Judit 14

V:   TEINAK

Jew pawl nih Assiria riahbuk an tuk

14 Judith nih a thawh hna i, “Unau hna, hi lu hi laa ulaw ralbihnak vampang cung ah khan va thlai u. 2Khua a dei i ni a san tikah pakip nih an hriamnam i lak hna seh law mipumtling vialte cu khuapi in chuak dih hna seh. Raltuk awkah a rak ra mi Assyria mi hna kha ṭum in nan tuk lai caah anmah lak ah khan hruaitu pakhat thim hna u. Asinain, hihi cu nan tuah rih lai lo. 3Assiria mi hna nih cun an hriamnam hna kha an pumh lai, an riahbuk ah an kal lai i an ralbawi ngan hna kha an va ṭhangh hna lai; annih zong Holoferni thlam ah khan an va le lai nain amah kha an hmu kho ti lai lo. Cu tikah annih cu ṭihphannak he an khat lai i nan hmai khan an zaam lai. 4Nanmah dihlak le Israel ram chung i adang vialte hna nih nan tuah ding mi cu annih hnu an i thawn tikah nan dawi hna lai i nan saam dih hna lai.

5 Sihmanhselaw hihi nan tuah hlan ah Ammon mipa Akhor kha ka auhpiak ulaw amah nih Israel chungkhar a rak zomhtaihtu, annih kha kanmah sin ah a thi ding ti in a rak kuatu, kha a hliah hmasa lai,” tiah a ti.6  Cucaah cun, Akhor kha Uzziah inn ah an rak luhpi. Uzziah inn a rak phak i mipi khongsil chungtel pakhat nih Holoferni lu a thlir kha a hmuh cangka a lung a mit i a tlu.  7Amah cu an thawh. Cun Judith ke tang ah khan aa hlonh i a hmai ah a bawk, cun amah nih: “Nangmah cu Judah thlaam chung i a um mi vialte le miphun dihlak nih in thangṭhat hna seh law; na min a thei mi vialte cu ṭihnak in khat hna seh!

8Atu nai hrawng ah zei dah na tuah ti cu ka chim tuah,” tiah a ti. Mi tampi nih an kulh i Judith nih Bethulia in a chuah ri in atu bia a chim caan tiang a tuah mi thil vialte kha a chim dih.  9A biachim a dih tikah mipi nih amah cu khuapi dihlak a tlerh tiang in an au i an lawmh. 10Israel Pathian nih a tuah mi thil vialte kha a theihthiam tikah, Akhor cu amah kha fek tein a zumh, cuarpartannak kha a cohlan i amah cu zungzal in Israel chungkhar ah an telhchih.

11Khua a dei tikah Holoferni lu cu ralvennak vanpang ah khan an thlai. Cun pakip nih an hriamnam kha an i lak i tlangpang in chuk ah khan a bubu in an ṭum. 12Hi thil hi Assiria mi hna nih an hmuh hna tikah an hruaitu hna sin ah bia an cah hna i cun annih nih an ralbawi ngan hna le thongkhat-ralbawi hna le ralbawi dang hna sin ah khan an hei thanh chin ve hna, cun 13 annih zong nih Holoferni thlam ah khan an thanh chin ve. Annih nih khan a ralveng cu, “Kan bawipa cu ṭhang tuah; zei tin dah hi sal hna nih hin kanmah tuk awkah le minung pakhat bang phiah dih ding ah an rak ṭum,” tiah an ti. 14 Bakoa cu thlam chung ah a va lut i Holoferni cu Judith he an it rua ti ruat in thlaam dal puanzar kha a tuk. 15Sihmanselaw, aho hmanh nih theih dawh a si lo tikah, puanzar cu a hlim i ihnak khaan chung ah a va luh tikah a lu tan in ṭuang ah a ril ko mi a ruak kha a hmuh. 16 Fak pi in a au i a ṭahpah in a ai a kio i a hnipuan cu a thleh dih. 17Judith a rak umnak thlaam ah khan a va kal tikah amah zong a hmu ti lo. Cun mi hna sin ah khan a va le i fak pi in, 18“Sal hna nih ral an tho cang! Hebru minu pakhat nih Nebukhadnezar chungkhar ah ningzahnak a chuahter cang. Holoferni cu lu lo in zel ah a ril ko!” tiah a au.

19Hi bia an theih tikah Assiria ralkap bu hruaitu hna cu an thin a hung tuk i an angki fual hna cu an thleh, cun an riahbuk cu aukhuannak in a khat.