SIRACH 39

Phungbia thiam

39 Thluak in rian ṭuan mi cu cuti cun an si lo, a lung ah a um mi cu Cungnung Bik Phungbia a si. Hlan mifim hna i fimnak kha a hlathlai i a caan cu profet hna cauk he a dihter. 2Minthang hna bia cu a ṭial hna i bianabia biathli hna kha a hngalh dih hna. 3Phungthluk bia, biathuk hna kha a hlat hna i bianabia biathli hna kha a ruah hna. 4Bawifa hna rian kha a ṭuan i uktu hna he hmuh a si. Ramdang a tlawng i minung sinak i a chia le a ṭha kha a hmuh hna. 5Zingkate ah a lungthin dihlak he amah a Sertu Bawipa sin ah aa mer; Cungnung Bik sin ah nawlnak a tuah i a kaa ang in thla a cam i a sualnak ca ah nawlnak a tuah. 6Lianngan Bawipa duhnak cu cu bantuk a si ahcun amah cu fimthiamnak thlarau in a khat lai. Fimnak bia kha tampi in a chim lai i Bawipa cu thlacam in a lawmh lai. 7Cawnnak le tinhnak ah ding tein a ṭhang lai i Bawipa i a biathuk thlithup hna kha a ruat hna lai.

8A rak hmuh mi cawnpiaknak kha a langhter lai i aa uanthlarnak cu Bawipa i thisen biakamnak Phungbia ah a si lai. 9Mi tampi nih a thluak ṭhatnak kha an thangṭhat lai i an philh ti lai lo. A muithlam cu a lo bal ti lai lo, a min cu chankhat hnu chankhat a nung lai.  10Miphun hna nih a fimnak cu an thanh lai i pumhnak nih a thangṭhatnak puai a tuah lai. 11Saupi a nun a si ahcun a min cu midang thong tampi nakin a sunglawi deuh lai i a thih ahcun kha zong kha aa lungsak ko lai.

Pathian thangṭhat awk i sawmnak

 12Cun khua ka ruah mi cheukhat an um rih, thlapa lai zaan thlapa bang in kei zong ka si ve. 13Chimh ngai fale hna, ka bia hi ngai ulaw tiva kam i a kho mi rose kung bantuk in par ve u, 14Ramdang tiang a rimhmui a thlah mi lyli par bang na rimhmui cu a hmui ve lai. 15 Bawipa cu thangṭhatnak hla, a tuahser mi conglawmhnak hla cu sa tuah u. A min lianhnngannak cu thanh u, a thangṭhatnak cu hla le tingṭang he phuang u, cun hitin hla cu nan sak lai: 16 ‘Bawipa tuah mi thil hna cu zei tluk khuaruahhar dah an si ! A nawl cu a caante ah tuah a si! nan ti lai i, “Hihi zei dah a si? Zei ruang ah?’ nan ti lai lo.  Biahalnak vialte hi caan an ngei cio. 17 A bia kaakhat in ti cu a dir i an i dil, a aw a thlah i tiput cu tidil muisam an hung ngei; 18nawl a pek i tuah a duh mi vialte cu an tling dih, khamh a timh hnu cun aho hmanh nih an kham kho lo. 19Minung phun nih an tuah mi vialte cu a hmuh khawh dih, zei hmanh aa thup kho lo. 20zei zongte cu zungzal in zungzal tiang a hmuh hna i zei hmanh nih a khuaruah an harter lo. 21Aho hmanh nih, “Hihi zei dah a si? Zei ruang ah dah a si?” nan ti lai lo. Zei cah tiah zei zongte cu tinh mi pakhat cio ca ah ser mi an si.

22 A thluachuahnak nih tlangcar hna cu tiva bang in a khuh i tilian bang in a ciah, 23ti thiang kha cite ah a canter bang in dantatnak cu miphun dang hna ca ah a si ve.  24A lam hna cu a mithiang hna ca ah an mil tluk in mi ṭha lo hna ca ah cun dawnkhantu lawngte an si.

25A thawkka in thil ṭha cu mi ṭha ca ah le thil ṭha lo cu mi ṭha lo ca ah ser a rak si ve. 26Minung nunnak ca ah a herh bik mi hna cu ti le mei, thir le cite, changvut dip, cawhnuk le khuaihliti, mitsur zu, chiti le hnipuan hna an si. 27Hi vialte cu mi ṭha ca ah an ṭha nain mi ṭha lo ca ah cu thilchia ah an cang.

28Cheukhat thli hna cu dantatnak ca ah ser an si i a thin a hun tikah fungfek ah a hman hna, 29 Mei le dap, mangṭam le thihnak hna cu dantatnak ca ah ser mi an rak si; 30saram, tlangngaikuang, limkeng hna cu pathian hngal lo hna rawhnak ca i lehrul chamnak hriam hna an si: 31 a bia tlinter awkah an i lap tuk, vawlei ah a herh mi a um poh ah tuah ding timhcia an si ko, cun an caan a phak tikah a bia pakhat hmanh an tlolh lo.

32 Hi ruang ah hin a thawk tein ka lung kaa thlek cang, khua ka ruat i ca ka ṭial cu hi ruang ah hin a si, 33 ‘Bawipa tuah mi vialte cu an ṭha dih, a caan a rem tikah a herh mi nawl cu a pek. 34 “Hihi cu mah nakin a chia deuh,’ nan ti lai lo, zei cah tiah a rauh hlan ah zeizongte cu man an ngeihnak kha an langhter cio te lai. 35Cucaah atu cu na lungthin dihlak le na aw dihlak in hla sa law Bawipa min cu thangṭhat.