1 Maccabaeus 5

Idumaeami hna le Ammon mi hna doh awkah i thawhnak

5 A pawngkam miphun hna nih khan biakṭheng an sak ṭhan i hmunthiang kha a hmunkel ah an ser ṭhan ti kha an theih tikah an thin a hung ngaingai i 2 an lak i Jakop tefa hna kha hrawh dih awkah biakhiahnak an ngei; annih kha an thah hna i an ṭhawl hna.

3Judas nih Idumaea i Esau fale hna kha a kalhnawh hna; annih cu Israelmi hna an kulhnak Akrabettani ah khan an um lio a si. Annih kha fak ngai in a den hna, a ṭhawl hna i an chaw cu a chuh hna. 4Beiian fapale hna an ṭhat lonak zong kha a philh lo; hi hna cu lam ah mi bawh an hman caah mipi ca ah ṭihnung le rap an si. 5An khuapi ah khan a kharkhumh hna hnu ah annih kha rawhnak chiatserhnak tang ah a chiah hna; cun an innsang kha a duah hna i mi vialte cu a khanghchih dih hna.  6Cun Ammonmi hnalei ah a va pet i cuka ah cun Timotheus nih a hruai mi ralkap ṭhawngṭhawng le mipi kha a va hmuh hna. 7Annih he voi tampi an i tuk hnu ah a tei hna i a can dih hna. 8Jazer le a khuate hna kha a lak hnu ah Judea ah aa din.

Galile le Gilead tuk hlan i thil a cang mi hna

9 Cun an ram i a um mi Israelmi hna kha hrawh awkah Gilead i Jentailmi hna cu hmunkhat ah an i fun ṭhan. Asinain Israelmi hna tu cu Dathema ralhuang chung ah an i dor, cun 10Judas le a unau hna kha hiti hin ca an kuat hna:

"Kan velchum i Jentailmi hna cu kanmah hrawh awkah hmunkhat ah an i fun cang, 11cun kan i dornak ralhruang cu chim an i tim cang, Timotheus cu an ralbawi a si.  12Tam tuk kan sungh cang caah khulrang in ra ulaw an kut chung in kan khamh u. 13Tobia ram i a um mi kan mi hna cu an thah dih cang hna; an nupi hna le an fale hna cu sal ah an tlaih hna i an thilri vialte cu an lak dih cang; cun minung thongkhat tluk cu an hrawh cang hna," tiah an ti.

14Cakuat an rel lio ah khan Galileelei in hnipuan tlek he cu thawngpang he aa khat mi thawng phortu cu an rak phan ve:  15"Kanmah hrawh awkah Ptolemais le Tair le Sidon i mi hna cu Galile i Jentailmi dihlak hna he an i fun cang," tiah an chim.

       16 Hi bia an theih tikah Judas le a mi hna cu an ral hna kuttang i hremnak a a ing mi an mi hna ca ah zei dah kan tuah lai ti ceihkhan awkah tonpumhnak nganpi an ngei. 17Judas nih a unau Simon cu, “Na mi cu thim hna law Galilee i na mi hna cu va chanh hna, cun keimah le ka naupa Jonathan cu Gileadlei ah kan kal lai," tiah a ti. 18Zechariah fapa Joseph le mipi hruaitu Azariah cu a tang mi ralkapbu he ram ven awkah Judea ah a chiahtak hna i annih kha: 19"Nannih cu kan mi hna zohkhenhtu nan si. Kan rak kir ṭhan hlan cu Jentailmi hna he rak i tu rih hlah u," ti in bia a cah hna. 20 Galilee ah ral va tuk awkah Simon cu ralkap thongthum le Gilead ah ral tuk awkah Judas cu ralkap thongriat ti in an i phaw.

Galilee le Gilead ah Raltuknak

21Simon cu Galilee ah a lut i Jentailmi hna he voi tamnawn an i tu i a hrawh dih hna; 22Ptolemais kutka tiang a dawi hna i thongthum tluk a thah hna, cun an chaw cu a khon dih hna. 23 Galilee le Arbalta i Jewmi hna cu an nupile le an fale le an thilri vialte he Judea ram ah lunglawmhnak nganpi he a rak tlunpi hna.

