Fimnak 2

Pathian hngal lo hna nih nunnak an hmuh ning

2 1Cun hihi cu a hmaan lo mi an bia-alnak a si: "Kan nunnak cu a tawi i thachia a si; kan thih caan a phanh tikah damnak sii a um lo; mithi khua in a rak kir mi an um bal rih lo. 2 Ruah lo pi in minung kan cang i a rak um bal lo mi bantuk kan si ṭhan lai; Kan hnar chung i thaw cu mei-khu men a si; ruahnak kan ti mi zong hi thinturnak i meici men a si; 3 hihi a loh tikah kan pum cu vutcam ah a cang ṭhan; kan thlarau zong cu kan thawchuah bang a dih ve. 4A caan a phak tikah kan min an philh lai; kan rak tuah mi hna zong aho hmanh nih an cing ti lai lo. Kan nunnak cu minmei bang a ziam i ni a tlaan tikah ṭhal romei bang an lo dih ve. 5Zei cah tiah kan chan cu thladem a ṭian mi bantuk an si, kan donghnak cu kir ni a ngei lo, ṭacik an cumh i aho hmanh an kir lo.

6Cucaah ra ulaw nihin kan ngeih mi thil ṭha cu i nuamhnak hna usih, ser mi thil hna cu mino thilnu he hmang hna usih: 7Zuu thaw bik le zihmui hmui bik cu diriam in hmang hna usih, khuapau pangpar hmanh zuah lo in 8 rose pangpar borkip cu a uai hlan ah i tonh hna usih, 9khua zei hmunrawn ṭha hmanh ngan hlah usih; kan i nuamhnak philh lonak cu khuazakip ah chiata u sih, zei tin tiah hihi cu kan covo le kan savo a si bang in,

10A si a fak mi miding tu cu hrem hna usih, nuhmei cu zuah hna hlah usih, kumcang sampar zong kha upat hna hlah usih. 11Kan ṭhawnnak cu kan dinnak tahfung si seh, zei tin tiah derthawmnak nih zei a si lonak kha a langhter. 12Miding ca ah rap chia hna usih, zei tin tiah hna an kan hnawh i kan nun lamthluan an kan doh, Phungbia kan buar ah an kan mawhchiat i kan rak umtu ning kha sual an phawt.

13 Pathian ka hngalh aa ti i amahte in Bawipa fa ah ah aa au. 14 Amah cu kan khuaruahnak a soiseltu ah kan hmuh i amah hmuhnak hrimhrim nih kan lung a kan donghter, 15zei cah tiah a nun cu midang nun he aa khat lo i a lam cu phundangpi a si. 16A ruahnak ah kannih cu a deu kan si i kan lam cu hnawmpon bang in a hrial hna; miding hna an donghnak cu a sunglawi ti a thanh i ka pa can ah Pathian ka ngei ti in aa porhlaw.

17A chim mi cu a dik le dik lo zoh tuah usih law zei bantuk donghnak in dah a dongh ti cu hneksak hnik usih.18Zei cah tiah miding cu Pathian fapa a si ahcun Pathian nih a bawmh lai i a ral hna kut in a chanh ko lai. 19 Amah cu fak ngai in hrem usih law a nunnemnak cu purhdah, a lungsaunak cu hneksak tuah usih. 20Amah cu zohchia in that usih, zei tin tiah a chim bang - Pathian nih a chanh ko lai.

Pathian hngal lo hna palhnak

21Annih cun hiti hin khua an ruat, sihmanhsehlaw an pial cang, zei tin tiah an ṭhat lonak nih an mit a cawtter hna. 22 Pathian biathli hna kha an hngal lo, thiannak laksawng zong an i ruahchan lo, miding thlarau i laksawng zong kha an zum lo. 23Zei cah tiah Pathian nih minung phun kha zungzal ca in a rak ser hna, amah muisam keng in a rak ser hna.  24Thihnak cu khuachia nahchuahnak ruang lawng in leicung ah a rak phan, cun a mah a kawm mi hna nih an teh.