1 Maccabaeus 14

Simon thangṭhatnak

14 172 kum ah khan siangpahrang Demetrius cu Traifo tuknak ca phaisa kawl awkah a ralkap kha a pumh hna i Media ah aa thawh. 2 Persia le Media siangpahrang Arsaces nih Demetrius cu a ram ah a lut cang ti a theih tikah a nung in tlaih awkah a ralbawi lu bik pakhat kha a thlah. 3Ralbawi nih Demetrius ralkap kha a tei hna, amah kha a tlaih i a ratpi tikah thong ah a thlak. 4Simon chan chung vialte ram cu a dai.

Amah cu a miphun ṭhatnak a kawl, a lianhngan bang in, a nawlngeihnak cung zong ah a chan chung an lung a tling.  5A min sunparnak caah Joppa kha a lak i tilawng dinhnak hmun ah a ser caah Medeterranian tikulhlei luhchuahnak lam a pemh. 6A ram ralhau kha a kauhchap, a ram kha ṭha tein a uk i saltang tampi a thlah hna. 7Kezar le Beth-Zur le Ralhau khua kha a tei, a thurhnawm kha a thianh i mizei hmanh nih an doh kho lo. 8 Hnangam tein an lo an thlo; vawlei nih theitlai a chuahpi i thingkung nih theipar an tlai. 9 Putar hna cu an tual ah an ṭhu i an ceih mi cu an chan ṭhatnak a si; mino hna cu ralthuam he an tleu. 10A minthannak cu vawlei deng tiang a tlerh hlan lo khuapi cu eidin he a khahter i fek tein a kulh hna. 11Ram chung ah daihnak a ser i Israel ah lawmhnak nganpi a um. 12An mitsur ruang le an thingkung tang cio ah an ṭhu hna i aho hmanh nih an ṭhihphaih hna lo. 13Doh ding ral ram chung ah a um ti lo, amah chan siangpahrang vialte cu a cil dih hna.  14A tha a tlawm mi a mi kha tha a pek hna i mi ṭha lo le mi zuarthlai vialte cu a tei hna. 15Phungbia zulh aa zuam i Biakinnpi cu dawhnak tha a pek, thil thianghlim tampi in a khahter.

Sparta le Rom hna he ṭanṭinak tharchuahnak

16Jonathan thih cu Rom le Sparta tiang nih an theih tikah mi cu an ngaih a chia ngaingai. 17Sihmanhsehlaw a nau Simon nih tlangbawi ngan sinak in a chan i a ram le a khualipi hna kha ṭha tein a uk ti kha an theih tikah, 18a ule hna, Jonathan le Judas he an rak tuah mi hawikomhnak le ṭanṭinak kha tharchuah awkah amah cu dar catlap in ca an kuat; 19cu ca cu Jerusalem tonpumhnakpi ah an rel.

20Hihi Spartami hna sin in kuat mi ca:  

"Sparta hruaitu le khualipi sin in tlangbawi ngan Simon le upa hna le tlangbawi hna le a tang mi Judea mipi mi vialte hna sin biakchawnhnak:

 21Nan rak thlah mi palai hna nih nan sunparnak le nan ṭhanchonak kong an kan chimh i an rak kan tlawnnak cung ah tampi lawmhnak kan ngei. 22An kan thanh mi bia hna cu mipi tonpumhnak roca ah hiti hin kan ṭial: "Judeami palai hna, Antiochus fapa Numenia le Jason fapa Antipater hna cu kan i hawikomhnak tharchuah awkah an rak kan phak. 23Hi hna cu upatnak he kan cohlan hna i an bia cu Sparta mipi nih zungzal an i chiah khawh nakhnga mipi roca bukbau ah kan chiah. Simon ca zong ah pakhat kan chiahpiak ve.

 24Hi hnu ah Simon nih mina thongkhat a rit mi sui ralphaw nganpi tlapkhat he an i hawikomhnak tharchuah awkah Numenia cu Rom ah a thlah ṭhan.

Simon ca ah chuah mi upatnak hna

25Hi thil cu kan mi sin ah an thanh tikah annih nih, “Simon le a fapa hna cu zei bantuk upatnak rothil dah kan pek hna lai? 26 Amah a unau hna le a pa chungkhar hna cu fek tein an dir i Israel ral kha an doh i luatnak an hmuhpiak hna,” tiah an ti. Cucaah dartlap ah khan an ṭial i Zion tlang cung phun mi tung sangpi ah an tar. 27Hihi an ca cu a si:  

“172 kum Elul thla niriatnak ni, tlangbawi ngan Simon a pennak a kumthumnak kum:

28"Asaramel, tlangbawi le mipi, rampi bawi le upa hna tonpumhnak sunglawi ah:

"A tanglei thil hna hi kan theih zungzal mi an si:

29"Ram chung ah catlo raldohnak a um tikah Joarib tlangbawi phun chung i Mattathias fapa Simon le a unau hna cu hmunthiang le Phungbia hna humhimnak ca ah an miphun cu harnak chung in an chuahpi i ral hna cu an doh, cuti cun an miphun ca ah sunparnak nganpi kha an hmuh.  