24Cu lio ah Judas Makabi le a naupa Jonathan cu Jordan tiva kha an tan i thetse ram chung ah nithum chung an kal,25 cuka ah cun Neibataeanmi hna nih hmaipanh ngai in an rak don hna i Galead i an unau hna cung i a cang mi thil vialte hna kha an rak chimh hna; 26 annih nih mi tampi cu ralhau khuapi ngan hna a si mi Bozrah le Bosor, Alema, Chaspho, Mak le Karnaim hna ah an erh ṭhup hna.27 Adang hna cu adang Gilead ram khuapi hna ah khan an kharkhumh hna, cun ral nih hi ralhrau khuapi hna cu thaizing ah tuk in lak ding le a chung um hna cu nikhat ah hrawh dih an timh hna,” tiah an chimh hna.

       28Judas le a ralkapbu cu thetse lam in Bozrah ah an i mer colh. Khuapi kha a lak, pa vialte a saam dih hna i hranchaw vialte a pumh dih hnu ah, a khangh dih. 29 Zan a phanh tikah a chuak i ralhau an phak hna hlan tiang an lan thluahmah.30 Khua a dei i khua a cuan tikah rel cawk lo minung cu ralhruang lak awkah hleihlak le seh hna an timh len kha a hmuh hna; raltuk an thawkka a si. 31Judas nih muko tum thawng le raltuk authawng he raltuk an thawk i ralhranh thawng, van tiang in a than kha a theih tikah, 32 a ralkap hna kha a thawh hna i, "Nan unau hna ca ah nihin raltuk thawk cang u," tiah a ti hna. 33A ralkap kha phuthum ah a ṭhen hna i amah cu hnulei in muko tum thawng le thlacam authawng he an nam hna. 34 Timotheus ralkap hna nih Makabi a si ti an hngalh tikah a hmai khan an zam dih; Makabi nih khan a den dih hna i kha ni hrimhrim ah khan ralkap thongriat tluk a thah hna.35 Cu hnu ah Alemalei ah aa mer i a tuk i pa vialte kha a thah dih hna, cun hranchaw hna kha a pumh dih hna hnu ah khua cu mei in a khangh. 36 Mahka cun a chuak i Chaspho le Maked le Bosor le Galead ram i a tang rih mi khuapi hna kha a lak duahmah hna. 37 Hi thil hnu ah, Timotheus nih a dang ralkapbu kha a pumh ṭhan i vate-nelrawn in khattelei i Raphon ralchan ah khan riahbuk a khuar. 38 Judas nih riahbuk ngiatthlai awkah mi a thlah i annih nih hiti hin an chimh: "Kan pawngkam i Jentailmi vialte cu amah he an i fon dih i ralkapbu ngan taktak ah an i chuah cang, 39 hlanchom Arab ralkap hna kha bawmtu ah an i chiah hna; annih cu vate-nelrawn khatleipi ah khin an riak i nangmah tuk awkah timhcia an si ko cang," tiah an ti. Cu tikah Judas cu anmah he i tuk awkah a chuak i 40 a ralkap hna he tiva kuang a hun naih ah khan, Timotheus nih a ralkap bawi hna cu, "Anmah nih tiva an tan hmasa ahcun kan do kho hna lai lo: zei cah tiah kan cung ah hlawknak tam deuh an ngei lai; 41 sihmanhsehlaw an ṭih i tiva ral ah an riah ahcun ti kan tan lai i hlawknak cu kanmah ta a si lai," tiah a ti hna.

       42 Judas cu tivakuang a phanh cangka in mipi upa hna cu tiva thluang thluan in hmunhma a pek hna i annih kha: "Aho hmanh thlam sakter hna hlah u; raltuknak ah kan kal dih lai," ti in nawl a pek hna. 43 Mi vialte nih an zulh i a mah hrimhrim nih ral hna leikap ah a ṭang hmasa. Dotu Jentailmi hna kha a tei dih hna; annih cu an hriam kha an chiah i Kharnaim hmunthiang i i dor ding ah an zam dih. 44 Jew hna nih khuapi kha an lak hnu ah a chung um hna he an biakinn cu an khangh. Kharnaim khua zong kha a sung i ral nih Judas kha zei ti hmanh in an tuah kho lo.

