2 Maccabaeus 8
JUDAH PHUNG TEINAK, HREMTU THIHNAK LE BIAKINN PEKCHANHNAK
Judas Makabi le ral thawhnak
8 Makabi ti zong in hngalh mi Judas le a hawile hna cu a thli tein khuatelei ah an kal i an rammi hna kha an pumh ṭhan hna; Judah phung ah fek tein a dir mi hna kha an sawm hna i minung thongruk tluk an hmuh hna. 2Cun Bawipa sin ah cun a kenkip in hrem mi hna kha philh lo awk, pathian a hngal lo mi hna nih an bua rmi Biakinn kha zaangfah awk, 3an hrawh i vawlei ah aa phah mi khualipi kha zaangfah awk, a sin ah thangpi in a aumi thah mi hna thisen i thlacamnak kha ngaihpiak awk, 4zei hngal lo bawhte hna thahnawnnak kha philh lo awk le a min a thangchiat mi hna kha teirul cham awk ah ti in thla an cam. 5Makabi nih ralkap a dirh cangka in Bawipa thinhunnak cu zawnruahnak ah aa thleng i amah cu ramdang mi nih tei khawh lo ding ah a cang. 6Amah nih khuapi le khuate hna kha rin lo pi in a tuk hna i a khangh dih hna; hmunpi tampi kha a lak i rallei kap kha tampi a sunghter hna, 7Cu rian ngan cu zan khuamui i phen in a tuk deuh hna. A ṭhawnnak thawng nih ramkip a cul.
Nikanor le Gorgias ral tuknak
8Judas cu a ṭhawng chin lengmang i a hlawh a tling chin lengmang ti kha Filip nih a hmuh tikah, Coele–Siria le Fonisia ram ah nawlngeitu ralbawi Ptolomy sin ah ca a ṭial i amah kha siangpahrang himnak ca ralkap tha chap ding in a nawl. 9Ptolomy nih cun siangpahrang i Pakhatnak Hawikom hna lak i pakhat a si ve mi Petroclus Fapa Nikanor kha a thim, cun amah kha Jew miphun ci hmih awkah a tlawm bik ramkip ralkap thongkul he a thlah colh. Bawmtu ah ralkaplei hmuhtonnak tampi a ngei mi Gorgias kha a pek. 10Nikanor zong nih cun siangpahrang nih Rommi hna a bat mi ngunkhuai phaisa ṭalen thonghnih cham awkah tlaih mi Jew thongtla hna kha zuar awkah ruahnak a pek ve. 11Cun rau lo in rilikap khuapi vialte hna sin ah Jew rianṭuantu cawk awkah sawmnak ca a kuat hna i lu sawmkua ah ṭalen pakhat in bia a kamh hna; sihmanhsehlaw a cung ah a tlung zau ding mi Zeizong tuah kho i a biaceihnak cu a ruat manh lo.
12Nikanor a rat thawng kha Judas sin a phan tikah a mi hna cu ral a hung nai cang tiah ralrinnak a pek hna, 13cu tikah miralchia le Pathian dinnak aa bochan lo mi poh cu an tho i an tli dih. 14A tang mi nih a tang mi an thilri hna kha an zuar hna, cu lio ah an i ton hlan hmanh ah annih kha a rak zuar cang mi Nikanor kut chung in anmah kha khamh awkah Bawipa sin ah thla an cam fawn rih; 15cucu anmah hmai zoh a si lo hmanh ah an pupa hna he a rak ser mi thisenbiakamnak hmai tal zoh in, cun annih hrimhrim zong kha a thiang le a lianngan mi min an i put bang in annih kha a khamh hna naklai caah a si.
16Makabi cu a ralkap thongruk tluk kha a cerpi hna i annih kha ral an hmuh tikah lau lo ding asilole anmah tuk awkah a rak fong mi miṭha lo Jentailmi tampi hna kha an hmuh hna tikah thachiat lo in ralṭha ngai in doh hna awk,17 cuti an tuk hna tikah an nunphung an hrawh mi cu chim lo, hmun thianghlim chung ah thinphawhnak an tuah mi le khuapi cung ah zomhtaihnak thil an tuah mi hna kha an mitthlam ah cuanter awkah a fial hna. 18 Annih cu an hriam le an ṭhawnnak kha an i bochan kho men; sihmanhsehlaw, kannih cu voikhat lusuknak in kanmah tuk awkah a rak ra mi le anmah he a um mi vawleipi hmanh a hrawk khotu, zeizong tuah khotu Pathian kha kan i bochan,” tiah a ti hna. 19 An pupa hna nih bawmhnak an rak hmuh lio caan kha a chimh hna: Sennacherib kuttang ah khan a mi hna thongsawmriat le thongnga an rak rawh, 20 Babilon chan ah Galatimi hna he an i tuk ah khan Jew ralkap hna cu Masidonias ralkap thongsawmli he biatak tein an i tuk tikah ralkap thongriat hna nih khattelei ralkap thong zakhat le thongkul hna kha Vancung i bawmhnak thawng in an hrawh dih hna lawng si lo in hranchaw zong tampi an rak lak hna ti bantuk kong hna kha a chimh hna.
