Fimnak 14

14 1Asilole mi pakhat cu tilet a tho mi rili kha tan awkah tilawng he aa thawh tikah amah a phor mi tilawng thing nakin a nem deuh mi thingkung sin ah thangpi in bawmhnak a hal. 2A hmaan, tilawng cu a miak a duh tuk mi i kutzung dawh a si, 3a khaltu cu nangmah veel bawmhnak a si, rilipi cung hmanh ah khan kalnak lam cu na hunpiak i tilet lak hmanh  ah khan himnak lam cu na serpiak, 4cuti cun zei thil a can hmanh ah na khamh khawh ko kha na langhter, cuti cun hmuhtonnak a ngei lo mi hmanh nih rili in khual a tlawng ngam lai. 5Na Fimnak in na tuah mi thil cu pakpalawng an si kha na duh mi an si lo caah thingpheng hmete i bochan in vokkuanglawng hna in rilipi cu an tan nain an him i an dam ko. 6Zei cah tiah, a hramthawk ah miporhlaw pipi hna an rak rawh i vawleipi i ruahchannak cu vokkuanglawng a rak si ah khan na kut in na rak khalh i a ra lai mi chan tampi ca ah miphun thar ci cu na rak humhim.  

7Miding ca hman mi thing hna cu thlua chuak ko hna seh, 8 sihmanhsehlaw serchom-milem a si, amah le a sertu cu chiatserh si ko hna seh, zei cah tiah a rak ser hnu ah a rawk kho mi a si ko nain pathian ti in an rak auh cang. 9Zei cah tiah Pathian nih pathian hngal lo le a hngalh lonak cu i tluk tein a huat hna; 10a tuah mi le a tuahtu cu i khat in dantat an si lai.11 Hi hnu ah miphun dang milem hna zong lennak caan an ngei ve te lai, zei tin tiah Pathian ser mi ah annih cu fihnung thil ah an cang cang, minung thlarau ca ah rawknak, mihrut ke hna ca ah rap ah an cang cang.

Siasal biak a hramthawk

12 Milem tuah ding ti mi ruahnak hi sualthurnak hrampi a si; an tuahthiamnak nih nunnak a rawhter. 13A hramthawk ah an rak um lo i a um zungzal lai lo; 14 Minung santlaihnak nih vawlei ah a rak phakpi hna i a lotlau zau ding an si ko.  15 A fapa a sungh ruang ah a ngaih a chia tuk mi a pa nih a fapa zuk kha a serter i a kalnak poh ah aa kalpi, cun nizan ah miruak men cu atu ah pathian upatnak kha a pek cang hna, a mi hna sin ah biathuk le puai hna cu a chanhchin hna; 16caan an liam, kha tuahsernak cu a fekchin i upadi ah an cang. 17Milem hna cu biak awk an si ti in nawl a chuahtu cu uktu hna an si: lamhla i a um mi hna cu pumpak in upatnak an pek khawh hna lo caah siangpahrang hmanthlak kha an serter hna, cucu upat mi siangpahrang hmanthlak kha an i chiah khawh nakhnga caah a si, cucu, an duh tuk caah a um lo mi kha a um mi bang an fak duh caah a si. 18 A kutzung aa dawh tuknak nih amah a rak hngal bal lo mi hna hmanh kha amah biaknak vahpitu ah canter hna; 19 Uktu lungtluanh a duh caah a muisam kel nakin aa dawh deuh nakhnga biatak tein aa zuam, 20 cun mibupi zong nih aa dawhnak nih an lung a lak tuk hna caah tunaite i minung pakhat bang upatnak an rak pek mi cu pathian he an palh cang. 21Cun hihi nunnak ca ah rap a si: vanchiatnak asiloah bawi ṭha lo nih sal ah a ser mi hna cu hmurka in chim ngam a si lo mi Min cu thingpheng le lungtum hna kha an pek cang hna.

Siasal biaknak a ṭhat lonak

22 Sihmanhsehlaw annih ca ahcun Pathian kong ah cu bantuk ruahsualnak an ngeih mi kha a za rih lo, ṭihnung hngalh lonak raldohnak chung i an um caah hi ṭihnung thil ṭha lo cu daihnak an ti. 23Annih cu an fale hna thawinak, an thlithup biathuk hna, asiloah chanhlun nunphun he an ei an din tuknak he, 24an nunnak le an ṭhitumhnak ah thiannak zei hmanh a tang ti lo; pakhat le pakhat rawiphiar in an i that, asiloah, nupi firnak in an lung an i  fahter. 25A kenkip ah thisen chuahnak le lainawnnak, firnak le hlennak, ziaza rawhnak, rawiphiarnak, i dohdalnak, a hmaan lo tehte khaannak, 26 miṭha hna hnahnawhnak, dawtnak philh hmannak, lungthin thurnak, kokek thilri cung sualnak, chungkhar hmunh lonak, nulepa sualnak le zuanzamnak lawngte a si. 27 Zei cah tiah min ngei lo sialsal biaknak cu chiatnak vialte aa thawknak, a hrampi le a donghnak a si. 28 Zei cah tiah hi mi hna cu an i nuamhnak kha hruhnak ah an chuahter, nal profet ah an i cang, asilole ziaza chia in an nung, asiloah fawi tein chiatserh in bia an i kam; 29 zei tin tiah annih cu nunnak a ngei lo mi siasal an i bochan caah ningcang lo in chiat an i serhnak nih harnak a pek khawh hna ti kha an ruat ti lo.

30 Sihmanhsehlaw khuasual an tuah mi pahnih hna ruang ah a phut ning in dantat an si ko lai: zei cah tiah sialsal an biak caah Pathian ti mi ruahnak kha zei ah an rel ti lo; cun a thiang mi kha zei rel lo in chiakha ngai in lih an chim cang. 31Zei cah tiah ser mi thil huham in chiat an i serh a si lo, miṭha lo hna sualnak hnu in a zul zungzal mi, misual hna ca ah chiah mi dantatnak cu anmah nih an tuar ko lai.