ESTHER 7

7 1Siangpahrang le Haman cu siangpahrangnu Esther nih a timh mi zanriah dum awkah an va kal, 2cun nihnihnak an ei lio zong ah siangpahrang nih Esther cu, “Bawinu Esther, na hal duh mi cu ka chim tuah? Kan pek lai. Zei dah na duh, ka pennak i hnarcheu a si hmanh ah na hal ding cu nangmah rian a si,’ tiah a ti.  3 Siangpahrangnu nih, “Bawipa, na hmai ah mithmai ṭha ka hmuh i na lung a tlin a si ahcun – ka nunnak hi ka zuah hram ko –cucu kan hal mi a si- cun ka miphun hna nunnak; cucu ka duhmi a si.  4 Zei cah tiah ka miphun hna le keimah cu hrawh, thah le hloh dih ding in mikut ah chanh kan si cang.  Sal le sin-um, sal hna can ding lawng ah zuar kan si ahcun zei hmanh ka chim lai lo. Sihmanhsehlaw atu cu siangpahrang nih a humhim ding mi nunnak kha mithattu hna nih an hrawh ding cu thil si ning kel pinlei a si,’ tiah a ti.  5 Ahasueras nih, “Hipa cu aho dah a si?  6Cu bantuk tuah ding ruahnak a ngei mi cu khua zei ah dah a um?’ tiah a bia tan in a hun hal tikah Esther nih, “Mithattu le ral cu maw? Hi misualpa Haman hi a si ko,’ tiah a chim tikah Haman cu siangpahrang le Esther hmaika ahcun a ther thluahmah cang. 7 Cu tikah siangpahrang cu a thin a hun tuk ah a tho i innpi dum chung ah a vaa chawk. Siangpahrang nih ka nunnak cu a zuah ti lai lo ti a hngalh tikah a nunnak khamh ding nawlpat awkah siangpahrangnu he cun a taang.

 8 Siangpahrang cu dum in rawl-einak khaan ah a rung lut ṭhan i Esther ṭhutnak ṭhutdanlei a va kun mi Haman kha a hmuh tikah, ‘Ziah!  Ka innpi chung hrimhrim ah maw siangpahrangnu tlaihhrem a timh cang?’ tiah a ti mi bia kha a hmurka in a chuak maw chuak lo ti ah khin tlangval pawl nih Haman hmai cu an huh. 9 Siangpahrang pawng i a um mi tildit Harnona nih, ‘Bawipa nunnak khamh awkah thawng a thanhtu Modekai thahnak ding ca ah dong sawmnga a sang mi hrengtung cu Haman nih a inn ah a dirh ko,’ tiah a ti tikah siangpahrang nih, ‘Mah tung ah amah cu hri-awh in that u,’ tiah nawl a pek hna.  10 Modekai ca ah a rak derhmi tung ah Haman cu hri-awh in an thah tikah siangpahrang thin cu a dai.