2 Maccabaeus 14

VII: DEMITRIUS PAKHATNAK, RALBAWI NIKANOR HE BUAINAK NIKANOR NI

Tlangbawi ngan Alcimus nih tlang a tlak

14 Mah hnu kumthum ah, Seleucus fapa Demetrius cu Tripoli tilawng dinhnak ah ralkapbu ṭhawng ngai le tilawngbu hna he a rak phan, 2 cun cu ram kha a lak i Antiochus le a saya Lysias kha a thah cang hna ti cu Judas le a mi nih an theih.

3Hmasa tlangbawi ngan Alsimus cu ral an rak thawh lio ah biaknaklei buarnak a rak tuah mi a si; atu khua zei aa mer zong ah amah ca ah himnak a um lo ti le biakṭheng zong ah a lut kho ti lo ti kha a hngalh tikah 4151 kum hrawng ah siangpahrang Demetrius sin ah a va kal i amah kha suiluchin le kuhchuk nge cu Biakinn chung i olive nge he a va pek; cu ni ah cun hnangam tein a um ko.

5Atu ahcun khuakhannak hrut kha pehzulhnak caanṭha a ngei. 6Demetrius nih khawngsil ah a auh i Jew hna si ning le tinhnak kha a hal tikah amah nih, “Judas Makabi nih a hruai mi Hasidian ti mi Jew hna cu raltuk le ralthawh hmang an si i ram chung daihnak a dawnkhamtu an si. 7 cucaah ka covo tlangbawi ngan sinak kaltak in hika ah ka ratnak cu a si, 8cucu pakhatnak ah siangpahrang lungretheihnak kha lungtak tein ka a siaherh caah le pahnihnak ah ka miphun hawi hna zawnruah in a si, zei cah  tiah zei hmanh a tuaktan lo mi, ka chim cang mi hna, umtuning hi kan miphun cung ah zei zaangfahnak hmanh a ngei lo. 9Bawipa nih hi vialte  na theih hnu ah  na zaangfah dawtnak cu mi vialte caah a si peng bang in kan ram le hrem mi kan miphun ca ah thil ṭha na kan tuahpiak naklai kan nawl hram ko, 10zei tin tiah Judas a nun chung poh cu kan ram cu a dai kho bal lai lo," tiah a leh.

11Bia a chim dih maw dih lo ah khin Judas cawlcanghnak a hua ngai mi Siangpahrang Hawile vialte hna nih Demetrius thinhunnak cu an chapchih. 12 Anih nih raltuknak vui hna a uktu Nikanor kha a thim zau i Jew ram uktu bawi ah a kaiter, 13cun amah kha Judas thlak awk,  a hnuzul hna kha ṭhek dih i Alcimus kha Biakinn ngan bik hna uktu tlangbawi ngan ah a rian kaiter awkah a thlah colh. 14 Judea ram i ramdangmi hna cu Jew hna tlaknak le vanchiatnak cu anmah vanṭhatnak ah a cang lai ti ruah in Nikanor he an i fon dih.

Nicanor cu Judas he hawikomhnak a tuah

15Nikanor cu a ra lio i ramdangmi hna cu amah he i tuk ding ah timhcia an si ko ti kha Jew hna nih an theih tikah leidip kha an lu ah an i phulh i a miphun kha zungzal ca a dir i a roco miphun kha langhngan in bawmhnak a pe zungzaltu sin ah thla an cam.  16An hruaitu nawlpeknak in an umnak hmun khan an chuak colh i Dessau khuate ah an ral cu an va orh hna. 17Judas naupa Simon cu Nikanor he an i sual cang, sihmanhsehlaw ruah lo pi in ral hna an rak phanh caah tlawmpal cu hnu ah aa thawn. 18Asinain Judas le a mi hna cu zei tluk in dah an ral a ṭhat ti le an ram ca ah zei tluk fek in ral an tuk ti kha a theih i thisen in bia khiah cu a duh lo. 19Cucaah, Jew hna kha hawikomnak ca biakamnak za chanh in anmah sin biakamnak zong cohlan ding in Posidonius, Thiodotus le Mattathia kha a thlah hna.

       20A biatung kha ṭha tein a ruah hnu ah an hruaitu nih a ralkap hna kha a chimhchin hna, cun annih cu an ruahnak le an hmuhnak an i khah caah remnak tuah ding in an hna a tla. 21Kaphnih hruaitu hna pumpak an i tonnak ding nithla kha an khiah. Khatlei veve in rianṭuantu cu an hung chuak i ṭhutnak cu an ser. 22Chikkhatte ah ral nih rawinak an tuah sual ah ti in Judas nih cun hriamtlai ralkap hna kha a biapit deuhnak hmun poh ah khan a chiah dih hna.  Hruaitu hna cu an i tong i hnatlaknak an ngei.  23Nikanor cu Jerusalem ah khan umhmun a khuar i leng a chuak bal lo; amah sin ah i fonh ding in a rak ra mi mibupi zong kha a khirh hna. 24Judas cu amah he naihnaim tein a chiah i amah kha a tlaihchan ngai, 25cun amah kha nupi ngeih i fale ngeih ding ah tha a pek. Judas cu nupi a ṭhi i khuami hna bantuk in khua a sa ve.

