2 Maccabaeus 12

Joppa le Jamnia ah a cang sual mi thil hna

12 Hi hnatlaknak an tuah dih in Lysias cu siangpahrang sin ah a kir ṭhan i Jew hna cu an lo ah an kir ṭhan ve. 2Sihmanhsehlaw khuami ralbawi hna a si mi Timotheus le Gennaeus fapa Apollonias, Hiaronymus le Demofon, Saipria ramṭhen uktu Nikanor zong nih khan Jew hna cu hnangam tein an umter hna lo.

       3 Joppa khuami hna cu sualnak phundang ngai kha an tuah: anmah lak i a um mi Jew hna kha an nupi le an fale hna he an timhcia mi tilawng cung ah kai ding an sawm  hna. Fahnak pek duhnak mithmai zei hmanh an keng lo. 4Hi thil cu khuami dihlak hnatlaknak in an tuah mi a si. Jewmi hna cu anmah he hawikomhnak ngeih an duh caah lunghrinnak ngei lo in an sawm hnanak cu an cohlan. Sihmanhsehlaw Joppa khuami hna nih annih kha rili ah an kalpi hna i a tlawm bik zahnih hrawng cu an thlak hna.

5Judas nih a rammi hna an in mi fahnak kha a theih tikah a mi hna sin ah nawl a chuah,  6 dingthlu Pathian sin ah bawmhnak a hal hnu ah a unau hna a thattu hna cu a tuk hna. Khuamui phen in tilawng dinhnak cu mei in a duah, tilawng cu an khangh dih hna, cun cuka i aa dor mikip kha vainam in an saam dih hna. 7 Khuapi kutka cu an i khar caah rak kir ṭhan i Joppa khuami vialte kha ṭhio dih ding ruahnak he a kir. 8Sihmanhsehlaw Jamnia khuami hna nih an lak i Jew hna kha mah bantuk in tuah an timh hna ti a theih tikah, 9 Jamnia khuami hna kha zaan ah a tuk ve hna, lawng dinhnak i tilawng vialte he khan mei in a khangh dih; mei tompi cu khansawmthum a hlatnak Jerusalem hmanh in hmuh khawh a si.

Gilead ah raldohnak

       10Timotheus tuk awkah khuapi khan khankhat a phan maw phan lo ah khin Judas cu Arab ralkap, a tlawmbik ke ralkap thongnga le rang ralkap zanga nih an hun doh. 11 Ţha lo in an i tu nain Pathian bawmhnak thawng in Judasmi hna nih an tei hna; a sung mi mivakvai hna nih Judas cu anmah kha hawikomh orhlei kut chanh awkah le an saṭil vialte anmah kut ah chanh i anmah zong hmantlak mi si awkah bia an kamh. 12A lamkip in annih cu man a ngei mi an si lai ti a hngalh caah Judas cu annih he remnak ser awkah a hna a tla, biakamnak cahren kha an i thlen hnu ah Arabmi hna cu an thlam ah an kir.

       13Judas nih ralhruang aa kulh mi miphun tampi umnak khuapi kha a tuk; a min cu Caspin a si. 14An vanpang fehnak le an tirawl khon mi kha i bochan in kulhnak chung a um mi hna nih Judas le a mi hna zei ah an rel hna lo i volhpamhnak le serhsatnak tu kha an pumhhnawh hna. 15Sihmanhsehlaw Judas le a mi hna tu cu Joshua chan ah Jeriko khuapi kha vanpang khuainak thirzum le kharkhumhnak thilri um lo in a rak thlutu vawlei pumpi Uktu Bawi sin ah bawmhnak an hal. Cu hnu ah vanpang cu biatak tein an tuk. 16Pathian hnatlakpinak thawng in khuapi kha an lak, tidil pawng ah cun rel cawk lo in mi an thah hna caah falong pakhat hrawng cu thisen in a luang mi a lo.

Karnaim ah i dohnak

17Mahka khan khaan sawmkua le khannga hrawng an kal ah khan Tubian ti mi Jewmi hna ram chung, Charek khuapi an va phan. 18Cu hrawnghrang ah cun Timotheus cu an hmu lo; cu pengkomh cu a chuak cang, hmunkhat ah a ṭhawng ngai mi khuaveng ralkapbu phukhat a kaltak ti dah lo cu zei hlawhtlinnak hmanh a hmuh lo. 19 Makabi i ralbawi ngan pahnih a si mi Dositheus le Sosipeter hna cu an chuak zau i Timotheus nih a kaltak mi ralkap thonghra reng lo cu an va hrawh hna i minung thonghra reng lo an thi. 20 Makabi hrimhrim nih a ralkap cu phuhnih ah a ṭhen hna i a zohkhenhtu ralbawi kha a thimpiak hna; cun Timotheus cu an dawi colh. Timotheus ralkap hna cu an zapi, ke ralkap thongzakhat le thongkul le rang ralkap thonghnih le zanga an si. 21 Judas a rat kha a theih tikah, Timotheus nih a tuah hmasa mi cu nu le ngakchia le thilri tom phortu hna kha Kharnaim ti mi hmun ah a kuat hna; zei  cah tiah mah hmun cu hei fuhnak lam a bit tuk caah lak awkah a har tuk ding mi  a  si. 22Judas ralkap hna an hung lang hmasa. Zei zong hmu kho Pathian aa phuan caah ral hna cu ṭihnak le thlalaunak in an khat i a dangdang cio in an zaam dih caah pakhat le pakhat an i pahnak ah an i hliam dih. 23Judas cu a thazaang dih-umnak in a  chuah i anmah kha a dawi hna, misual hna cu nam in a saam dih hna i thongsawmthum tluk a thah hna. 24Amah Timotheus hrimhrim zong cu Dositheus le Sosipetar le an mi hna kut a phanh tikah amah nih a thluak hmang in a nunnak zuah ding in a nawl hna, a ti mi hna cu a tang mi tampi cu a chungkhat le a unau hna an si i annih zong thah an tong ve sual lai ti ka phang tiah a ti hna. 25 Cun caan saupi an i ceih hnu ah amah nih a biakam cu a zulh lai i a mi hna cu him tein a thlah ko hna ti an zumh caah an unau hna zawn ruah ah amah cu an thlah.26 Kharnaim le Atarkateion a phak tikah Judas nih minung thongkul le thongnga kha vainam in a saam dih hna.

