SIRACH 29
Thil cawih
29 Na innpa thil cawih cu zaangfahnak rian a si, na innpa bawmh cu nawlbia tlinh a si. 2Na innpa cu a herh lio ah va cawih, na cawi tik zong ah a caante ah va pe. 3Na biakam cu zul law amah cung ah zumhtlak in um, cun zei zongte na herh caan poh ah na hmuh lai. 4Mi tampi nih cawih mi thil cu van in a tla mi ah an ruah, cun anmah bawmh awkah a ra mi kha lung hnahnawhnak an pek hna. 5Minung ti mi hi zeimaw thil a hmuh hlan lo cu a innpa kut kha a hnamh, cun a rumnak kha a si khawh chung in a langhter. Sihmanhsehlaw cham caan a phak tikah cun caan a thawn, i ruat set lo in bia chim i caan a rem lonak ca ah a nawlpat.
6 A pek khawh hmanh ah cheuchum hmanh a hmu ṭhan lai lo, cu hmanh ah van in a rak tla mi ah a hmuh rih. A si lo ahcun a tangka cu hlen a tong lai, cun a herh lo ah ral tu kha a ngeih lai; Mipa nih cun chiatserhnak le volhpamhnak he, upatnak si loin thangchiatnak in a cham lai. 7Mi tampi cu, ziachiat ruang ah si lo in an cawih duh hna lo; a ruang lo in mi nih an hlen hna lai kha an phang.
Pekṭhenhnak
8Sihmanhsehlaw miharsa taktak hna cung ah na lung sau seh, na bawmhnak kha hngahter hna hlah. 9Nawlbia zulh in sifak cu bawm hna , misifak cu an herh caan ah kut-lawng in kalter hna hlah. 10Na tangka cu na unau le na hawikom hna ca ah hmang, a rawp men ding in lung tang ah chia hna hlah. 11Na chawva cu CungnungBik nih a ri a khiah cang bang in hmang hna, sui nakin a miak deuh kha na hmuh te lai. 12Na rawlbuk cu pekṭhenhnak in khahter hna, vanchiatnak vialte in an in khamh lai. 13 Annih cu phaw fekpi le a rit ngai mi fei nakin an ṭha deuh, na ral an in dohpiak lai,
Aamahkhaannak
14Mi ṭha nih cun a innpi ca ah aamahkhaan a tuahpiak lai; ningzah hngal lo lawng nih amah cu a kaltak lai. 15Tangka an cawihtu i dawtnak cu philh bak hlah; na ca ah a nunnak a rak thap cang. 16Misual nih cun a cawihtu i rumnak kha a philh i dawtnak a hngal lo mi nih cun a khamhtu kha a philh. 17Aamahkhaan tuahpiaknak nih mirum tampi kha a hrawh cang hna, rili tilet cung ah hnuhmai a choih cang hna. 18Mi lianngan tampi kha an inn in a ṭumter hna i ramdang ah a vaihter hna. 19A miak ruahchan in aamahkhaan tuahpiak aa hnawh mi mi ṭha lo cu sual biaceihnak ah aa hnawh mi a si. 20Na innpa cu a si khawh chung in bawm ko, sihmanhsehlaw amah bantuk vanchiatnak ton lo ding cu vaa ralring.
Midang inn i um
21Nunnak ah a biapi bik mi cu ti, cun changreu, cun hnipuan, cun mahte um khawh nakding in inn a si. 22Midang inn ah meh thawthaw ei nakin thing innte i misifak nunnak cu a ṭha deuh. 23Na ngeih mi cu a tlawm zong ah a tam zongah na lung tling seh, cun na chungkhar hna i mawhchiat na tong lai lo. 24Innkhat hnu innkhat vah cu a har ko; na umnak poh ah na kaa na aang ngam lo, 25na inn a si lo tikah ti na tlenpiak mi zong lawmh na co lo, cun hi bantuk biahrang lawng na theih: 26“Khual, cabuai hung ser, zei dah na ngeih? ei awk ka pe ve! 27Khual, tho law khuallian ca ah ihnak va serpiak; ka unau a ra lai, a khaan ka herh,’ 28Mithmai ṭha ton lo le lei a ba mi bang tuahser cu khuaruahnak a ngeimi ca ah a har ko.