21Hi bia hna nih an lung a thawhter tuk hna caah a mi hna cu an ram phunglam ca ah an nunnak pek ding timhcia an si cang, 22 cucaah a ralkapbu cu ṭhenli ah a ṭhen, a naule a si mi Simon le Josep le Jonathan hna cu bukhat cio a hruaiter hna i ralkap thongkhat le zanga cio a pek hna. 23Cu hnu ah Esdria cu Cauk Thiang kha thang pi in a relter i, ‘Pathian sin in Bawmhnak,’ ti mi bia kha i vennak bia ah a pek hna. Cun amah cu ralkapbu pakhat hmai ah a chia i Nikanor cu a tuk. 24 Lianngan bik nih a ṭanpi hna caah an ral minung thongkua kha an hrawh hna, Nikanor ralkap tam deuh cu an hliam hna i an ṭhio hna. 25Anmah cawknak ca an ti mi phaisa cu an kut ah a phan, annih kha sau nawan an dawi hna hnu ah, caan an ngeih ti lo caah an rak kir ṭhan hna; 26cucu Sabbath lai zanlei a si cang i sau dawi ti lo in an kir. 27An ral hna i an hriamnam kha an pumh hna i an chaw cu an chuh dih hna. Pathian cu lungthin tak in an thangṭhat i an lawmh, zei cah tiah amah nih annih kha a khamh hna i mah ni cu a voikhatnak a zaangfahnak langhter awkah a thim mi ni a si. 28Sabbath ni a dih tikah an hranchaw cheukhat cu hrem mi hna, nuhmei le ngakṭah hna kha an phawt hna; a tang mi cu anmah le an fale hna kha karlak ah an i phaw. 29 Cun zapi thlacamnak ah an i tel i zaangfah thiam Bawipa nih a salle hna he tling hirhiar in remnak a ser nakhnga thla an cam.
Timotheus le Bachides an teinak
30 Annih nih Timotheus le Bacchides ralkapbu hna zong kha an tuk hna, ralkap thongkul cung kha an hrawh hna i tlangcung ralhruang tampi kha an lak khawh. An hranchaw tampi cu i khat tein cheuhnih ah an cheu i cheukhat cu anmah an i lak i adang cheukhat cu hrem mi hna, putar pitar hna zong kha philh lo in, ngakṭah le nuhmei hna kha an phawt ve hna 31 Ral hriamnam hna kha ralring tein an khawmh hna i a himnak hmun ah an khon hna. A tang mi hranchaw hna cu Jerusalem ah an kalpi. 32 Timotheusleikap i phunbawi pakhat, a chiakha tuk mi le Jew hna harnak tampi a rak petu cu an thah. 33 Jerusalem i teinak puai an tuahpah ah khan a Thiang Kutka a rak khangtu hna kha inn hmete ah aa dor mi Callisthenes mi hna he mei in an khangh hna; cucaah hi nih hin thilthiang an rak hrawhnak man cu aa tlak ning tein an co hna.
Nikanor a zaamnak le tehte a khaannak
34Letthum thuat in a chiakha mi Nikanor, Jew hna cawk awkah chawlet hna thongkhat a rak ratpitu cu 35Bawipa bawmhnak thawng in zei ah a rak rel lo mi hna nih an thlak kha a hmuh tikah a ralbawi thuam kha aa phoih i sal bang, hnuzul aho hmanh um lo in, khuacul in a zaam i Antioch cu a ralkpabu cu a rawh cang caah vanṭhat ah amah te lawng a va phan. 36Cucaah Jerusalem i ral thongtla hna zuarnak in an leiba tling tein cham awk Rom hna bia a rak kamhtu nih Jew hna cu dirkamhtu an ngei i mah dirkamhtu nih a chuah mi phunglam an zulh caah annih cu tei khawh ding an si lo ti kha tehte a khaan cang.