Judith 2

Nitlaklei kam ralhranhnak 

2  1 Kum hleiriatnak kum, thlakhatnak, nikul le nihnihnak ni ah khan Assiria siangpahrang Nebukhadnezar nih a rak hrocer hna bangin ramdangmi vialte kha teirul a cham cang hna lai ti mi biavai cu innpi ah khan a leng. 2A ralkap bawi le upa hna cu a auh hna i anmah he a thli tein tonnak a ngei, cun a hmurka hrimhrim in ram chung in hrawh cikcek ding in a thanh. 3Cuka ah cun siangpahrang bawmhhalnak a rak let lo mi poh cu thihdan pek an si lai ti mi nawl kha an chuah.

4Mah meetingpi cu a dih tikah Assiria siangpahrang Nebukhadnezar nih a ralkap bawi vialte lak i lubik le amah changtu a si mi Holofernes kha a auhter hna. Cun amah kha hiti hin a chimh; 5Vawleipumpaluk i bawi, Siangpahrang Lianngan, nih hiti hin a chim:  “Kal in a ral a ṭha bik mi ralkap thongzakhat le thongkul hrawng le rang cung ralkap thong hleihnih cu rang bupi hna he va khawm law 6nitlaklei ram vialte hna cu va tu hna; zei cah tiah hi hna nih siangpahrang bawmhhalnak kha zei ah an rak rel lo. 7Anmah cu ka thin hun in ka chimh hna lai caah vawlei le ti an i damhcia nakhnga chim hna; an vawlei cu ka ralkap hna keneh in a khat lai i ka ramh dih lai. 8 An nelrawn le horkuang hna cu hliamhma a pu mi hna in an khat dih lai, cun tiva hna cu minung luruh nih a kham hna lai caah ti cu an liam lai. 9Sal in vawlei deng tiang ka hruai hna lai.  10Atu kal law hi hmunram dihlak cu keimah ca ah ka teipiak. A khuk an i bil ahcun dantat caan a phanh hlan tiang keimah ca ah chia ko hna. 11Sihmanhselaw an i dir-onh a si ahcun na kut ah chanh mi ram vialte cu zaangfahnak mithmai ngei lo in that in ramh dih hna.  12 Hi vialte cu ka nunnak le ka pennak i a nung mi ṭhawnnak chalh in ka chim cang.   Hi vialte cu keimah ṭhawnnak in ka tuah dih lai. 13Cun nangmahleikap in cun na bawipa i bia kha pakhat hmanh tlolh hlah, khua hnu lo in a ning tein tuah ko hna,” tiah a ti.

14Siangpahrang umnak khan a chuak i Holoferni nih Assiria ralkapbu i lu bik hna, ralbawi hna le an hruaitu kha a auh hna, 15a bawipa nih a chim bantuk in ralkap thongzakhat le thongkul hna le rangcung thal kaptu thonghleihnih hna kha a thim hna.  16 Cun anmah kha tuahkel ralkap cawnpiaknak pek ning in a tuahpi hna. 17Cu hnu ah thil a phortu ding ah kalauk, khacer le laa hna kha tampi in le lampi i ei awk ah rel cawk lo tuu, cawtum le meheh hna kha a khawmh hna. 18 Ralkapkip nih riahcaw tlamtling te le siangpahrang tangka bawm in sui le ngun tampi kha an hmuh. 

19Cun siangpahrang hmai ah khan nitlaklei ram hna kha a rangleng, a rang ralkap le a thim mi ke-ralkap hna he tei awkah, a ralkap ningpi in raltuknak ah aa thawh. 20 Cun a phunkip in aa cawh mi ralkap bu, khaubok le rilikam i thetse zat in a tam mi nih khan a hnulei in an zulh; an milu cu rel khawh ding a si lo.

Holoferni raltuknak a dotdot

21 Cun Nineveh in an i thawh i Bektilet nelrawnlei ah khan nithum chung an kal. Cun Bektilet in cung Cilicia chakleikap i a um mi tlang hna pawng ah riahbuk an sak. 22 cuka cun Holoferni cu tlangram hnalei ah khan a ralkap ning in le a ke-ralkap, rangcung ralkap hna le rangleng hna he a nor thluahmah. 23Put le Jud tivalei khan a tawinak in tan i Chileon tlanglei thetse ram a bitnak ah a um mi Rasi fale hna le Ishmael fale hna kha sal ah a tlaih hna i a hruai chih hna, 24 Zerfrati tivapi kha hrawn in, Mesopotamia kha a tan, Wadi Abron a kulh-mi khuapi vialte hna cu a thluk dih thluahmah hna i rili tiang a va phan. 25Cun Cilicia ram hna kha a tuk thluahmah i aa dirkamhtu ram vialte hna kha a saam thluahmah hna, cun Arabialei a hoih mi Jafet thlanglei ramri kam i a um mi hna kha a nor thluahmah hna i 26Medianmi hna kha an velchum dihlak in a kulh hna, an thlam hna kha a khanghpiak hna i an tuu hna cu a ramh dih hna, 27cun changvut ṭuan caan ah khan, Damaska nelrawnlei ah khan a va ṭum, lo cu mei in a khangh dih hna, tuu le caw hna cu a hrawh dih hna i khuapi cu a thluk dih i khuate hna cu minung um lo in a lawnter dih hna, mino vialte hna cu vainam in a sam dih hna. 28 Rilikam minung vialte hna, Sidon le Tyre i minung hna le Surocina le Jamnia i minung vialte hna cu an ṭih an phan tuk ah an ther dih. Azoto le Ascalon mi hna cu an thla a lau.