SIRACH 26

26 Nupi ṭha em-em i va cu zei tluk thluachuak dah a si, a chan a let in a sau lai. 2Nupi tling cu a va ca ah lawmhnak a si, a nun chung vialte hnangam tein a um lai. 3Nupi ṭha cu Pathian a ṭih mi hna ca ah chiahpiak mi covo ṭha bik a si; 4an rum zong an si a fah zong ah a lung a tluang lai i a mithmai a panh zungzal lai.

5Ka ṭih ngai mi thil pathum a um i a palinak nih a ka lauter, cucu: khuapi le mipi pumhnak nih thangchiat, cun a si lo pi in sual puh - hi hna cu thihnak nakin an fak deuh; 6sihmanhsehlaw nu pakhat nih adang nu kha a nahchuah tikah lungkuainak le ngaihchiatnak lawngte a si, cun hi vialte cu hmurka fungfek a si. 7 Nupi chia cu ṭhaṭhi in bunh lo mi caw-taphu he aa lo; amah tlaih cu tlangngaikuang tlaih he aa khat. 8 Zuding nupi nih mikip kha an thin a hunter hna, a zohchiatnak kha a thup kho lo.

 9 A duh in khua a sa mi nu cu a mit-au nih a langhter, a mitṭheh zoh in lung awṭawm awk a um lo. 10 A lung a khawng mi fanu cu fak pi in hrem, na thlahdorh ahcun na lu cung ah a kai lai. 11 Ningzah a hngal lo mi a mit kha dengteo in zohchih, na hmai an chiatter ahcun na khuaruah har hlah seh. 12 Dangcar khualtlawng bang a kaa a aan lai i a hmuh mi ti poh a din ko lai; Thlaam tung hram ah ṭhu in a likuk cu thalkip ca ah timhcia in a chiah ko.

 13 Nupi pakhat i tungtai ṭhatnak nih a va cu a lawmhter, hngalhnak nih amah kha a ṭhawnter. 14A dai mi nupi cu Bawipa sin in laksawng a si, ziaza ṭha nu cu a man tuak khawh a si lo. 15 Nun a thiam mi nupi cu a lethnih vanṭhat a si, a thiang mi ziaza cu a man khiah khawh a si lo. 16 Bawipa tlang i a chuak mi nika bang a thiang ngai mi inn chung i nupi dawh cu a si ve. 17 A thiang mi mei-tung cung i a ceu mi mei bang a tungtai a ṭha i aa dawh mi nu cu a si ve. 18 Ngunphah mi cung i bunh mi sui lungtung bang kepha dawh cung i tanpor cu a si ve.

Lung a rawk mi thil hna

28 Ka ngaih a ka chiatter mi thil pahnih an um i a pathumnak nih ka thin a ka phawh: sifahnak ruang ah a lak in chiah mi paral ṭha, zei rel lo mi mithluak ṭha, ṭhatnak in sualnak ah aa mer mi mizeimaw – cu bantuk mi cu Bawipa nih thihchia in thi ding ah aa cinken hna.

Chawlehthal

29 Chawzuar hna ca ah palhnak hrial cu a har ngai i chawletthal hna ca ah sualnak tuah lo ding cu a har ngai ve.

19 Ka fa, na mino sinak kha ṭha tein zohkhenh. Na thazaang cu khual hna kha va pe hna hlah. 20 Nelrawn pakhat ah khan vawlei ṭhatnak dum pakhat vaa kawl. Mahka hmun ah khan thlaici cu ruahchannak nganpi he va vorh. 21 Hiti hin na tefa hna cu an ṭhangcho lai. Annih cu an chungkhar cung bochannak he an ṭhang lai. 22 Hlawhhlang nu cu cil bantuk in na hmuh lai. Mi nupi cu a dawt mi a va ca ah thihnak innsang bantuk in na hmuh lai. 23 Phunglam a ngei lo mi nih pathian a hngal lo mi nupi kha a covo a si. Bawipa a ṭih mi cu phunglam a zul mi nu kha a ṭhit lai. 24 Ningzahnak a ngei lo mi nu cu fihnung thil kha a tuah tawn. Sihmanhsehlaw a nun a nem mi phunbawi fanu cu a pasal hmai hmanh ah khan a ning a zak ko. 25 A duh aoh in a tlongleng mi nupi cu ui he an tahchunh tawn. Ningzahnak a ngei mi nu cu Bawipa kha a ṭihzah tawn. 26 A vapa a upat mi nupi cu mi nih mifim tiah an auh tawn. Sihmanhsehlaw amah cu a puarthau i a pasal kha a upat lo a si ahcun pathian hngal lo ah an chiah tawn.27 Nupi ṭha i pasal cu a lung aa lawm tawn. Zei ca ah tiah amah cu a nunkhua a sau lai. 28 A aw a hrang i a holh a tam mi nu cu raltuk thawh ding ah an tum mi muko he aa lo.