2 Maccabaeus 7

Unau pasarih hna martyr in thihnak

7 Zei tin dah a si rih ti ahcun unau pasarih hna cu an nu he an tlaih hna. Siangpahrang nih annih kha fungfek he hremnak Phungbia nih a thlauh mi voksa kha eiter hna awk ah aa zuam. 2An zapi aiawh in pakhat nih, “"Kanmah sin in zei thil dah hmuh na duh? Kannih cu kan pupa hna phungbia buar nakin cun thih ding timhcia kan si ko," tiah a leh. 3Siangpahrang cu a thinhun in uhkang kha mei cung ah a linhter hna. 4Uhkang an hung sen bak ah khan bia a chimtu pa kha a lei chuah i a lucuar hawh awkah nawl a pek hna, mithattu hna nih a unau le a nu nih an cuanh hna lio ah a lu cu an tan. 5A thaw a chuah ko nain zei hmanh a tuah kho ti lo, cu lio ah  siangpahrang nih amah kha mei pawng ah rak chuahpi i a nun bu in uhkang in reu awkah nawl a pek hna. 6Uhkang chung in meikhu cu a zaam luaimai tikah a nu le adang a unau hna cu sunglawi ngai in thih awkah hiti hin pakhat le pakhat kha, “Moses nih a hla ah fiang tein, ‘Bawipa nih a salle hna cu a zaangfah hna lai,’ ti a thanh bang in, a kan zoh lai i kan ca ah a ngaih a chia hrimhrim ko lai,” ti in tha an i pe.  

7Pakhatnak pa nih hi vawlei cu hitin a kaltak tikah hrem awkah a pahnihnak cu an rak chuahpi.  A lu cung i a cuar le a sam kha an hawh dih hnu ah, “Na pum kan in can hlan ah voksa tlawmpal tal na ei lai lo maw?" ti in an hal. 8A pupa hna holh in, ‘Ei hlah,’ tiah a ti hna. Cucaah amah zong cu an hrem ve. 9A thaw hmanung bik a chuahpah in, “Ziachia sahrang hna, hi vawlei kan nunnak cu nan lak khawh ko lai, sihmanhsehlaw a phungbia ca ah kan thi bang in kannih cu vawleicung Siangpahrang nih zungzal nun awkah a kan thawhter ko lai,” tiah a ti hna.

10Amah hnu ah a pathumnak pa cu an hrem, an chimh bang in a lei cu a chak zau i a kut zong kha a samh, cun ralṭha ngai in, 11 “Vancung nih hi kut le ke hna cu a ka pek, a phunglam tlaihchan in hi hna cu zei ah ka rel hna lo; amah sin in ka hmuh ṭhan ko lai ti kaa ruahchan ko,” tiah a ti hna. 12Siangpahrang le a hnuzul hna cu ngakchiapa i ralṭhatnak le hremnak zei a rel lo zia kha an hmuh tikah an khuaruah a har ko.

13Mahpa a thih tikah a palinak pa kha cu bantuk in hrem hram an thawk ve. 14A thih deng tikah amah nih, “Pathian nih a biakam bang in a kan thawhter ṭhan lai ti ruahchannak he minung kut in thih ding kan i thim hi ṭ ha deuh mi thimnak a si; cu lio ah nannih cu nunnak thar ah thawh ṭhannak a um ti lai lo,” tiah a ti hna.

15Cun a panganak cu an rak chuahpi i hrem hram an thawk. 16Sihmanhsehlaw amah cu siangpahrang kha dengteo in a zoh i amah kha, “Nangmah cu nangmah bantuk mihring cungah nawl na ngei i na duh bang na tuah khawh.  Sihmanhsehlaw Pathian nih kan miphun a hnon cang ti in ruat hlah.  17Ngang ko law a ṭhawnnak nih nangmah le na tefa hna zong an hrem ve hna kha na hmuh te lai,” tiah a ti. 

18Amah hnu ah a paruknak cu an hun hruai i a thih lai a bia cu: “Palhnak ka tuah cang ca ah hitin kan temtuar mi a si, kan Pathian cung kan sual cang caah; ṭhat lonak nih a kan tlunh mi a si ti i hleng hlah u– 19nanmah zong Pathian ral thawh hnawh nan i timhnak cung i daantatnak in kan luat lai ti i ruat hlah u,” tiah a ti hna.

