SIRACH 46

Joshua

46 1 Nun fapa Moses, a profet sinak a changtu Joshua cu raltuk a ṭhawng ngai mi a si, a min he aa tlak hringhran, 2 thim mi miphun khamhtu milianngan a si, amah a doh mi a ral hna kha teirul a cham hna i Israel kha a roram ah a hruai.  3Khuapi hna kha vainam a thliarhnawh hna tikah zei tluk in dah ṭih a nun! 4Amah bantuk lung ṭhullo cu aho dah a um bal? Amah hrimhrim nih Bawipa ralkap hna cu a hruai hna. 5Ni cu a kut in a dirter i nikhat cu nihnih ah a chuah. 6Ral nih an kulh tikah Cungnung Bik kha a auh i Bawipa nih amah kha rial le ruahpi in a leh. Cu ral cu a tlakhnawh hna i Chukzuan lam ah khan a hrawh dih hna, cucu raltuk a thiamnak le Bawipa ca ah ral a tuk kha miphun hna hmuhsak hna awkah a si.

Kalep

7Moses chan ah khan amah cu Cungnung Bik Pathian i hnuzul ṭha a si, amah le Jefuneh fapa Kalep cu mibupi ralchanh in, an nunnak in mipi kha sualnak in an khamh hnanak le nawlngai lo hna i ceihcumnak kha an daihternak thawng in Pathian an ṭanhnak kha an langhter. 8Cucaah annih pahnih lawng hi ralram ah a kal mi ke-ralkap thongzaruk chung in him tein a luat mi an si i, cun annih kha cawhnuk le khuaihliti a luannak roram ah an luhpi hna. 9Kalep kha Pathian nih ṭ hawnnak a pek ve i a tar tiang a hmun, cuti cun tlangram hna cu a lak hna i a tefa hna kha ro ah a chiahtak hna, 10 cucu Israelmi nih Pathian hnu zulh cu a ṭha ti kha an hmuh khawh nakhnga caah a si.

Biaceihtu hna

11 Biaceihtu hna zong, Pathian auhnak an theih cio tikah an zapi tein zumhtlak in an nung zungzal, Bawipa kha an mertak bal lo, an min cu a sunglawi. An thlaan in an ruh hna cu tho ṭhan hna seh law, 12 hi minthang hna min cu an fale hna nih aa tlak tein i nunpi hram ko hna seh!

 Samuel

13 Samuel cu a Bawipa nih a dawtkhun mi, Bawipa profet a si; pennak a dirhtak i a mi hna uktu kha chiti thiang a thuhpiak hna. 14 Bawipa Phungbia in tonpumhnak kha bia a ceih hna i Bawipa nih Jacob cu a kilven. 15A dinfelnak thawng in profet ah cohlan a si i a bia thawng in zumhtlak profet a sinak kha a langhter. 16 Ral nih a kenkip in an dum tikah 19hnuktlai tuufa kha thawinak ah pechan in Cungnung bik Bawipa sin ah a au. 17 Cu tikah Bawipa nih van in khuari a thlah i, 20khuadawm tompi chung in a aw cu aa theihter; 18a ral hruaitu hna le Filistin mi uktu hna cu a nawn dih hna. 19 Zungzal in aa dinh hlan ah Bawipa le chiti Thuh mi kha tette a khaan hna. ‘Chawvalei ti ahcun phanat tuahkhat hmanh mi ka chut bal hna lo.’ Cun aho hmanh nih sual an puh bal lo.  20 Cun a thih hnu zong, profet bia kha a chim rih, siangpahrang kha a caan a dongh lainak ralrinnak a pek; vawlei khor chung in a mi hna ṭhat lonak kha hloh awkah profet bia a chim rih.