ESTHER 9
Purim Ni lianngan
9 Siangpahrang nawl le cachuah cu Adar ti mi thlahleinihnak thla i nihleithum ni ah khan a hung nung i Jew miphun ral hna nih annih kha kan den dih hna lai ti an i ruahchan nain a lettalam in thil cu a cang i Jew pawl tu nih an den hna. 2Ahasueras siangpahrang pennak chung ah a um mi khua hna ah khan Jew hna cu an i pum i anmah kha hliam a timh mi hna cu an tuk an den hna, Aho hmanh nih an kham kho hna lo, zei tin tiah mi vialte nih annih cu an ṭih hna. 3 Rampi bawi hna, palai hna le ramṭhen bawi le bawi-inn rianṭuantu hna cu Modekai kha an ṭih caah Jew pawl kha an bawmh hna. 4 Cun Modekai cu innpi ah khan ṭhawnnak phunkhat a si i a minthannak cu ramkulh dihlak a cul dih; Modekai cu duhsah tein a lianngan chin lengmang.
5Cucaah Jew pawl nih an ral vialte cu an den hna, cucaah lainawnnak le rawkralnak a chuak, cun an ral hna cu an duh poh in an tuah hna. 6Susa khualipi lawng ah khan Jew pawl nih pa lawngte zanga, 7min ngei ah, Parsadatha, Dalfon, Aspatha, 8Poratha, Adalia, Aridatha, 9 Parmastha, Arisai, Aridai le Jezatha le 10Hammedatha i fapa, Jew hna i ralpi, Haman i fale pahra hna kha an thah hna. Sihmanhsehlaw an chawva cu an chut hna lo.
11 Susa khualipi ah an thah mi hna milu cazin cu, cu ni hrimhrim ah siangpahrang cu thawng an thanh. Siangpahrang nih siangpahrangnu Esther cu, ‘Susa khualipi chung ah Jewmi nih minung zanga le Haman fale pahra kha an thah cang hna. 12 Pennak chung i ramṭhen dang hna ah zei tin dah an tuah rih hnga? Zei dah na hal duh rih? Na hal duh mi cu ka chim tuah, pekcia na si. Zei dah na tuah duh rih, hal ding cu nangmah rian a si,’ tiah a ti. 13Esther nih, ‘Ka bawipa nih a hna a tlak ahcun thaizing zong ah nihin bantuk tuahnak nawl pe hna law Haman fale pahra hna kha hri in hrengtung ah thlai hna seh,’ tiah a ti. 14Siangpahrang zong nih hi nawl a pek caah ca cu Susa khualipi zong ah a chuah ve i Haman i fale pahra hna cu hri in an thlai hna. 15Cucaah Susa khualipi i a ummi Jew pawl cu Adar thla ni hleili ni ah khan an i pum ṭhan i Susa khuami zathum kha an thah hna. Sihmanhsehlaw an chaw cu an chuh hna lo.
16Pennak chung i a um mi adang Jew hna zong nih anmah le anmah i dirkamh awkah an i pum i an ral hna cu an hloh dih hna. An ral thongsawmsarih le thongnga an thah hna. Sihmanhsehlaw an chawva cu an chut hna lo. 17Cu ni cu Adar thla ni hleithum ni ah a si i ni hleili ni ah cun an i din i puai an tuah. 18 Sihmanhsehlaw Susa khualipi i Jew mi pawl, nihleithum ni le nihleili ni ah aa pum mi hna, ahcun ni hleinganak ni ah khan an i din, puai an tuah i an i nuam. 19Cucaah khuatelei i a um mi Jew pawl cu Adar thla nihleili ni cu lawmhnak ni, puai tuah ni le zungkhar ni ah an hman, pakhat le pakhat laksawng an i chuah lio ah Susa khualipi i a um mi Jew hna tu cu puai kha, Adar thla, ni hleinga ni ah khan an tuah i laksawng zong an i chuah ve.
V: PURIM PUAI
Purim puai phunglut in dirhnak
20Modekai nih hi thil si ning vialte cu ca in a ṭial dih hna. Cu hnu ah Ahasueras pennak chung um, lamhlat lamnai ti lo, Jewmi vialte hna sin ah ca a kuat hna i 21annih kha kum fatin Adar thla ni hleilinak le hleinganak ni cu, 22 Jew hna nih an ral in an hloh hna ni, an ngaihchiatnak cu lunglawmhnak le ṭah aihramnak cu dinhni a cannak thla ti in puai tuah awkah nawl a pek hna. Cucaah annih kha, “Hi ni hna ah hin puai le nuamhnak nan tuah lai, laksawng nan i chuah lai i misifak kha laksawng nan pek hna lai,” tiah a chimh hna.
23Voikhat an thawk hnu cun Jew pawl zong nih hi puai cu an tuah zungzal, Modekai zong nih 24Agak miphun, Hammedatha i fapa Haman, Jew vialte hremtu nih Jew hna hloh awkah zei tin dah khua a khaan i anmah kha thlak le hrawh awkah zei tin dah Pur asilole thimfung kha a thlak ti; 25sihmanhsehlaw Modekai kha hri in thlai awkah hal ding in siangpahrang sin ah a kal tikah Jew hna cung ah khuaruahnak ṭha lo a ngeih mi cu zei tin dah amah lu cung lila ah a tlak ti le, cun amah le a faletu kha hrengtung ah thlai an si ning; cun, 26cucaah hi ni cu Pur ti mi biafang lak in purim puai a can ning kha a ṭial i philh lo ding in a khumh dih hna. Hiti ca in an ṭial mi ruang ah siseh, anmah hrimhrim nih an hmuh mi ruang le an cung i a tlung mi thil ruang ah siseh, 27Jew miphun cu anmah telhchih in an tefa hna tiang nih kum fatin pel lo in hi nihnih cu an rak ṭial ning in an caante ah puai cu an tuah peng hna. 28Hi puai cu chankhat hnu chankhat, inn chungkhar kip, ramṭhen kip le khualipi kip ah tuah mi le theihter ṭhan mi a si bang in hi Purim puai cu Jew lak ah a tlau ti lai lo i Jew miphun nih an philh bal ti lai lo.
29 Abihail i fanu bawinu Esther zong nih purim puai he pehtlai in a pahnihnak ca kha fehter awkah nawlngeihnak tling he ca kha daihnak le zumhtlak sinak in a ṭial i 30Ahasueras pennak chung-um 127 ramkulh hna i a um mi Jew hna sin ah a kuat hna, 31cun annih kha hi purim ni hna cu anmah an caan te le anmah le an tefa rak tuah hnga ding in, Jew a si mi Modekai nih a rak forhfial hna bang in, tuah ding ah ṭuanvo a pek hna i ulhnak le ṭahnak phungphai zong kha a chapchih hna. 32Esther nawlpeknak nih purim puai ca i phunglam cu a fehter, cun philh lo ding cauk ah an khumh.