SIRACH 36

Isreal tlanhnak le dirh ṭhannak ca thlacamnak

36    1Zei zong vialte Bawipa, ka Bawipa, run ka zoh law ka zaangfah tuah, miphun dang vialte hna kha ṭih na nunnak cu hmuhter ko hna. 2Ramdangmi hna cu na kut thlirhnawh hna law na ṭhawnnak cu hmuhter ko hna. 3An hmaika ah na thiannak na kan hmuhsak cang bang in atu kan hmaika ah na ṭhawnnak cu hmuhsak ko hna. 4Bawipa, nangmah dah ti lo Pathian dang an um lo ti kan hngalh bang in annih zong hngalter ve ko hna.

5Hmelchunhnak thar thlah, khuaruahharnak thar tuah law, na baan le na orhlei kut ca sunparnak hmu ko. 6Na thin cu alhter law na thinhunnak cu toih ko hna, an dotu cu hrawk hna law na ral cu hlo dih ko hna.  7 Na biakamnak cu philh lo in caan cu tawiter ko, cun mi nih na tuah mi thil lianngan cu thanh hna seh. 8 Na thinlinhnak nih a nung in a tang mi hna cu dolh dih ko hna seh, cun na mi a hremtu hna cu rawkral dih ko hna seh. 9‘Kanmah dah ti lo aho dah a um ti?’ a ti mi ṭihnung uktu hna lu cu rial dih ko hna. 10Jacob thlak vialte cu khawm ṭhan hna, a hram thawk lio bang in an roram cu pe ṭhan ko hna. 11Maw Bawipa, na min in auh mi na mi, fater ah na rak i ser mi Israel cu run zaangfah ko. 12A thiang mi na khualipi, naa dinhnak Jerusalem cu a zawn ruat ko. 13Zion cu na thangṭhatnak le na hmunthiang cu na sunparnak in khahter ko.

14Na rak ser hmasa mi hna an dinnak cu langhter law na min in phuan mi profet bia hna cu tlinter ko. 15Na sin in an hngakhlang mi laksawng hna cu pe hna, na profet hna cu a deu an si lo kha langhter ko. 16Bawipa, Aaron nih na mi hna thluachuah a pek hnanak bia hmang in na salle hna nawlnak cu kan let hram ko, 17cuti  cun leicungmi vialte nih nangmah cu Bawipa le a hmun mi Pathian na si kha an in hngalh lai i an in cohlan lai.

Thleidan thiamnak

18Pawpi cu rawl phunzakip kha a cohlan, nain rawl cheukhat cu adang hna nakin an ṭha deuh. 19A thawt-nam hngalhthiamnak nih sa rimhaw a thleidan bang in mifim bia ngaitu zong nih lihbia cu a hngalh khawh ve. 20Nunzia rawk nih midang kha lungdonghnak a pek; cu bantuk mi teirul cham ding cu hmuhtonnak a herh.  

Nupi thim ning

21Nu cu pasalkip kha a cohlan ko lai, nain fanu cheukhat cu adang hna nakin an ṭha deuh. 22Nu dawhnak nih a zohtu kha a lawmhter, pa nih cu nakin a duh deuh mi a um ti lo.  23A hmurka cu a thlum ahcun a vapa cu mi lunglawm bik a si. 24Nupi a ṭhi mi pa nih chawva, amah tluk bawmtu, hngatchan awk tungpi kha aa hmuh cang.  25Hau kulh lo mi thilri cu mi nih an ramh ko lai; pa cu nupi a ngeih lo tikah a vakvai i a phunzai. 26Khuakhat hnu khuakhat a lut mi hriamtlai mifir cu aho nih dah a zumh lai? 27Cu bantuk in dinhnak ngei lo in a vak i a phanhnak poh ah a it mi pa cu aho nih dah a zumh lai.