawk. 17 Sihmanhsehlaw vancungmi nih, ‘Ţih hlah u, nan cung ah daihnak um ko seh! Pathian kha zungzal in thangṭhat u. 18 Keimah kong ah cun nanmah he ka um tikah ka umnak cu keimah biachahnak in si lo in Pathian duhnak thawng in a si; nan chan chung vialte nan conglawmh ding cu amah, nan thangṭhat ding cu amah kha a si. 19 Rawl a ei mi ah nan ka ruah nain cucu langhnak sawhsawh a si. 20Atu vawlei ah Bawipa cu conglawmh ulaw Pathian cu thangṭhat u. Keimah cu cunglei in a ka thlahtu sin ah ka kir cang lai. A rak cang mi vialte kha ṭial dih u,’ tiah a ti hna. 21Cun thli lak ah a kai. An thawh ṭhan tikah amah cu an hmu ti lo. 22 Pathian cu hla thiang in an thangṭhat; cu bantuk khuaruahharnak a tuah caah an lawmh; an sin ah Pathian vancungmi a rak lang cang a si lo maw?