Tobit 7

Tobit 7:1-16

VII: RAGUEL

1 Ecbatana an luh tikah, Tobias nih, ‘Unaupa, Azarias, kan unaupa Raguel sin ah ka kalpi colh tuah,’ tiah a ti. Cun Raguel innlei kalnak lam cu a sawhpiak, Raguel cu a tual kutka hram ah a ṭhut ko kha an va hmuh. Anmah nih an biakchawnh hmasa, cun anih nih, ‘Nan dam maw, unau hna rak lut tuah u,’ tiah a ti hna. Cun chung ah a luhpi hna. 2A nupi Edna kha, ‘Zoh hmanh! Hi tlangval note hi ka unaupa Tobit a lawh khawh ning!’ tiah a ti. 3 Edna nih khua zei in dah an rat kha a hal hna; annih nih, ‘Kannih cu Nineveh ah a zam mi Naphtali fapale hna kan si,’ tiah an leh. 4 Kan unaupa Tobit nan hngal maw?’tiah a ti hna. Annih nih, ‘Kan hngalh,’ ti in an leh. Zei tin dah a um? 5 ‘A nung in a dam ko maw?’ tiah a ti hna. Cun Tobias nih, ‘Amah cu ka pa a si’ ti in a vun chap. 6Raguel cu a tho, amah kha a hnamh i a ṭap. Cun, bia kawl in, Tobias kha, ‘Ka fa, thluachuahnak hmu hram ko! Nang cu miṭha fapa na si! 7Cu tluk thluak ṭha le tuahsernak ṭha in a khat mi a mit a cawt cu zei tluk ngaihchia dah a si?’ tiah a ti. A chungkhat pa Tobias hngawng kha a kuh i a ṭap. 8 Cun a nupi Edna le a fanu Sarah zong an ṭap ve. 9 Raguel nih meheh ruun chung in meheh pakhat kha a thahpiak i lunglawm thanuam tein in an ṭhutpi hna.

       An i kholh, an i ṭawl hnu ah cabuai ah an ṭhu. Cun Tobias nih Raphael cu, ‘Unaupa, Azarias, Raguel nih ka farnu Sarah a ka pek naklai na ka halpiak lo?’ tiah a ti. 10Raguel nih a thli tein a rak theih, cun tlangvalpa cu, ‘Ei law ding, tuzanlei cu naa nuamh khawh chung in i nuam; aho hmanh nih ka fanu Sarah ṭhitnak nawl an ngei lo –ka unau, nangmah lawng nih na ngeih. Zei khawm a si ah keimah hmanh nih midang sin ah peknak nawl ka ngei lo, zei tin tiah nangmah cu amah he aa naihniam bik mi chungkhat na si. Asinain ka fapa, fiang tein kan chimh lai. 11 Ka fanu ca ah hin ka rualchan hna sin in pasal voisarih tiang ka rak kawlpiak cang, cun an zapi tein hmasabik zanlei, a khaan ah an luh tikah an rak thi dih.  Sihmanhselaw atu, ka fapa, ei law ding ko; Bawipa nih a veel le a daihnak an pek lai,’ tiah a ti. Tobias nih, ‘Keimah kong ah biakhiahnak na tuah hlan lo poh cu ei le din ding kong zei hmanh ka thei duh lo,’ tiah a ti ve. Raguel nih, ‘A ṭha tuk. Moses Phungbia ah amah cu nangmah pek ding ti in aa ṭial bang in Vancung hrimhrim nih nangmah ta si ding ah lai a rel cang.  Cucaah keimah zong nih na farnu cu na kut ah kan chanh.  Atu thawk in nangmah cu amah ṭaa na si i amah cu nangmah far a si cang. Nangmah kha nihin thawk in zungzal ca ah pek na si cang. Ka fa, tuzan ah vancung Bawipa nih a mithmai ṭha an pek i a vel le a daihnak cu an pek cang,’ tiah a leh. 12 Raguel nih a fanu Sarah cu a auhter hna, a orhlei kut kha a lak i Tobias orhlei kut ah a chanh hnu ah hiti hin a chim, ‘Abraham Pathian, Isak Pathian, Jacob Pathian cu nanmah he um ko seh, Bawipa nih nanmah cu kutsih in pumkhat in siter ko hna seh, Bawipa vel laksawng cu nan cung ah tlung ko seh, Cohlang law na pa inn ah himbawm tein i tlunpi. Vancung Pathian nih nan lam tluanter hram seh,’ ti in thluachuah a pek hna.  13 Cun a nulei ah aa mer i caṭialnak catlap lakpiak ding in a chimh. Lehthahnak hnatlaknak ca cu a ṭial, cun Moses Phungbia phunglam ning in Sarah cu a nupi ca ah Tobias cu a pek.

14Hi hnu ah ei le din hram an thawk. 15 Raguel nih a nupi Edna kha a auh i amah cu, ‘Ka farnu, a khaanhnihnak kha ser law amah cu luhpi,’ tiah a ti. 16A kal i a fial bantuk in cu khaan ah ihphah cu a ser, cun a fanu cu a luhpi. Cun a ṭah, a mithli aa hnawh hnu ah a fanu cu, ‘Ka fanu, na lung ṭhawng seh! Vancung Bawipa nih na ngaihchiatnak cu lawmhnak ah thleng hram seh! Na lung ṭhawng seh, ka fanu,’ tiah a ti. Cun leng ah a chuak.