Fimnak 9

Fimnak ca Solomon thlacamnak

9 1‘Zaangfah thiam mi Bawipa, kan pipu hna Pathian, na bia in zei zongte na ser cang hna, 2 cun na fimnak in minung phun kha na sersiam cang hna, cucu na rak ser mi hna kha uk awk, 3 leicung kha thiannak le khamh-dinnak he uk awk le lungthin thiannak he a dik mi biaceihnak tuah awkah a si. 4 Na bawi ṭhutdan hawi Fimnak cu ka pe hraam ko, cun na fale sin in ka hnawt hlah. 5Zei cah tiah keimah cu na salpa, na salnu i fapa, caan tlawmpal lawng a nung ding mi miderthawm, dinnak le na phunglam zei hmanh a hngal lo mi ka si. 6Biangaite, mi fapa hna lak ah hin a tling mi pakhat um sual seh law nangmah sin in a ra mi Fimnak kha a ngeih lo ahcun zei san hmanh a tlai lai lo.

7 ‘Kei cu na miphun hna siangpahrang, na fapa le na fanu hna biaceihtu ah na ka thim cang.  8 Biakinn cu na tlang thiang ah, na biakṭheng cu na Thlam, a hramthawk in na rak timh mi Thlam thiang muisam cu na rak dirhnak khualipi i sak awkah na rak ka sawm cang; 9Nangmah he cun na rian vialte a hngal mi Fimnak a um, leicung na rak ser ah khan a rak um ve; zei dah na mit he aa rem ti le zei  dah na nawlbia ning a si ti mi kha a hngalh.  10Amah cu na van thiang, na sunparnak bawi ṭhutdan in run thlah ko, cuti cun keimah kha a bawmh lai i keimah he a ṭuan lai i na lung an tluanh mi kha a ka chimh lai, 11 zei tin tiah amah nih cun zei zongte kha a hngalh i a theih, ka cawlcanghnak ah fim ngai in a ka hruai lai i a sunparnak in a ka huhphenh lai. 12Cu tikah ka tuah mi vialte hna cu cohlan tlak an si lai; na mi cu a dik ning in ka uk hna lai i ka pa ṭhutdan he aa tlak mi ka si lai.

13‘Zei bantuk minung phun nih dah Pathian ruahnak cu a hngalh khawh lai? Cun aho nih dah Bawipa duhnak cu a pemh khawh lai? 14 Zei cah tiah mihring ruahnak cu a tling lo, kan ruahnak cu a hmun lo; 15zei cah tiah a rawk kho mi pumsa nih thlarau cu a nenh, cun hi tlakthlam nih lungthin cu lung retheihnak tampi he a tlukpi. 16Vawleicung thil hna hi har ngai in kan chim khawh hna, vawlei tangdanh hna phak awkah har ngai in kan ṭuan; cu tikah aho nih dah vancung thil hna cu a hmuh khawh lai? 17Cun Fimnak nih na pek lo ah na thlarau thiang cu cunglei in na thlah lo ah aho nih dah na duhnak cu a hngalh bal?  18Cucaah Fimnak nih vawlei i a um mi hna an lam cu a dinter, na lung an tluanh mi thil kha mi cu a chimh hna i khamhnak an si.