Tobit 6

Tobit 6:1-17

VI: NGAPI

 1 Cun a mitthli aa hnawh. 2 Pate cu Vancungmi he khan a chuak, cun an uico nih a zulh hna. Pahnih hna cu an kal thluahmah, cun a nikhatnak zanlei a hung phak tikah Tigris tiva kam ah an riak. 3 Ngakchiapa cu a ke ṭawl ding in tiva ah a va ṭum, cu tikah nga pakhat cu a hung chuak i a ke kha dolh hnik a zalh. Ngakchiapa cu a ai, 4 vancungmi nih, ‘Kha nga kha tlai, thlah hlah,’ tiah a ti. Ngakchiapa nih khan nga cu a tlaih i tiva kam ah a hnuh. 5 Vancungmi nih khan, ‘A paw kha hlai, a hnit, a lung le a thin kha chuah hna; cun adang tein chia hna, a chungril hna cu hlonh dih hna, zei cah tiah a hnit, a lung le a thin nih mi an damter khawh,’ tiah a ti. 6 Ngakchiapa nih cu nga cu a hlai i a hnit le a lung le a thin hna cu a chuah hna. Ngasa a cheu cu a em i a cheu cu a car hna. 7 Cun Media ram an phanh deng tiang an kal ṭhan.

Cun Ngakchiapa nih Vancungmi cu hi biahalnak hi a tuah, ‘Unau Azarias, ngahnit, a lung le a thin nih hin zei dah an damter khawh? Tiah a ti. 8 Amah nih,’ Nga i a lung le a thin kha na khangh hna lai, cun a khu cu khuachia le khuahrum nih a tuah mi hna ca ah hman a si; cu bantuk zawtnak poh cu an lo, an keneh hmanh hmuh khawh an si ti lo. 9 A hnit tu cu mit phokphawher a ngei mi hna ca ah sii a si, na thuh hnu ah a bo te cu na chem lai i a dam colh ko lai,’ tiah a chimh.

10 Media ram an va lut i Ecbatana an phan dengmang cang, 11 cu lio ah Raphael nih ngakchiapa cu, ‘Unau Tobias,’ tiah a ti i anih nih, ‘Hawilaw,’ tiah a leh. Vancungmi nih, ‘Tuzaan cu na chungkhat Raguel inn ah kan i ṭhum lai; Sarah an ti mi fanu pakhat a ngei; 12 sihmanhselaw Sarah leng in fanu zong fapa zong a ngei ti lo. Atu nangmah cu amah he aa naihniam bik mi chungkhat na si; nangmah covo a si i a pa ro na co khawh lai. Amah cu khua a ruat kho mi, a ral a ṭha i duh a nung ngai mi a si, cun a pa nih a dawt tuk. 13Amah a ṭhi ding mi na si. Unau, ngai hmanh; tuzanlei hrimhrim ah nute kong ah a pa ka chimh lai i nan i umhnak ding khua kan khaan lai, cun Rhages in kan rak kir tikah ṭhitumhnak puai cu kan tuah te lai. Ka zum tuah, Raguel nih nangmah kha cohlan lo in midang pakhatkhat sin ah peknak nawl a ngei lo. A fanu a ṭhi ding cu a pakhatnak ah nangmah na si ti kha a hngalh bu in, cuti a tuah a si ahcun, Moses phungbia ah aa ṭial bang in, thihdan a hauh a si lai. Cucaah unaupa, ngai ko. Tuzanlei hrimhrim ah nute kong cu kan chim lai i na kutsih ding in kan hal lai. Rhages khua in kan kir tikah kan rak lakpah lai i inn ah kan i tlunpi lai,’ tiah a ti.

14 Tobias nih Vancungmi cu, ‘Unau, Azarias, amah cu ṭhitumhnak voisarih an tuahpiak cang i an i ṭhit-um zaan hrimhrim ah a tlangval hna cu an thi lengmang ti ka theih. An khaan an luh bak in an thi tawn; cun ka theih mi cu anmah a thattu cu khuachia a si an ti; 15 cun hihi ka phang ko. Khuachia nih amah cu a duh caah amah tu cu harnak a pe lo, sihmanhsehlaw pa nih amah vun naih aa zuam ah khin a thah tiah ka theih.  Kei cu ka pa i fapa-ngeihchunte ka si, cun ka thi duh rih lo. Ka nu le ka pa nih an chan chung ka zun an ngaih lai cu ka duh lo; anmah a vuitu ding fapa dang an ngei ti lo,’ tiah a leh. 16 Vancungmi nih, ‘Na pa nih ruahnak an pek mi cu na philh cang maw? Zei khom a si ah na pale hna chungkhar in nupi i thim ding an nawlchih kha. Unaupa, ngai tuah! Khuachia kong ah na thin phang hlah; ṭhi ko. Tuzanlei hrimhrim ah hin kan kamh, amah cu na nupi in pek na si hrimhrim lai. 17Cun, voikhat monu khaan nan luh bak in nga lung le thin kha la hna law tlawmpal cu rimhmui khanghnak cung ah chia hna. A khu a tho lai, khuachia nih a rim a hnimh lai i a zam lai, cun nute pawng ah naih ṭhan ding phan awk zei hmanh a um ti lai lo.  Cun nan ihṭi hlan ah nan pahnih in tho ulaw thla cam u. A veel le bawmhnak an pek hna nakhnga van Bawipa cu hal u. Ţih hlah, amah cu nangmah ca ah a hramthawk tein khaukhih mi a si, cun amah a khamhtu ding cu nangmah na si. Na hnu an zulh ko lai, cun bia kan kamh, unau bantuk in na cung ah a nung ding mi fale an hrinpiak hna lai. Phang hlah,’ tiah a ti. Cun Raphael nih hiti a chim kha Tobias nih a theih tikah, cun Sarah cu a paleikap in, a farnu a si ti kha a lung a fian tikah amah kha a duh tuk cang caah a lungthin kha ka lungthinkel a si kho ti lo.