45 Cu hnu ah Judas nih Gilead i Israelmi vialte hna cu a hme bik in a ngan bik tiang, an nupi, an fale le an ngeih mi chawva vialte he Judea ram ah kalpi ding in a pumh dih hna. 46 Cun lampi aa karkhumh i fek tein kulh mi Efron kha an phan. A laifang in tan dah ti lo, kehlei le orhlei ti in hrialnak lam a um hrimhrim lo. 47Sihmanhsehlaw khuami nih an tanter duh hna lo i hauka cu lungtum pipi in an kham dih. 48Judas nih remnak sertu a palai hna kha a thlah hna i annih kha, "Kan ram phanh awkah nan khua tanpah kan duh ko: mi zei hmanh nih zei harnak hmanh an i pe hna lai lo; kan ke tein kan tan ko lai," tiah a ti hna. Sihmanhsehlaw lam kha an hunpiak duh lo. 49 Cucaah Judas nih a mi tlarpi kha an phanhnak zawn cio ah dir dih ding in nawl a pek hna. 50Ralkap hna cu hmunhma an la; Judas nih chun nitlak le zan khuadei a tuk i khuapi cu a kuttang ah a tla. 51Pa vialte cu vainam in a saam dih hna i khuapi cu a thluk dih, an chawva kha a lak i miruak cung in an khuapi laifang cun a tan. 52Cu hnu ah Jordan kha an tan i Beth-Shean khattelei ral i Hmunrawnpi ah an va lut. 53Judas cu aa ṭhek mi hna hnu zulh in Judea ram an phak hlan lo an lam thluang thluan in thazaang a pek hna. 54Zion Tlang ah khan lunglawm thanuam in an kai i khanghthawinak an pekchanh: zei cah tiah  pakhat hmanh lotlau lo in him tein an rak kir kho.

Jamnia ah a lettalam mi

55Judas le Jonathan cu Gilead ah an um i a naupa Simon cu Ptolemai leng Galilee ram i a um lio ah khan, 56 Joseph fapa Zechariah le Azaniah ralkapbu hruaitu hna nih khan an unau rual hna ralṭhatnak le ral an tuknak hna kha an theih tikah, 57 annih nih: “Kannih zong minṭhatnak kan hmuh ve naklai kal in kan pawngkam miphun hna cu tu ve u sih," tiah an i ti. 58Cucaah an ralkap hna sin ah nawl an chuah i Jamnia tuk awkah an i thawh.  59Cu tikah Gorgias le a mi hna cu khua leng ah an hung chuak i an i tu, 60Joseph le Azariah cu an sung i Judea ramri tiang an dawi hna. Mah ni ah cun Israelmi thonghnih tluk an thi. 61Kan mi cu ral sunghnak nganpi an tong ai; zei cah tiah anmah tluk in ṭhawng ngai in kan tuah kho ve lai tiah an i ruah i Judas le a unau hna bia kha an ngai lo.  62Annih cu Israel luatnak ṭuanvo pek mi chungkhar ah an i tel lo.

Idumaea le Filistin ah hlawhtlinnak

63Sihmanhsehlaw miṭha Judas le a unau hna tu cu Israel ram dihlak le an min an theihnak ram hna poh ah upatnak nganpi an hmu, 64 cun anmah conglawmh duh ah mi cu an rak chuak lulh. 65 Judas cu a unau hna he thlanglei ram i Edommi hna tuk awkah aa thawh: Hebron le a khuate hna kha a phomh hna, an ralhruang cu a thluk hna, a velchum i innsang hna cu an khangh dih hna. 66 Mahka cun a chuah tikah Filistin ah aa thawh i Marisa kha a tanpah. 67Cu ni raltuknak i a thimi hna lak ah khan an ral ṭhatnak kha langhter duh ah ngamhsang tuk in ral a tu ve mi tlangbawi hna zong an i tel ve. 68Cu hnu ah Judas cu Filistin ram chung i Azotus kha aa merhnawh; an biakṭheng kha a lehthal hna i an milem kha a khangh dih hna; an khuapi kha a ruun dih hna hnu ah Judea ah a kir ṭhan.