2 Maccabaeus 6

Jentail nunphung kha hramhram in an luhpi

6 Cu hnu tlawmpal ah siangpahrang nih Athenmi Gerontes cu Jew hna kha an pupa hna nunphung kha an hnon i Pathian phunglam bang nun ti lo awk; 2Jerusalem i Biakinn kha buar in Olympia Zeus sin ah pekchanh awk, cun Gerizim tlangcung i biakinn cu khuami nih an hal bang in khual hna zohkhenhtu, Zeus sin pekchanh ding in hnekchih awkah a thlah:  3Hi thil ṭha lo a chuah cu mi vialte ca ah tuar a har ko. 4Biakinn cu Jentailmi hna i nuamhnak le au thawng he a khat; annih cu hlawhhlangnu hna he an i nuam i Biakinn tual ah khan nu le pa sualnak an tuah hna.  5Biakṭheng cu phungbia nih "a thiang lo" a ti mi sa hna he a khat. 6Aho hmanh nih Sabbathni kha an ul lo i biaknak puai zong kha an tuah ti lo, Jew an sinak hmanh an chim ngam ti lo. 7Mi hna cu siangpahrang chuah camtuak pumhnak ah i tel ding in an hnekchih hna, cun Dionysus puai ni a phak tikah aivi timi ram-luchin kha i chinh in lam an zawhter hna. 8Ptolemaimi hna nih an hauh bang in  pawngkam Grik khuapi hna ah a um mi Jew hna ca ah zulhphung an chuah, cu zulhphung bang in Jew hna cu thawinak ah an i tel ve lai i  9Grik nunphung a zul duh lo mi poh cu thahnak nawl a pek hna. Cucaah rawhralnak cu a nai tuk cang ti kha a fiang ko.

10Tahchunhnak ah minu pahnih cu an fale hna kha cuarpar an tan hna ti sual an puh hna, cucaah an fale hna cu an hnuk ah thlaih in khualipi chung zapi hmai ah an vahter hna i khualipi vanpang in an thlak hna. 11Cun, aho hmanh hnahnawhnak pe lo in Sabbathni ulh awkah lungkua chung ah aa pum mi hna cu Filip sin ah thawng an thanh i an dihlak in an thih tiang mei in an khangh hna, zei cah tiah Sabbath ni a thianhlimnak kha an buar duh lo caah an nunnak hmanh an i veng manh hna lo.

Hremnak i Pathian khuakhannak

12Atu hi cauk a rel ding mi kha hi rawhralnak hna ruang ah nan khuaruah har lo in hi bantuk lenkainak cu kan miphun ci hmihnak ding ah timh mi si lo in chimhhrinnak ca ah an si ti tu in ruah ding ah kan forh duh hna. 13A ngaingai ti ahcun thilchia a tuahtu hna kha saupi ngang lo in teirul chamnak a rat zau tikah kanmah kan cung ah ṭhatnak nganpi hmelchunhnak a si. 14Miphun dang hna ca ah cun Bawipa nih an sualnak hrai a khah hlan lo daan a tat hna lo; sihmanhsehlaw kannih tu cu phundang in a kan tuah, 15kan sualnak hrai a khah tiang a hngak lo. 16Cun a zaangfahnak cu kan sin in a la dih bal lo; vanchiatnak pakhatkhat in a kan chimhhrin ko lai nain a kan kaltak bal lo. 17Hihi cu ralrin peknak men si seh law atu cu kan tuanbia ah kir ṭhan zau hna usih.

Eleazar thahnak

18Khuatuan bik Phungbia saya hna lak i pakhat, a kum zong a upa cang i hmaizah awktlak taktak Eleazar cu voksa eiter awkah a kaa kha an keu. 19Sihmanhsehlaw thangchia in nun nakin upat tlak in thih kha aa thim i amah lungtho tein hremnak lengkual kha a fuh, 20cun a kaa chung i voksa cu a chak, zei cah tiah miralṭha hna ca ah ei ding a si lo mi ei nakin thih kha ṭha deuh. 21Phungbia nih a thlauh mi thawinak tawlreltu hna cu amah he caan saupi an rak i komh cang caah amah kha a kam ah an kalpi i a thli tein amah nih a timhmi sa kha a rak putter hna lai i zapi hmuh hngan ah siangpahrang nawl a zul ti phun in aa eiter lai; 22cuti a tuahnak nih amah cu thihnak in a luatter lai i saupi an rak i hawikomhnak ca dawtnak ah a canter lai ti in an nawlchih. 23Sihmanhsehlaw amah nih a kumkhua le a chan liangluang i limhang le a sampar he aa tlak mi upatnak, a ngakchiat lio tein a dinfelnak, a hleice in Pathian hrimhrim nih a ser mi phunglam thiang he aa tlak mi a sunglawi mi biachahnak a tuah hnu ah amah kha Mithi khua ah kuat colh ding in a chimh hna. 24 “I titernak cu kan kumkhua he aa tlak lo; mino tampi hna nih Eleazar cu kum sawmkua a si hnu ah ramdangmi hna nun a cawng,” an ka ti lai.  25Cun a biapi lo mi hi caan tawite nunnak ca ah hi thil hi ka tuah ruang ah annih cu lamping an zawh lai; ka tarlei sang ah ningzahnak le mualphonak lawng kaa hlawk lai.  26Caan tawite chung cu minung thahnak kha ka hrial khawh hmanh ah ka thih zong ka nun zong ah Lianngan bik kut in cun ka luat kho bal lai lo. 27Cucaah thih ka cu ko cang, kum upa ka sinak he aa tlak mi nunnak cu ka langhter lai, 28 cuti cun mino hna kha zei tin a thiang i a sunglawi mi phungbia hna ca ah kan nunnak cu lungtho ngai le siang ngai in pek awk a si ti mi zohchunh awk nunzia ṭha cu ka chiahtak hna lai,’ tiah a ti.

Hiti a chimpah in lengkuallei ah ding teumao in a kal, 29a hawile hna cu hmasa ah khan a cung ah an rak ṭha ngai nain a thanh mi bia cu hruhbia ah an ruah caah amah kha an ral cang.  30Amah tu cu hremnak in a thih hlan ah a thawpi a chuah i a chim mi cu, “A hngalhnak a thiang mi Bawipa nih cun, ‘Thihnak cu ka hrial khawh ko nain amah kha ka tlaihchan tuk caah hi tukvelhnak i pumsa nganfaknak cu lunglawm thanuam in ka tuar ko, cun ka lungthin tak in kaa lawm ngai, “tiah a ti.  31Cuti cun a thi i a thihnak nih mino hna ca lawng si lo in miphun pumpi ca ah zohchunh awk tlak nun le ṭhatnak philh lonak kha a kan chiahtak.