SIRACH 50

Tlangbawi ngan Simon

50    1A chan ah Biakinn a remh mi le hmunthiang kha a kulh mi cu Onias fapa Tlangbawi Ngan Simon a si. 2A hramdomh kha lethnih thuk in a cawh i Temple varanda ca zong a remhchih. 3A chan ah rili tluk a kau mi tikhor pakhat a cawh. 4 A mi hna kha rawhralnak in khamh a duh tuk hna caah hmunthiang cu ralhruang in a kulh. 5 Biakinn puanzar hnu in a hung chuak i mipi nih a buk lulh tikah zei tluk in dah a sunlawi. 6Amah cu minmei chung i deirel arfi le thlapa lai bantuk,  7Cungnung Bik Biakinn cung in a hung chuak mi nika le 8minmei ceu nih a kah mi chuncha bantuk, fur tlakka lily par le ṭhal caan i rimhmui kung nge bantuk, 9zihmui kheng cung rimhmui le mei bantuk, 10lung mansung phuntling in ṭamh mi thianghlim thil hna bantuk, 10 thei he a khat mi Olive kung bantuk, van tiang a phan mi saipras kung bantuk a si, 11 a puai hnipuan kha aa lak i a hlawnthil hna kha aa thuamh hna tik le 12biakṭheng thiang ah a va kai tikah hmunthiang pawngkam vialte cu amah a rumra in a ceu;  13Tlangbawi hna sin in a covo kha a cohlan i biakṭheng lai i a dir tikah a unau hna nih sunglawi ngai in an kulh, a hnahbor he a khat mi Lebanon sidar bantuk, 14 kuhchuk kung lai a dir mi bantuk a si. 13 Aaron fale hna cu Bawipa pek ding a hlu i put in rem ngai in an i tlar lio ah Israel mipi pumhnak hmaika ah a dir i, 15 biakṭheng cung raithawinak kha a tlinter, Cungnung Bik Bawipa sin pekchanhnak kha sunglawi ngai in a pekchanh tikah aa dawh hringhran. 16 a kut in hrai cu a vun banh i mitsur thlet thawinak kha a pekchanh, biakṭheng hram ah a thlet; siangpahrang hna i siangpahrang, Cungnung Bik lung a tluanh mi rihmui a si, 16cu tikah Aaron fale hna cu an au i an thir muko cu an tum hna Cungnung Bik hmaika an um theihternak ca ah aw thangpi in an au;  17cun hmakhatte ah mipi cu Zei  zong tuah kho, Cungnung Bik Bawipa hmai ah an bawk i an biak,  18  cun hlasatu hna cu an thangṭhatnak hla an hlawi tikah an aw hna cu ngaih a nuam hringhran ko, 19 cun mipi cu thawinak a dih hlan lo, puai a dongh hlan lo, Cungnung Bik Bawipa sin ah nawlnak an tuah i zangfah thiam Bawipa sin ah thla an cam. 20Cun amah lawng nih a min auhnak nawl a ngeih caah a rung ṭum lai i aa pum mi Israel mipi kha a kut thlir in thluachuahnak a pek hna; 21cun mipi cu Cungnung Bik thluachuahnak cohlan awkah an an lu an kun.

Forhfialnak

22Cun atu zeizong vialte Pathian, khuazakip ah thil lianhngannak a tuahtu cu thangṭhat tuah u, amah nih kan chan cu kan nu pawchung in a cawisan i zaangfahnak he kan cung ah thil a tuah cang.  23Kan lung nuamhter seh law Israel ah hin atu kan chan le zungzal in daihnak kan pe ko seh. 24 A fek mi a dawtnak he kan zoh seh law kan chan ah hin kan tlanh ko seh.

Phungthlukbia a phunphun

25Ka nunnak nih a fih mi miphun pahnih a um, a pathumnak cu miphun hrimhrim a si lo: 26 cucu Seir Tlang ah khua a sa mi hna, Filistinemi hna le Shechem i a um mi mihrut hna an si.

Donghnak

27 Hi cauk i ṭial mi hna hi Jerusalem i Sira Eleazar fapa Jesuh i fimnak le hngalhnak in cawnpiaknak hna an si, amah nih a lung chung i fimnak cu ruah bang a surter. 28Hi bia hna kha caan lak in a rel mi le aa cinken i fimnak ah a ṭhang mi hna cu thluachuak mi an si.  29A zulh hna ahcun amah cu a ṭhawng lai i zei zongte ca ah timhcia a si lai, zei tin tiah Bawipa ceunak cu a lam a si.