Judit 6

Akhor kha Israel mi hna sin ah an chanh

6 1 Khawngsil velchum i mibupi aukhuan thawng a daih tikah Assiria ralkapbu bawi bik Holoferni nih Akhar cu ramdangmi hna le Ammonmi hna hmai ah khan a hro i amah kha, 2“Akhar, nangmah cu aho ah dah naa ruah? Nangmah le hlanchom Efraim ralkap hna nih nihin ah atu bantuk in kan sin ah profet naa cang i Israel mi hna tuk lo awkah nan kan lem tih?  An Pathian nih a khamh hna lai tiah na aupi. Cun Nebukhadnezar a si lo ah aho dah Pathian a si ti? Amah hrimhrim nih a ṭhawnnak a langhter lai, annih kha vawlei cung in a hnawh dih hna lai i an Pathian nih a khamh hrimhrim hna lai lo. 3Sihmanhselaw kannih a salle hna nih annih cu mi pakhat bang fawi tuk in kan hrawh hna lai. Kan rang ralkap ṭhawnnak cu an derh kho bal lai lo. 4 Kan khangh dih hna lai. An tlang hna cu thisen in an ri lai i an nelrawn hna cu mithi ruak in an khat lai. Kanmah doh khawh kha chim lo, pakhat hmanh tang lo in an thi dih lai,’ tiah vawlei pumpaluk i siangpahrang, Nebukhadnezar Siangpahrang nih a chim. Amah nih a chim cang i a bia cu pakpalawng a cang bal lo. 5 Akhar, Ammonmi hlanchom ralkap, nangmah ca tu ah cun ruah lo tuk in hi bia hna na chim cang caah hi Izip ram in a ra mi hna kha teirul ka cham hna hlan cu ka hmai na ka hmu ti lai lo. 6Cu tikah cun ka ralkap hna vainam le ka zungbawi hna i fei nih na hnak cu tleng lak in an vih te lai. Israel kha kaa merhnawh ni ah cun nangmah zong hliam a pu mi lak ah na tlu ve te lai. 7Atu ka salle hna nih tlangram ah cun an in kalpi lai i kha tlangtannak i a um mi khua pakhatkhat ah an in kaltak lai; 8 an rawhnak naa hrawm hlan lo na thi lai lo.  9Annih cu tlaih an tong bal lai lo ti mi ruahnak na ngeih ahcun ngaihchiat tuk a hau lo! Ka chim cia bang in ka bia cu pakhat hmanh a lak in a si lai lo,” tiah a ti.

10Holoferni nih khan a riahbuk cawngtu cu Akhar cu tlaih, Bethulia khua ah kalpi i amah cu Israelmi hna sin ah chanh ding nawl a rak pek cang hna caah 11anmah nih amah cu a tlaih, riahbuk in a chuahpi i nelrawn kha a tanpi, cun tlangram ah a kaipi i Bethulia khuataw tivate kha an phan. 12Khuami nih an hmuh hna cangka in an hriam an i lak, khua in an chuak i tlangparlei ah an kai, cu lio ah lungcheptu hna nih an rak kai khawh lo ding in lung in an cheh hna. 13Sihmanselaw tlangpang hram ah khan an i thup, Akhar cu khaka ah khan an hrentak i an bawipa sin ah an kirṭhan.

14 Israelmi hna cu an khua khan an rung ṭum, a pawng ah an dir i a hri kha an phoihpiak, Bethulia ah  an hruai, cun khuapi upa luban hna hmai ah an chuahpi. 15Cu lio can i upa luban hna cu: Simeon phun Mikah fapa Uzziah, Kothoniel fapa Khabri le Melkhiel fapa Kharmi hna kha an si. 16 Hi hna nih hin khua upa dihlak kha an auh hna. Mino le nu hna zong khawnsil zung ah an ra ve. Mipi laifang ah khan Akhar cu an dirter i Uzziah nih thil si ning kong kha a hal. 17Amah nih, Holoferni khawnsil ah chim mi bia vialte, cun amah nih Assiria hruaitu hna hmaika ah a chim mi bia vialte le zei tin dah Holoferni nih Israel Chung tuk awkah aa timhlamh ti mi vialte kha a chimh dih hna. 18Cu tikah mi cu an dihlak in vawlei ah an bawk i Pathian cu an biak. 19 Annih nih,“ Maw vancung Bawipa Pathian, an puarthaunak cu run zoh law kan miphun toidornak cu run zaangfah hram ko. Nihin ah nangmah sin a pum aa pe mi hna cu run zoh ko hna,’ tiah an au. 20 Cu hnu ah Akhor cu ṭha tein an biakchawnh i an thangṭhat. 21 Meeting a dih tikah Uzziah nih a inn ah a hruai i khua upa hna kha zanriah a dangh hna; cu zan ah cun zankhuadei Israel Pathian sin ah bawmh hal in an au.