Alsimus nih huatnak kha a chuahter ṭhan i Nikanor nih Biakinn hrawh ding in a tlerh

       26Pahnih hna cu hawikom ngai an si cang ti kha Alsimus nih a hmuh tikah an biakamnak catlap he khan Demetrius sin ah a kal i amah kha Nikanor cu ram ṭhatnak he aa ralchanh mi ruahnak a ngei cang, cun rampi ral a si mi Judas kha Siangpahrang hna Hawikom lak i a lawng mi hmun kha pek aa timh cang ti kha a va chimh. 27 Hi mizer pa bia nih siangpahrang cu a thin a hunter tuk caah Nikanor sin ah ca a ṭial i amah kha an hnatlaknak ah a lung a tlin lo ngainak kha a chimh Makabi cu thir cikcin he Antioch ah rak hruai ding in a cah.  

28Nikanor cu hi ca a  hmuh tikah a lung a dong ngaingai, zei tin tiah a cung zei sualnak hmanh a tuah bal lo mi pa he hnatlaknak hrawh cu a duh hrimhrim lo. 29Asinain siangpahrang dohnak ding lam a um lo caah ralbawi zik i nawl kha tuah awkah caanṭha a hngak. 30Cun Makabi zong nih Nikanor cu amah cung ah a hrang deuh cang ti mi le a sin bia a chimzia zong hi hlan nakin a bultan deuh cang ti kha a theih, cun hiti a hran hi a ṭhalei cu a si lai lo ti kha a hngalh. Cucaah a zultu tam nawn kha a pumh hna i Nikanor sin in a chuak.  

31Nikanor nih mipa nih a thluak in a ka tongh cang ti a hngalh tikah a thiang le a ngan bik mi biakinnpi ah a va kal, mah lio cu tlangbawi hna nih an tuah tawn bang in thawinak an rak pechanh liote a si, cun annih kha a kut ah Judas chanh ding in a chimh hna.  32Annih nih chiatserh in na duh mi pa cu khuazei a um kan hngal lo an ti tikah, 33a orhlei kut kha Biakinnlei ah a samh i, “Judas kha thongtla in ka kut ah nan ka chanh lo ahcun hi Pathian Umnak innpi hi ka thluk lai, biakṭheng zong ka ṭheh lai i hi hmun hrimhrim ah hin Dionisus pathian ca ah biakinn tleutleu ka sak lai,” tiah chiatserhnak bia a chim. 34Cun a kaltak hna. Cu tikah, tlangbawi hna cu an kut kha vancung ah an thlir i a miphun ca i zungzal ral a rak dopiaktupa sin ah hiti hin thla an cam. 35 “Zei hmanh a herh lo mi Bawipa, nangmah nih na umnak biakinn cu hika kanmah he a um kha na duh mi a si. 36Cucaah Maw thiannak vialte i Bawipa, atu naite lawng i pekchanh mi hi Innpi cu buarnak vialte in rak humhim hram ko.

Razis thihnak

37Atu cu Jesusalem i upa pakhat, a min ah Razis an ti mi cu Nikanor sin ah an ripawt. Amah cu a ram mi hna a daw mi a si i mi nih an zohcho ngai mi a si, cun a ṭhatnak ruang ah Jew hna i pa ti in hngalh mi a si.  38 Khuatuan i mipi ralthawhnak ah khan amah cu Judah phunṭanh ti in sual an rak puh mi a si, cun Judah phun a ṭanh tuk caah a nunnak le a kut le a ke hmanh a rak sung deng mi a si. 39 Jew hna a huatnak langhter nakah Niakanor nih amah tlaih awkah ralkap zanga kha a thlah; 40amah nih hi pa ka hloh khawh ahcun annih kha fahnak nganpi ka pek hna a si ti  in a ruah. 41 Ralkap hna nih innsang an lak deng, lenglei kutka hna an namchih i kutka kha mei in duah awkah mei an hal lio ah khan Razis cu ral nih an ka dum cang ti a hngalh tikah, 42 hi misual hna kut ah le a bawi sinak he aa tlak lo mi thihnak in thih nakcha cun ti in amah tein a nunnak lak ding aa timh. 43Asinaim a buai tuk ruang ah a vainam nih a nganh, cun ralkap hna cu innka in an hung luh cang tikah cungdotlei ah rianrang in a kai i innleng khan vanpang cung ah a kai hnu ah pasal ti in ralkap hna lak ah khan a vung zuang. 44Sihmanhsehlaw annih cu an i thawn i vawlei ro ah khan a va tla. 45A thaw a um rih i a thin cu mei alh in a alh, thawh aa zuam hnik, a thi cu a kenkip ah aa kaap, cun a hma cu ṭih a nung nain mibupi lak  ah a va lut; cu hnuah lungpher pakhat cung ah a dir, 46 atu ah a thi cu a pit cang nain a chungril hna kha a kuthnih in a thuam hna i a nunnak le a thlarau cu ni nikhat ah amah kha pek ṭhan ding in Bawi sin ah a au pah in mi zapi lak ah khan a hlawnh. Cun a thi.