Fimnak 8

Solomon nih Fimnak a duhzia

8 1Ṭhawng ngai in leicung khattelei in adang khattelei tiang a phan, cun leicung pumpaluk cu a ṭhatnak caah a uk.2 Fimnak cu ka duh i ka hmet tein ka rak kawl cang; ka nupi i ser awkah ka lung ka rak i thlek, aa dawhnak cu ka thlaihchan tuk. 3 Pathian nunnak aa hrawmnak thawng in a chuahnak cu a sunlawiter, zei cah tiah zei zongte Bawi nih amah kha zungzal in a rak dawt cang. 4Ataktak ti ahcun amah cu Pathian theihhngalhnak biathli kha aa hrawm ve i a tuah ding mi kha a thimpiak. 5Hi vawlei nunnak ah rumnak hi duh nung chawva a si ahcun hmunkip ah a kutneh a um mi Fimnak hlei in zei rumnak dah a um ti lai? 6Asilole rian a ṭuan mi cu thluak a si ahcun zeizongte a sersiamtu amah hlei a hodah rian a ṭuan ti? 7Asilole dinfelnak hi na duh mi a si ahcun zei ruang ah dah amah cu na duh lo, zei cah tiah ṭhatnak ti mi cu rianhar a ṭuannak i theitlai an si, zei  tin tiah lungsaunak le ralrin thiamnak, dinnak le ralṭhatnak hna a cawnpiaktu cu amah a si i nunnak ah amah nakin san a tlai deuh mi zei hmanh a um ti lo. 8 Asilole hmuhtonnak tam kha na duh mi a si ahcun amah cu a luancia caan kha a hngalh i hmailei caan kha a chimchung khawh; Phungthluk bia hna kha zei tin mer awk ti a hngalh i biahar hna kha a hngalh khawh hna; hmelchunhnak le khuaruahhar, cun kum le caan an i thlen ning kha a hngalh dih.

Fimnak cu uktu hna ca ah a herh hrimhrim mi a si

9Cucaah amah cu hunchonak ca ah ruahnak petu le retheih le ngaihchiat caan ah hnemtu a si lai ti ka hngalh caah amah cu ka nunnak hrawm awkah kaa lak. 10 ‘Amah cu ka lawmh tuk, zei cah tiah amah thawng in mibupi nih an ka zohcho, kum note ka si ko nain upa hna nih an ka upat, 11Keimah cu biaceihtu hna nih mifimpi ah an ka ruah i milianngan hna nih khuaruahhar in an ka zoh lai. 12 Dai tein ka um tikah an hngah lai i bia ka chim tikah ṭha tein an ngaih lai; sau nawn bia ka chim ahcun an hmur an i huh lai. 13Amah thawng in thihthiam lonak cu keimah taa a si lai; a ka changtu hna sin ah a dong lo mi philh lonak ka chiahtak hna lai. 14Mi cu ka uk hna lai i rampi hna cu ka kut tang ah an um lai; 15Ka min an theih tikah ṭihnung mi-uk hna nih an ṭih lai; mipi sin ah mi nunnem le raltuknak ah paralṭha in ka lang lai.

16 “Inn ka ṭin tikah amah ah hnangam tein ka um lai, zei cah tiah amah he cun zei hmanh a kha lo, amah he nun i hrawm tikah lawmhnak le nuamhnak hlei in zei hmanh a um ti lo.

Solomon cu Fimnak hal awkah aa timlam

17Hi vialte hi ka ruah i ka hmuh mi cu, thihthiam lonak cu Fimnak he chungkhat sinak ah, 18I lunghmuihnak cu amah he hawikom sinak ah, a dih kho lo mi chawva cu amah he cawlcanghnak ah, hngalhthiamnak cu amah he i umṭinak ah le minthannak cu amah he bia i ruahnak ah a um. Amah kawl ah lam vialte ka zawh, 19keimah cu nuamh a duh mi seino ka si, thlarau ṭha kha covo ah ka rak co cang, 20asilole ka ṭhat caah a thiang mi pum ah ka rak lut cang; 21sihmanhsehlaw Pathian nih a ka pek lo ahcun Fimnak cu ka co kho bal lai lo ti cu ka hngalh caah –a ho laksawng chung ah dah a um ti hngalhnak hrimhrim kha thluak ṭhatnak hmelchunhnak a si - Bawipa sin ah thla ka cam i ka nawl, cun ka lungthin dihlak in ka chim: