SIRACH 20

Daite um le biachim

20 A caan asi lo mi ah mawhchiatnak a um, dai tein a um huar ko i amah cu mizer a si.. 2Sihmanhsehlaw buannara tawh nakin sik cu zei tluk in dah a ṭhat deuh. 3Ka palh a ti mi cu dantatnak in a luat. 4Dinnak kha hramhram in hnekchih a duh mi cu ngaknu kha a thiannak a lakpiak a duh mi tildit he aa lo. 5Dai tein a um caah mifim ah an ruah mi a um, adang cu a bia a tam caah huat a tong.  6Leh awk a hngalh lo caah dai tein a um mi an um, cu a cheu cu caanrem a bawh caah a dai. 7Mifim cu caan ṭha a hmuh hlan lo a dai lai, sihmanhsehlaw cu mihrut cu a palh peng ko lai. 8Tam tuk a chim mi le midang nawlngeihnak a chut mi hna cu huat an tong lai.

Thil khuaruahhar hna

9Vanchiatnak kha vanṭhatnak ah a hmu mi an um, cun vanṭhatnak cu sunghnak ah aa cang tawn. 10Na ca ah ṭhatnak a chuahpi lo ding laksawng, a let in na liam ding mi laksawng a um. 11Hmaichiatnak ah a hruai mi upatnak a um, a hngal ngai mi santlai lo an um. 12Tlawmte kha tampi in a caw, a letsarih in a pe mi an um. 13Mifim cu a bia in dawtnak a co, nain mihrut cu dawtnak kha a lak in a burh ko. 14Mihrut i laksawng cu zei hmanh a ṭhahnem lo, a letsarih hmuh ṭhan ding aa ruahchan.  

15Tlawmte a pe i tampi a volhpamh, a kaa cu khuapi tlang-autu bang a aan, nihin a cawih i thaizing a miak a hal, amah cu fih a nung. 16Mihrut nih, “Hawi ka ngei lo, ṭhatnak ka tuah zong ah lawmh ka tong lo; 17ka rawl a ka hrawm mi pawl hi hmurka ṭha lo an ngei,” a ti. Voi zeizat le zei tluk tam dah mi nih an nihsawh lai!

Aa tlak lo mi biachim

18Bia chim sual nakin vawlei ah tluk sual a ṭha deuh; hiti hin miṭha lo hna cu fawi tein an rawk tawn. 19Mi nunchia cu zumhtlak lo, zei hngal lo nih an chim zungzal mi tuanbia bantuk a si. 20Mihrut nih a chim  mi phungthlukbia cu cohlan a si lo, zei tin tiah a caan zoh a thiam lo.

21Sifahnak nih sual in a kham mi cheukhat an um, aa dinh tikah zei lungtuaitamnak hmanh nih hna a hnawh lo. 22A hmaan lo mi ningzahnak ruang ah rawhnak a tong mi an um, mihrut uahnak ruang ah a tong. 23Ahmaan lo mi ningzahnak ruang ah a hawi kha biakamhnak a tuah mi an um, cun zei hmanh lo ah ral a ser.

Lihchim

24Lih cu mi zei poh ca ah zohchia hnom a si, chimh ngai lo hmurka in a chuak peng.  

25Lihchim mi nakin mifir hmanh aa ning deuh, nain an pahnih in rawhnak ah an panh ko.  

26Lihchim cu fihnung nun a si; lihchim i ningzahnak cu zungzal a hmun.

Fimnak

27Mifim cu a bia a ei, mizer cu milianngan sin in mithmai ṭha a hmu.  28Lo a thlo mi poh nih thlairawl tling tein a hmuh lai, milianngan mithmai ṭha a hmu mi poh nih sual ngaihthiamnak a hmuh lai. 29Laksawng nih mifim mit kha a huh i hnarphen bantuk in hrocernak kha a kham. 30Fimnak cu thuh a si i chawva cu hmuh a si, an pahnih in zei dah an ṭhahnem?  31A hruhnak a thup mi cu a fimnak a thup mi nakin a ṭha deuh.