SIRACH 16

Lungkhawng hna vanni

16 Santlai lo fale hna cu ngei duh hlah, cun Pathian hngal lo fapale hna cung ah vaa lawm hlah. 2Pathian ṭihnak an chung i a um lo ahcun zei tluk an tam zong ah vaa lawm hlah.  3An nunkhua saunak ah va hngatchan hlah, an milu ah bochannak tam tuk ngei hlah; 4zei ca ah tiah pakhat cu thongkhat nakin a ṭha deuh, pathian hngal lo fale ngeih nakin ngeih lo in thih a ṭha deuh.  4Mi lungfim pakhat ruang ah khualipi a dir kho i phunglam ngei lo miphun cu hrawh an tong lai. 5Ka mit nih cu bantuk thil tampi a hmuh cang, ka hna nih cu bantuk nakin a zual deuh mi a theih cang.  

6 Mei cu misual hna umnak ah an van, dohdal hmang ram ah dantatnak a alh hluahmah. 7Pathian nih cun, an thazaang i bochan in amah a doh mi chanhlun mitlangpi hna kha a ngaithiam hna lo. 8Lot he a um mi hna kha a zuah hna lo; an i porhlawtnak ca ah a huat lehlam hna. 9A rawk ding miphun- an sualnak ah aa porhlawt mi miphun - cu a zaangfah hna lo, 10cu bantuk in lungkhawng in an kut i tlai in hmai a norchih mi ke ralkap thong zaruk hna zong kha a zaangfah hna lo.  11A lung a khong mi pakhat dantatnak in a luat ahcun khuaruahhar ngai a si, zei tin tiah zaangfahnak le thinhunnak cu an pahnih in Bawipa ta an si i amah cu zaangfah awk le daantat awkah a ṭhawng. 12 A zaangfahnak a ngan tluk in a thinhunnak zong a si ve; mi pakhat cio kha an tuahnak he aa tlak ning in bia a ceih hna: 13misual cu a phung lo in an hmuh mi he a luat lai lo i miding zong a lungsaunak cu a lak a si bal lai lo.14Ṭhatnak a tuah mi vialte kha aa chinchiah i mikip cu an i tlak ning cio in a cohlan hna.

Sual daantat ding a fiang

 17‘Bawipa sinin kaa thup lai, khika ah aho nih dah a ka theih lai? Kei hna cu hi tluk mi tam lak ah cun an ka hmu bal lai lo, ser mi hi tluk tam na lak ah kei cu zei dah ka si i?  ti hlah. 18Zei caah tiah amah len ni ah cun van le vancung hna, rili thukpi le vawleipi  cu an i hnin dih te lai. 19A zoh hna tikah tlang le vawlei hrampi hna cu an ther len te lai. 20Sihmanhsehlaw aho hmanh nih cu bantuk cu an ruat bal lo. Aho dah a cawlcanghnak cu a lung ah a chia bal? 21Thlichia hrimhrim hi hmuh khawh a si lo, a tuah mi tam deuh cu hngalh a si lo.  22‘Dinnak cu tuah a si maw ti cu aho nih dah thawng a thanh lai? Aho nih dah a ngiat lai? Thisen biakamnak cu a hla tuk,” 23Hi bantuk cu mithluak tlawm, mihrut, lampial le a hruhnak aa chor mi hna i ruahnak a si. 

15 Bawipa nih Faro siangpahrang kha a lung a hahter i Bawipa lianngannak kha a hngalh lo caah amah i tuahsernak cu mi vialte kha a hngalhter hna. 16Bawipa i zaangfah dawtnak cu ser mi hna nih fawi tein an hmuh khawh. Bawipa nih cun ṭhatnak a tuah mi le a tuah lo mi hna kha ṭha tein a ṭhen khawh hna.

Ser mi chung in minung phun

 24Ka fa, ka bia hi ngai law hngalhnak cu cawng tuah, cun na lungthin dihlak in ka bia cu ngai tuah.  25Ca cu ningcang tein ka hlathlai lai i hngalhnak cu a dik ciah in ka thanh lai.

26 Pathian nih a thawk ah a rian kha a ser tikah a ser khawh hna cangka in hmunhma kha a pek cio hna. 27A rian cu a thawk nakin caan saupi tiang zungzal ca in an ri a khiah dih hna.  Lungdongh le rawlṭam an hngal lo, cun an rian an kaltak bal lo. 28Aho hmanh nih midang rian ah aa thlak bal lo i a bia cu an al bal lo. 29 Cun Bawipa nih vawlei cu a zoh i a ṭhatnak in a khahter. 30Vawlei cu saram phunkip in a khahter i amah sin ah an kir ṭhan dih te lai.