BARUCH 3

3 Maw zei zong tuah kho, Israel Bawipa Pathian, a ngan a fak, a re a thei mi lung nih atu na sin ah a au:  2Bawipa, rak ngai law kan zaangfah ko sawh, zei cah tiah na cung ah kan sual cang.  3Nang cu Bawi ṭhutdan cung ah zungzal na ṭhu, kannih cu zungzal in kan rawk cuahmah ko. 4 Zei zong tuah kho Israel Bawipa Pathian, Israel i mithi, na cung ah a rak sual i Bawipa an Pathian aw a rak ngai lo mi hna i fale hna thlacamnak hi rak ngai hram ko; zei cah tiah ngaihchiat nganfahnak nih a kan zelh cang. 5Kan pipu hna i tuahsernak ṭha lo si lo in na lianngannak le na min tu kha na lung ah camter ko. 6Bawipa, nangmah hi Bawipa kan Pathian taktak na si i nangmah cu kan in thangṭhat ko lai, 7zei tin tiah na min i bochannak tha pek awkah kan lung chung ah nangmah ṭihzahnak cu na rak khumh cang. Na cung i a rak sual mi kan pupa hna ṭhat lonak cu kan lung chung in kan hnawh cang caah sal kan tannak ram zong ah kan in thangṭhat duh ko. 8Zoh hmanh, nihin na kan ṭhekdarhnak ah zeimaw fihnung, chiatserh le dantat mi, ralzam dirhmun in kan um rih ko, cucu Bawipa an Pathian a rak kaltak mi kan pupa hna an rak ṭhat lo ruang ah a si.

II: FIMNAK, ISRAEL CA AH A HERH TUK MI

9Israel, nunnak a pe mi nawlbia hna cu ngai hna; hngalhnak cu zei a si ti kha hngal law cawng tuah. 10Zei ruang, Israel, zei ruang ah dah na ral hna ram ah na um, miram ah na tar chin lengmang ko, 11mithi hna in naa buar, Mithi khua ah a kal mi bang hmuh na si?  12Cucu fimnak hrampi na rak hlawt caah a si. 13Pathian lam in na rak vah a si ahcun hnangam tein na rak um ko lai.  14Khua zei ah dah hngalhnak, khuazei ah dah ṭhawnnak ti cu cawng tuah, lungfiannak cu khua zei ah dah a um, khua zei ah dah nunsaunak, khua zei ah dah nun khuasaunak, khua zei ah dah nunnak, khua zei ah dah mit a ceunak le daihnak a um ti cu cawng tuah.

15Sihmanhsehlaw aho nih dah a umnak cu a rak hmuh, aho dah a chawhlawn inn ah a rak lut cang? 16Atu miphun hruaitu hna le vawlei sahrang hna tiang a rak uk mi hna, 17van vate hna he lente a rak i celh mi hna, mi vialte nih an i hngatchan mi sui le ngun a rak khong mi hna, cun an chawva a dong kho lo mi hna, 18ngun kha ralring tein a rak thle mi –nain an rianṭuannak nehnang zei hmanh hmuh khawh lo mi hna cu khua zei ah dah an um dih?

19An lo dih cang, mithi khua ah an ṭum cang.  An hmun cu midang nih an rolh cang, 20chanthar deuh nih van khuaceu kha an hmuh cang i vawlei cu an khat cang,  sihmanhsehlaw hngalhnak lam cu an hmu rih lo, a keneh cu an hngal rih lo.  21An fale zong nih amah cu an hngal hrimhrim rih lo, a lam in an i hlat rih ko. 22Amah kong cu Kanaan ah zei hmanh theih a si rih lo, amah cu Teman ah hmuh a si rih lo; 23Hagar fale hna nih lei fimnak cu an kawl, Midian le Teman chawlet hna, tuanbia chimthiam hna le vawlei mifim aho hmanh nih fimnak lam cu an hmu rih lo i a kalnak lam cu an i chinchiah rih lo.

 24 Israel, Pathian inn cu zei tluk in dah a lianhngan, a pennak cu zei tluk in a kauh, 25tah khawh lo in a kau, a langh lo tiang a sang! 26A chung ah cun a hramthawk in a min a thang, a lianngan, a sang tuk hringhran i ramtuk thiam tak a chuak; 27Pathian thimnak cu hi hna cung  ah a tlung lo, hngalhnak lam a hmuhsak hna lo; 28fimnak an ngeih lo ruang ah an rawk, an hruhnak lila nih a hrawh hna.  29Amah kha khuadawm in run ṭumpi awkah aho dah van ah kai hnawh in amah cu a tlaih bal? 30Amah kha sui mansung in i thlen awk ah aho dah rilipi tan in amah cu a va hmu bal? 31Amah lam cu aho  hmanh nih an cawng kho lo, a zawh mi lam cu aho hmanh an lung a fiang kho lo.

 32 Sihmanhsehlaw zei zongte a hngal mi nih amah cu a hmuh, a thluak in a tlaih khawh cang, vawlei cu a fehter chin lengmang i keli-ngei sahrang hna in a khahter, 33Ceunak kha a thlah- cun a kal ko, a auh ṭhan- cun therbu in a ngaih; 34arfi cu an umnak hmun cio in lawm ngai an ceu; 35a auh hna tikah annih nih, “Hika ah kan um ko hih,” tiah an leh; 36 an sertu lawmhter awkah an tleu. Amah cu kan Pathian a si, amah he tahchunh awk aho hmanh an um lo. 37Amah nih hngalhnak lam cu a ningpi in a hmuh i a sal Jacob le a dawt mi Israel cu a hmuhsak hna; 38cu hnu lawng ah vawlei ah a rung lang i minung hna lak ah khua a sa.