Judit 4

Judaea cu timhcia in a um

4   1Judaea ram chung i a um mi Israelmi hna nih nih Assiria siangpahrang Nebukhadnezar ralbawi ngan bik Holoferni nih, zei tin dah miphun dangdang hna kha a tuahto hna: an biakinn cu a thluk i a hrawh dih hna ti kha an theih tikah ,  2an lau tuk i Jerusalem le Bawipa an Pathian Biakinn ca ah thinphang in an ther ko cang. 3 Saltannak in an kir a rau rih lo i Judaeami hna khua an sak ṭhannak le rak buar mi thianghlim thil, biakṭheng le Biakinn hna an sak ṭhannak cu naite lawng a si rih.

4 Cucaah Samaria,  Kona, Beth-Horon, Belmain, Jeriko, Khoba, Aesora le Salem nelrawn hna kha an hlauh hna. 5 Tlang sangsang par hna ah hmunhma an lak hna, cuka i khuate hna cu ralhau in an kulh hna; thlairawl an cut cang bang in a ra lai mi raltuknak ca ah rawl an khon. 56Dothan nelrawnleikap, Esdraelonlei a hoi mi khua pahnih a si mi Bethulia le Bethomes-thaim i a um mi hna sin ah khan mah caan lio Jerusalem ah a um mi tlangbawi ngan Joakim nih ca a kuat hna. 7 Amah nih,’Judea cu tlanglam lawng in luh khawh a si bang in, tlanglam hna khar dih ding in nawl a pek hna, pahnih cung tlar in luhchuahṭi khawh lo ding in kan khar tikah a rak ra mi ral hna cu kan kham khawh hna lai, ,’ tiah a ti hna. 7 8 Israel mi hna nih cun tlangbawi ngan Joakim le Jerusalem i tonnak a ngei lio mi mipi upa khawngsil hna i nawlpeknak cu tlamtling tein an tuah hna.

Thlacam in a um mi ram

9Israelmi vialte cu Pathian sin ah lungtak tein an au i amah hmai ah toidornak he an kun.  10Anmah cu an nupile, an fale, an saṭil hna, an sin i ramdangmi hna, aa hlawhfami le sal ti lo, an tai ah buri an i menh dih. 11  Jerusalem i a um mi Israelmi dihlak cu an nupi le an fale hna telh in, Biakinn hmai ah an bawk, cun an lu ah vutcam i phulh in Bawipa hmai ah an kut an hler hna. 12Annih cu biakṭheng hrim kha buri in an men, cun an fale hna cu ral nih sal ah an kalpi hna nakhnga lo, an nupi hna cu hranchaw ah an i phawt hna nakhnga lo, an ro khuapi hna cu ral nih an hrawh hna nakhnga lo le an Biakinn cu ramdangmi lungawinak ah buar le thurter an si nakhnga lo hmunkhat tein thla an cam i Israel Pathian cu biaktak tein an nawl.  13Bawipa nih a theihpiak hna i an lungretheihnak cu dawtnak he a zoh ko hna.

Judaea ram chung i mi vialte cu Jerusalem mi hna bantuk in cungnung bik Bawipa hmunthiang hmai ah khan ni tampi chung rawl an ulh. 14Tlangbawi ngan Joakim le Bawipa hmai ah a dir mi Bawipa tlangbawi hna le upa hna nih cun an tai ah buri puan i menhbu in cat lo khangh thawinak, biakam thawinak le lungthawh thawinak kha an pekchanh hna. 15An luban cung i vutcam hna he Israel Chung kha dawtnak he zohkhenh awk ah  Bawipa sin ah biatak tein au.