SIRACH 32

Rawl danghnak pipa

32     1Puai ah tolreltu an in siter bal maw? Na lung ah chiah hlah! Mipi lak i pakhat bang in um ko; an i nuamh nakding kawl law nangmah tein ṭhu ko. 2Na rian na dih hnu ah na ṭhutnak ah va kal,  cuti cun naa nuamhnak cu  anmah sin in a si lai i na thil tikhawhnak suiluchin cu na hmuh lai. 

3Upa deuh na si ahcun- bia na chim ding a si- chim ko, 5nain tuaktan law ringawn cu va hrawk hlah. 4Mi pakhat hla a sak ahcun vak len hlah, cun na mifimnak cu a caan lo pi ah va chuah hlah. 5Lung mansung cung amber tacik bang, zu he nuamhnak tuah cu a si ve.  6Sui hlawn cung eamerald tacik bang  zudin caan ringawn dawh cu a si ve.

7Nang, mino, na caan ahcun chim hrimhrim ve ko, asi nain a tambik voihnih lawng, cun  hal tik lawng ah chim. 8Na hmuitinh ah kalcolh law biafang tlawm tein tampi chim; na hngalh ko nain na chim duh lo caah a si ti kha langhter. 9Milianngan hna lak ah khan anmah he aa tluk mi bang i umter hlah; mi pakhat nih bia a chim lio ah a biapi lo mi ruahnak kha va pe hlah. 10Khua a rit hlan ah nimtlau a lek bang mithmaiṭha cu a tawkzawn a hngal mi hna kha hmai a sak hna. 11A caan a ṭhat lio ah tho, hnu ah i thlai hlah, cun rau lo in inn ah va ṭin colh.

12Cun vaa nuam, na tuah duh mi cu tuah ko, nain ruamkai bia chimnak in va sual hlah. 13Cun hi vialte ah a mit hmaiṭha in an ritter mi Sertu cu lawmhnak va pe.

Pathian ṭihnak

14Bawipa a ṭih mi poh nih a chimhhrinnak an cohlan; amah a kawl mi poh nih a mithmai ṭha an hmuh lai. 15Phungbia a zul mi poh cu a cawm hna lai, midepde hna ca ah amah cu an tluknak a si lai. 16Bawipa a ṭih mi poh nih a lung an ton lai i a ṭha mi an tuahsernak cu ni bang a ceu lai.

17Misual cu chimhhrinnak a duh lo, amah tein a lungkhawnnak kha aa silhnalh. 18Ruahnak a ngei mi nih ralrin peknak cu zei rel lo in a um bal lo; ramdangmi le miporhlaw hna cu ṭih mi zei hmanh an ngei lo.

19Ruah hmasa lo in cawlcang hlah, cun naa ngaihchih lai lo. 20 Lung ah naa chuihsual nakhnga lo lam harnak cu va pahchih hlah. 21 Lamphei hmanh ah i zum tuk hlah; 22 na fale hna kha i ralring hna. 23Na tuah mikip ah i ralring; hi zong hi nawlbia zulh phun pakhat a si ve.  

24Phungbia aa bochan mi poh nih a nawlbia hna cu an zulh, Bawipa aa bochan mi aho hmanh harnak an tong lai lo.