Fimnak 5

Pathian hngal lo hna biaceihnak

5 1Cu tikah miding cu amah a rak hrem i a fahnak kha zei hmanh ah a rak rel lo mi hna kha hmaitonh in chalh awkah ral ṭha in a dir lai. 2 Cun an hmuh tikah ṭihphannak he khat in ruah lo pi in khamh a rak si ning kha an khuaruah a har lai. 3An hmaisen in hrum bu le thaw pit in pakhat le pakhat kha: 4 "Kan rak hruh ning hi, hihi kan rak nihsawh, capo ah kan rak saih tawn mi a si! A nunnak cu hruhnak le a donghnak cu upat awk a um lo mi kan rak ruah. 5 Zei tin dah Pathian fa ah aa chuah i mithiang hna lak ah umnak a hmuh ve ning? 6 A fiang mi cu biatak lam in kan rak pial i kan ca ah dinnak khuaceu a rak tlaang lo, kan ca ah ni a rak chuak lo. 7 Kan rak zawh lo mi phung ning lo le rawhnak lam a um lo, thetse ram zong kan cul i a keneh kan rak hmu lo nain kan rak hngalh bal lo mi cu Bawipa lam hi a si. 8Puarthaunak nih zei ṭhatnak dah a rak kan pek?  Kan rumnak le kan i porhlawtnak vialte hi zei sullam dah a rak ngeih?

9 Kha thil vialte cu thladem bang an ṭian i biavakvai bang an lo cang. 10 Tiletpi a tan mi tilawng bang - a kalnak nehnang zei hmanh a kaltak lo. 11Asilole, a tanpahnak tehte a kaltak lo mi thli lak a zuang mi vate bantuk a si; a thla nih thli cu a zah i a cheu hna, cun khulrang in a zuang thluahmah nain a zuannak lam cu hmuh khawh a si lo. 12 Asilole, hmuichon ah kah mi thal bantuk a si, a pah mi thli cu rang tuk in an i khar ṭhan caah thal cu khua zei lam a zawh ti kha hngalh a si lo.

13Mah bantuk cu kan si ve: kan chuah tlawmpal ah kan lo ṭhan; ṭhatnak ti kan hmuhsak ding a pelte hmanh a um lo, ṭhat lonak ah kan caan kan rak dihter cang. 14Zei cah tiah pathian hngal lo hna i ruahchannak cu thli nih a kalpi mi favai bantuk, thlichia nih a choih mi hawhra bantuk a si. Meikhu bang thli ah an lo, nikhat khual bang philh zau a si.

Miding hna donghnak sunglawi le pathian hngal lo hna dantatnak

15 Sihmanhsehlaw miding hna cu zungzal in an nung; an ṭuanman cu Bawipa sin ah a um; cun Cungnung bik nih a zohkhenh hna. 16 Cucaah sunparnak luchin le pangparkual cu Bawipa sin in an hmuh lai; zei cah tiah, a orhlei kut tang ah a dorter hna lai i a baan in a huh hna lai.  

17A ralthuam ca ah nahchuahnak he a khat mi a dawtnak kha a hman lai i a ral hna daantat awkah ser mi hna kha hriam a pek hna lai; 18dinnak kha a ṭangbenh ah a hman lai, cun a biaceihnak dik cu a lukhuh ca ah a hman lai; 19 a hmun mi thiannak cu a phaw ca ah a hman lai i 20 ngaihthiamnak a ngei lo mi a thinhun in vainam cu a hui lai i chimh ngai lo hna doh awkah vawlei pumpaluk cu amah he a chuak ve lai. 21Ṭeklung hna cu timhcia chiahmi thal bang, mimtlau an lek tikah an zuang lai i an hmuitinh cu an khen lai; 22Cun chai nih thinhunnak he a khat mi rial an run thlak lai. Rili ti hna cu anmah doh ah an tho lai i tiva hna nih zaangfahnak ngei lo in an kulh hna lai, 23 thlichia cu anmah doh ah an tho lai i thlichia bang a vamh dih hna lai.  Cucaah ṭhat lonak nih vawlei pumpi cu a hrawh dih lai i ṭhat lonak tuahnak nih milianngan hna cu an bawi ṭhutdan in a ṭhumh hna lai.