       30 "Zei tin tiah Jonathan cu a miphun kha a pumhkhomh, tlangbawi Ngan a si i a pupa hna sin ah a kal ve tikah, 31 ral nih rampi kha chim, a ram hna kha hrawh i a hmunthiang hna cung kai a timh tikah, 32 a miphun ca ah ral tu ding in  Simon cu a hung chuak; a pumpak ngeihchiah chawva kha a miphun ralkap hna hriamnam le thlahlawh pek awkah a hman hna; 33 Judea khualipi hna le Judea ramri um ral hna nih an thilri an rak chiahnak a si mi, Beth-Zur kha ralhau in a kulh i cuka ah cun ralvengtu Jew ralkap hna kha a chiah hna; 34 Cun rili kam i Joppa le Azota ramri ah a um mi ral hna an rak umnak khua Kezar zong ah khan Jew cheukhat kha a umter hna i annih kha anmah tein an dir khawh naklai an herh mi vialte a pek hna.

35 Cu ruang ah mipi nih Simon i dinfelnak le a miphun ca  ah co a duhmi sunparnak kha an hmuh tikah a rianṭuannak le a miphun cung a langhter mi a dinfelnak le zumhtlak a sinak kha zoh in amah kha phunbawi le tlangbawi ngan ah an thim, zei cah tiah amah nih cun a miphun ṭhawnnak caah a lamkip in a rak i zuam cang.

       36Amah a chan ah khan ramdang mi hna, Jerusalem i David Khualipi cung um mi hna tiang  ṭhawl awk rian cu a cung ah a tla cang, zei cah tiah, annih nih ralhau khua cu anmah ca ah an hman, hmunthiang pawngkam thurter awkah le a thianghlim mi hna buar awkah cuka ahcun an i thup; 37cucu ram le khualipi himnak ca ah Jew ralkap hna cu khika ah chiah hna awkah le Jerusalem vanpang kha santer deuh awkah a si.

       38Cun Siangpahrang Demetrius nih Rommi hna nih Jewmi hna he an i hawikom an ṭangṭi le unau in an um ti kha a theih tikah 39cun Simon palai hna kha upatnak he an cohlan hna, cu pin ah, 40Jewmi hna le tlangbawi hna nih, profet taktak a langh hlan lo Simon kha an phun hawi le tlangbawi ngan in lunglawmhnak he an cohlan ti kha a theih tikah 41tlangbawi ngan a sinak kha a fehter, Hawikom sinak dirhmun sang ah a cawisan i amah kha upatnak tampi a pek, cun ralbawi lu bik a sinak kha 42 hmunthiang zohkhenhtu upa thiahnak nawl le ram, thilri le ralhau hna uknak nawl he a fehter; 43 cun amah hrimhrim nih hmunthiang cu a uk lai i mi vialte nih a nawl an ngaih lai; ram chung zungca vialte cu amah min in ṭial a si lai; cun puansen kha aa hruk lai i suiṭhi kha aa oih lai.

44Cu pin ah khuazei mipi bu le khuazei tlangbawi an si ah hi phung an ralchanh asilole a mah biakhiahnak kha an zuamcawh, asilole amah nawl lo in meting an auh asilole puansen asilole sui hlawnthil aa hruk ahcun phung an buar a si, 45 cun hi phung le nawlchuahnak a buar mi poh cu dantat a huah lai.  

       46Cun mipi nih Simon cu kan chimcia nawlngeihnak pek ding in lungrual tein an hna a tlak caah, 47Simon zong nih amahlei kap in a hnatlaknak a phuan cang caah, cun amah zong nih tlangbawi ngan rian ṭuan ding le an ca ah ralbawi ngan bik ṭuan le Jew hna ramuk bawi le an tlangbawi si i anmah kha uk awkah a lung a tlin cang caah:  

 48Atu hiti hin si ko seh: hi ca cu darlung tlap ah ṭial a si lai i Biakinn velchum zapi hmuh khawhnak ah tar a si lai, 49 Cun hi catlen hna cu Simon le a tefa hna  Chaw bukbau ah khumh an lai," tiah an ti.