Fimnak 4

Pathian a hngal lo fa ngeih nakcun cin a ṭha deuh

4 Fa ngeih nakin ziaza ṭha ngeih a ṭha deuh, zei tin tiah zungzal nunnak a philh lonak kha a hmunter; zei cah tiah Pathian le minung nih an pahnih in an hngal ko. 2 Kan pawng a um tikah kan i zohchunh, a um lo tikah kan hlam; suiluchin i chinh in zungzal in teinak a hmuh, a ziam lo mi laksawng ca i a rak i zuam ca ah teitu ah aa chuah.

 3Sihmansehlaw pathian hngal lo tefa hna cu zei tluk theipar an tlai zong ah zei hmanh lo ah an cang, lakfa an si i thukpi ah an hram an bunh bal lai lo, an hram a fek bal lai lo, 4 caan tawite cu an nge an corh lai nain an hram a feh lo caah thli nih a thluk hna lai i thlichia nih an hram in a phawi hna lai; 5 an ṭenge hna cu an borh hlan ah thlamh an si lai; an thei cu an hmin kho lo i ei awk an ṭha lo, zeisan a tlai lo. 6 Zei cah tiah innlak fale hna cu hneksak an ton tikah an nu le an pa chambaunak kha an phuan.

Miding hna kum tling lo an thihnak ruang

7Mi ding cu kum no tein a thih hmanh ah dinhnak a hmuh lai. 8Nunkhua saunak nih upatnak a chuahpi theng lo, cun kum saupi nun hi a dik mi nunnak tahfung a si fawn lo, 9sampar hna nih theihfiannak an ngei i chantlung nunnak ti mi, a thianghlim mi nunnak cu kum cang nun a si.  10Pathian mithmai ṭha a hmuh cang caah dawt mi a si cang, misual hna lak ah khua a sak caah lak a tong mi a si.  11Ṭhat lonak nih a hngalhnak a tuam nakhnga lo asilole hlenthawinak nih a thlarau a lemsoi nakhnga lo lak a ton mi a si; 12zei cah tiah chiatnak i khuaruahhar lemsoinak nih thil ṭha cu a thladem tang  ah a chiah hna i pumsa duhnak thlichia nih milung tlawm lungthin cu a hrawh.  13Tlinnak ah a phanh zau caah saupi a nung; 14a thlarau nih Bawipa lung a tluanh caah a pawngkam michia hna sin in a kalpi zau.

Asinain mi cu an zoh ko, nain an hngal kho lo, cun an thluak ah a lut lo: cucu 15 a thim mi hna cu a vel le a zaangfahnak nih a hngah ko hna i a mithiang hna aiawh in tlang a tlak hna. 16 Miding mithi hna nih a nung mi pathian hngal lo hna kha sual an phawt hna i kum note in a tlinnak a phan mi hna nih michia hna i kumkhua saunak kha sual an phawt. 17 Hi hna nih hin mifim hna an donghnak cu an hmuh ko; asinain Bawipa nih an ca ah zei dah a khonpiak hna ti le zei ruang ah dah cu bantuk mi cu a himnak ah a lak hna ti kha an hngal lo; 18 an zoh i an ni men, sihmanhsehlaw Bawipa nih a nihsawh hna lai. 19 Tlawmpal ah annih cu upat tlak lo ruak le mithi hna lak i ṭihnung thil hna ah zungzal an cang cang lai. Zei cah tiah annih kha a thlehbauh dih hna lai i bingtalet le holh kho lo in a hlonh hna lai. An hrampi in a hninh hna lai: an rawk cikcek lai, ngaihchiatnak sa ah an cang lai i philh lan an si cang lai.

Pathian hngal lo hna biaceihnak

20An sualnak cazin an rel tikah thinphang in an rak chuak lai i khuasual an tuahnak nih hmaitonh in sual a phawt te hna lai.