20An nu cu khuaruahhar ngai le upatnak he ruahnolh ding hrimhrim a si, zei cah tiah Bawipa cung i aa ruahchannak thawng in a fapale pasarih hna cu nikhat hrimhrim i an thih kha a zoh hna i ralṭha ngai in a in. 21Ruahnak sunglawi he khat in a fale hna kha nu a si nain pa bang ral ṭha ngai in hiti hin pupa hna holh in thazaang a pek hna, 22"Zei tin dah ka paw chung in nan rak man ti ka hngal lo; thaw le nunnak an petu hna cu keimah ka si lo; cun nan pum le nan kutke hna zong kan sersiam hna lo. 23Cun zeizong vialte a ser i zeizongte aa thawknak a si mi nih Leicung Sertu  nih a phungbia caah nan nunnak nan pek sian caah thaw le nunnak cu an pek ṭhan te hna lai,” tiah a ti hna.

24Antiochus nih cun an nu aw ah khan serhsatnak aa tel rua ti zumh in an ka sersat rua tiah aa ruah; cucaah a nun rih lio ah khan ngakchia bik pate cu bia men lawng si lo in a pupa hna phunglam kha a hlawt a si ahcun amah kha rumnak le lawmhnak kan pek lai, ka Hawi ah kan ser lai i zungrian kan pek lai ti biakamnak he a lem. 25Cucu ngakchiapa nih zei hmanh a rel lo tikah ngakchiapa cu a nunnak i khamh ding nawl awkah a nu kha bawmhnak a hal.  26A nawlchih lengmang caah a nu zong nih a fapa cu lemchih awkah a hna a tla ve. A fapa cu a kun hnawh i pupa hna holh in miziachiapa nawlnak cu a lettalam in a mer: 27 “Ka fapa, ka zaangfah ko, ka paw chungah thla kua kan pawi i kumthum chung hnuk kan dinh, atu hi kum le hi tia na si tiang ah hin kan cawm kan hlawm i zei poh kan pek.  28Ka fa, kan nawl hram ko, vawlei le van le a chung-um vialte hna hi zoh hna, cun Pathian nih annih cu zei tin  dah a rak um lo mi in a umter hna ti cu ruat hna, minung zong cun bantuk cun an hung um ve. 29Hi mithattu pa hi ṭih hlah; na ule hna nau si naa tlaknak cu langhter law thihnak cu cohlang ve ko; cuti cun anmah he zaangfahnak ni ah kan cohlan khawh ve lai,” tiah a ti.

30A nu biachim a dih maw dih lo ah khin ngakchiapa nih, “Zei dah na hngah? Siangpahrang bia ka ngai lai lo; Moses sin in kan pupa hna sin ah a pek mi Phungbia cawnpiaknak kha ka ngai. 31Nannih tu cu Hebrew mi hna ca ah thil ṭha lo vialte nan tuah cang, Pathian kut in nan luat hrimhrim lai lo. 32Kannih cu kan sualnak ruang ah kan in, 33cun kannih kha daantat in chimhhrin awkah Bawipa cu caan tawite kanmah cung ah a thin a hun hmanh ah tlawmpal ahcun kanmah he remnak a ser ṭhan ko lai. 34Sihmanhsehlaw nannih michiahru le miding lo bik hna, pokpalawng ruahchannak ngei in a salle hna cung ah nan kut nan thlir ngam cu zei nih dah an porhlawtter hna? – 35zei cah tiah zeizong vialte a hmutu, zeizong tuah kho Pathian biaceihnak in nan luat rih ṭung lo. 36Kan unau hna cu cat lo in a luang mi nunnak ca le Pathian thisen biakamnak ca  ah an thi cang, cu lio ah nannih cu Pathian biaceihnak nih nan puarthaunak caah a ding mi daantatnak an pek hna lai. 37Keimah zong ka ule hna bang in kan pupa hna phunglam ca ah ka pum le ka nunnak cu ka pek ve i Pathian nih kan miphun cu rau lo in a zaangfah hna lai caah nawlnak ka tuah, cun hneksaknak le hremnak in amah lawng hi Pathian a si kha kan hmuhsak hna lai, 38cuti cun kan miphun cung i a tlunter mi a thinhunnak cu a donghter zau lai,” tiah a ti hna.

 39Siangpahrang cu a thin a hung i amah cu adang hna nakin fak deuh in a hrem, zei  cah tiah ngakchiapa i zomhtaihnak cu a ing kho hrimhrim lo. 40Cuti cun, a hniangbik pa cu Pathian bochannak tling he thianghlim tein a thi. 41An nu cu a hmanungbik ah a fapale hna hnu ah a thi ve.

42Sihmanhsehlaw raithawinak rawl le hremnak ngan hna kong ṭialnak cu hi vial in za rih seh.