SIRACH 22

Mithathu

22   1Mi thathu cu hnawm nih a khuh mi lung bantuk a si, mikip nih a thangchiatnak an chim. 2Mi thathu cu ek tlang bantuk a si, a char sual mi poh nih an thlak ṭhan.

Ṭumchuknak fale hna

3Tha tein cawnpiak lo mi fapa ngeih cu ningzak a si, sihmanhsehlaw fanu ngeih cu sungzatlak a si; 4A fim mi fanu nih va aa hmuh lai, nain ningzah hngal lo fanu cu a pa ca ah ngaihchia a si. 5 Ninghngal fanu nih a nu le a pa kha an ning a zahter hna, cun amah kha an hlawt te lai. 6A caan lo bia chim cu ruak inn i ringawn bantuk a si, nain chimhhrinnak le cawnpiaknak cu fimnak a si zungzal.  

Fimnak le hruhnak

9Mihrut cawnpiak cu tlak-um kuai sersiam bantuk a si – ih a duh tuk mi ṭhangh bantuk a si. 10Thu ngai in aa hngilh mi cu ṭha tein bia na ruah khawh men, biachim na dih tikah mihrut nih, ‘Zei e? an ti lai.  

11Khuaceu a chiata mi mithi ca ah na mitthli va thla; a fimnak a chiata mi mihrut ca ah na mitthli va thla. Aa din mi mithi ca ah tlawm deuh na mitthli va thla, zei cah tiah mihrut ca ah nun cu thihnak nakin a zual deuh. 12Mithi zunngaih ni sarih, sihmanhsehlaw mihrut le pathian hngal lo hna ca ah cun an chan chung.

13Mihrut ca ah bia tampi va holh men hlah, michupchap kha va naih hlah.

Amah kha vaa ralring, asilole harnak na tong sual lai, amah he tonghthamnak nih an thurhnawmhter sual lai; Amah cu va hrial, hnangamnak na hmuh lai, cun a hruhnak nih an uaiter lai lo. 14Suan nakin zei dah a rit deuh, hruhnak a si lo ah amin cu zeidah a si?  15Thetse, cite le thir tlangpi hna cu michupchap hna nakin a zang deuh mi thil an si. 16Inn he fek tein ṭ emchih mi thingtlang cu lihninhnak nih a phong lai lo; cu bantuk in tuaktan hnu i a lung aa thlek mi cu har caan ah hnulei ah a tawn lai lo. 17Ṭha tein tuaktannak cung i a hram a bunh mi cu vanpang mil cung benh mi kaw bantuk a si. 18Vanpang cung ah chiah mi lungtekep hna cu thli an kham kho lai lo; cu bantuk in a ruahnak nih a lauter mi mihrut lung nih cun ṭihnak kha a ing kho ve lai lo.

Hawikomhnak

19Mit kha tu law mithli a luang lai, lung kha tu law a lung um bia na chimh khawh lai. 20Vate kha lung in na cheh hna ahcun an zuang dih lai; na hawi kha mawhchiat law nan i hawikomhnak na hrawh cang.  21Na hawi cung ah vainam na thlir sual ahcun na lung dong hlah, a ṭha ṭhan ko lai. 22Na hawi kha bia in na ral sual ahcun phang hlah, i rem ṭhannak ding ruahchannak a um ko; sihmanhsehlaw serhsat, puarthaunak, biathli phuannak le ngaihthlemnak a um ah cun zei bantuk hawikom a si zong ah sungh a si ko.

23Na innpa cu a si a fah tikah an bochannak hmuh i zuam, cuti cun hmailei ah a vanṭhatnak naa hrawm ve lai; a har caan ah va dirpi, cuti cun min ṭhatnak a hmuh tikah naa hrawm ve lai. 24Mei-alh hlan ah meikhu le meiphu rim an chuak hmasa, cu bantuk in thisen thlet hlan ah serhsatnak a ra hmasa ve. 25Ka hawi dornak pek awkah ka ning a zak lai lo, cun amah sin zong in kaa thup lai lo,  26cun amah sin in ka cung ah chiatnak a tlun zong ah a thei mikip nih amah cu an i ralring cang lai.

I hliphlaunak

 27Sualnak ah ka tlak sual lo ding le ka lei nih ka rawhnak a siter lo ding aho nih dah ka hmur cu a cawngh lai i ka kaa cu a fek mi ṭacik a cumh lai?