Efron le Scythopolis lam in a kirnak

       27Anih kha a tei hna i a hrawh hna hnu ah Lisania a umnak, fek tein kulh mi Efron khuapi cu a kal hnawh. Leng ah aa tlar mi mino ṭhawngṭhawng hna nih fak ngai in an rak doh, cu lio ah an ralhau chung ah ral thilri tampi an i chiah rih. 28Sihmanhsehlaw Jew hna nih a ṭhawnnak in ralhau hna a rak bauh dihtu Cungnung bik kha bawmhnak an rak hal cang caah khuapi cu an lak khawh i a chung i a um mi minung thongkul le thongnga dengmang cu an saam dih hna. 29 Cuka in an chuak i Jerusalem in khaan sawmsarih a hla mi Scythopolis nam ah an i thawh. 30Sihmansehlaw cuka i Jew hna nih Judas cu Scythopolis khuami hna nih an rak dawt ngai hna i a bik in harnak caan ah an cung ah an ṭha khun ti an chimh tikah 31annih kha an lawmh hna i hmailei zong ah a miphun cung ah cu bantuk dawtnak rak ngeih peng ding in a chimh hna. Zarh hna puai hlan deuh ah Jerusalem cu a phan ṭhan.

Gorgias dohnak

       32Pentikos tiah an ti bantuk in puai hnu ah Idumaea ralbawi Gorgias kha an va kal hnawh ṭhan. 33Judas cu ke ralkap thongthum le rang ralkap zali hna hmai fong in a tuk, 34cu raltuknak ah Jew hna tlawmpal an thi. 35Tubia ralkap chung in rang ralkap pakhat, paral ṭha ngai a si mi Dositheus an ti mi pa nih khan Gorgias cu a zuan hnawh, a angki fual in a tlaih, a hnuhchih i Pathian chiatserh mi cu a nung in tlaih a zalh; sihmanhsehlaw, Thrasia rang ralkap lak i pakhat nih Dositheus kha a run tlakhnawh i a liang in a phelh tikah Gorgias cu a luat i Marisa ah a zaam. 36 Mah lio ah cun Esdria le a mi hna cu caan saupi an rak i tu cang i an tha a dih tuk cang caah Judas nih Bawipa cu anmah ṭanpitu le hruaitu ah i ser awkah thla a cam.

37Cu tikah ral hla le Pathian hla kha a pupa hna holh in a sak, rin lo kar ah a tuk i Gorgias ralkapbu cu a ṭhio dih hna.

A thi mi hna ca raithawinak

       38Judas cu a ralkap kha a pumh hna i Adullam ah aa thawhpi hna; cuka ah cun zarh i ni sarihnak ni a si bang in an phunglam ning in an i thianh i Sabbath cu an ulh. 39A thaizing ah cun, (a herh tuk cang caah) a thi mi hna ruak kha char in an pupa hna thlaan i an chungkhar hna sin ah vui cang ding Judas kha an rak kawl. 40Sihmanhsehlaw a thi mi hna pakhat cio i an angki leng tang ah khan Phungbia nih Jew hna a thlauh mi Jamnia siasal sin pekchanh mi thil kha an hmuh hna tikah hi hna cu hi ruang ah an thi ti cu mikip lungthin ah a fiang cang. 41Cu tikah an zapi tein thlithup thil hna kha ceunak ah a phuangtu, a ding mi biaceihtu Bawipa thil tuah ning hna cu an thangṭhat i 42an sualnak vialte cu ngaihthiam an si nakhnga thla an campiak hna. 43Cun paralṭha Judas nih a ralkap hna cu sualnak tuah ruang ah a thimi hna kha an mit hrimhrim in an hmuh cang bang in sualnak vialte hrial awkah tha a pek hna; hi hnu ah pakhat cio sin khan tangka a kholh i drakma thonghnih dengmang a hmuh, mah phaisa kha sualthawinak tuahpiak awkah Jerusalem ah a kuat; hi tuahsernak cu thawh ṭhan a zumhnak in a chuak mi a si i a ṭha i a sunglawi ngai. 44Zei cah tiah a thi mi hna cu an tho ṭhan lai ti aa ruahchan lo ahcun mithi ca thlacampiak cu a hleihluat le hruhnak men a si lai, 45cu lio ah thiannak ca a thi mi hna ca ah lawmman sunglawi chiahpiak an si ko ti mi kha aa ruahchannak a si ahcun aa ruahchannak cu a thiang i a ding mi a si. Cucaah sual ngaihthiamnak ca ah hi thawinak cu a pekchanhter hna, cucu annih kha sualnak in an luat khawh nakhnga caah a si.