1 Maccabaeus 10

Alexander Balas cu Jonathan ṭanpinak kha a kawl i tlangbawi ngan rian a pek

10 160 kum ah Antiochus Epifenis fapa Alexander cu ralkapbu nganpi a derh i Ptolemai ah a va lut.  Amah cu ṭha tein an cohlan i khaka ah khan a pennak a hun.  2Hi kong a theih tikah Demetrius cu ralkapbu nganpi a pumh i amah doh awkah aa thawh. 3Cu pin ah Demetrius nih remnak cakuat pakhat a ṭial i Jonathan kha a kuat i amah kha a rian kaiter ding bia a kamh; zei tin tiah amah nih: 4 “Kanmah he ralchanh in Alexander hnatlaknak an ngeih hlan ah kanmah nih mah mi hna he hnatlaknak kan ser hmasa a herh; 5 amah le a unau hna, cun a miphun hna cung ah kan rak tuah mi ṭhatlonnak vialte cu a philh rih lai lo dah?" tiah a ti. 6 Demetrius nih Jonathan cu ralkapbu ser khawhnak, hriam ser khawhnak le ṭangṭi kan si i ti khawhnak a pek hlei ah Ralhau khua i an hren mi hna cu amah sin ah chanh ding tiang nawl a chuah.

       7 Jonathan cu Jerusalem ah dingteo in a kal i cu ca cu mi vialte le Ralhau chung vialte hna theih in a rel. 8 Siangpahrang nih ralkapbu pakhat derhnak nawl a pek ti kha an theih tikah an lau dih. 9 Ralhau khua i thongtla pawl cu Jonathan sin ah an i chan i amah nih an nu le an pa hna sin ah a chanhchin hna. 10 Jonathan cu Jerusalem ah a um i khualipi remh ṭhannak rian kha a thawk. 11Killi ngei lungtum hna in Zion Tlang kha vanpang le cangdol sak awkah ṭuanvo ngei pawl kha ṭuanvo a pek hna.  12Bakhides sak mi ralhau chung i ramdang mi hna nih annih kha an kaltak hna, 13an ram i ah kir awkah pakhat hnu pakhat an rian in an chuak. 14 An i dornak a si bang in Phungbia le phunglam hlaw tlawmpal lawng kha Beth-Zur ah cun an tang.

15 Demetrius nih Jonathan sin ah a kuat mi biakamnak vialte kha siangpahrang Alexander nih a theih tikah, cun Jonathan le a unau hna i raltuknak le an thil tikhawhnak vialte le an ton mi harsatnak vialte kha an chimh tikah, 16 amah nih, “Hi bantuk mi kan hmu ti lai maw?". Amah cu kan hawikom le ṭangṭi ah kan ser hrimhrim a hau," tiah a au. 17Cucaah cakuat pakhat a ṭial i amah kha hiti hin bia a kamh:

       18 Siangpahrang Alexander sin in a unau Jonathan sin ah biakchawnhnak! 19 “Nangmah cu tuahsernak ah a ṭhawng mi le kan hawikom si awkah aa tlak mi pakhat na si ti thawng kan theih. 20Cucaah nihin ah nangmah cu na miphun i Tlangbawi Ngan le ‘Siangpahrang Hawikom’ ah kan in kaiter – amah kha puansen le suiluchin zong a kuatchih –cun zei dah kan herh ti kha na kawl lai i kan i hawikomhnak cu na hmunhter lai,” tiah a ti.  21Jonathan nih kha thilpuan thiang kha 160 kum i thlasarihnak, Deu puai ni ah aa hruk; cun ralkapbu kha a ser i ralhriam tampi kha a ser hna.

Jonathan sin Demetrius pakhatnak cakuat

22Demetrius cu thil a cang mi kha a hmuh tikah a lung a nuam lo.  23Amah nih, "Zei dah kan tuah ko?  Zei tin tiah Jew hna he hawikom ser cu Alexander nih a kan chawhkanh i a dirhmun kha a fehter cang? 24 Keimah zong nih a sin ah nawlnak ca ka ṭial ve lai i amah bawmhnak ding lemnak ca ah minthannak le rumnak laksawng hna kha ka pek ve lai," tiah a ti. 25Cun a tanglei bangin ca a kuat hna.  

  " Demetrius siangpahrang sin in Jew miphun sin biakchawnhnak!

26 "Kanmah he kan biakamnak kha fek tein nan i tlaih peng i kan i hawikomhnak zong kha nan hmunhter i kan ral hna sin ah nan kal lo ti kha kan theih i hi nih hin lawmhnak tampi a kan pek.  27Atu zong ah kanmah cung zumhtlak in nan um peng a si ahcun kanmah aiawh in nan tuah mi caah laksawng tampi kan in pek hna lai. 28 Nanmah cung ah awlhnak le onhnak tampi kan in pek hna lai.

29Atu thawk in, Jew miphun vialte kha ngunkhuai le cite le luchin thawhbur in kan in awlh hna i kan in luatter hna, 30 hihi cu thlairawl cheuthum cheukhat le theitlai cheuhnih cheukhat cu keimah hmuh ding a si ko nain, hi kholhbur hna in atu le hmailei tiang, Judea ram le Samaria-Galilee in benhchih mi pengthum tiang kan in luatter hna. 31 Jerusalem cu a thian bang in a ram dihlak he hi kholhbur le ṭuanvo in a luat lai. 32 Jerusalem Ralhau khua uknak nawl cu ka thlah i tlangbawi ngan kut ah ka chanh, cuti cun amah nih a duh mi ralveng kha a chiah cang hna lai. 33 Ka pennak khuazakip i Judea ral thongtla vialte cu tlanhnak phaisa pek hau lo in ka luatter dih hna i annih cu an dihlak in ngunkhuai zong an pek a hau ti lai lo. 34Ka pennak chung i Jewmi vialte ca ah puaipi vialte, Sabbath ni vialte, Thlathar le puai ngankhun vialte le puai hlan le puai hnu nithum chung cu ulhni le dinhnak a si lai, 35cun aho hmanh nih zei ruang hmanh ah nannih kha hramhram in ngunkhuai halnak nawl le hnahnawhnak nawl an ngei lai lo.

36 Jew pawl cu siangpahrang ralkapbu ah thongsawmthum tiang luhnak nawl an ngei lai i adang siangpahrang ralkap hna he thlahlawh aa khat lai. 37 A cheu cu siangpahrang ralhau ngan hna ah chiah an si lai i a tang mi lak in a cheu cu pennak chung i zumhtlak dirhmun tiang ah rian pek an si lai. Cun siangpahrang nih nawl a chuah cang bang in an ralbawi le hruaitu hna cu anmah chung khan kaiter an si lai i anmah zulhphung tang ah an um lai.

38Cun Samaria ramṭhen in Judea ram ah betchap mi pengthum hna he pehtlai in Judea ram ah fonhchih an si lai i uktu pakhat tang ah an um lai; tlangbawi ngan pakhat nawl lawng kha an zulh lai. 39 Ptolemai le a tang um ram hna cu mipi biaknak ca i a dihheu mi a nguh khawh nakhnga Jerusalem hmunthiang ca ah ka pek.

40 “Cun keimah hrimhrim nih hmundang ngunkhuai in ka hmuh mi siangpahrang ngunkuang chung in ngun tangka shekel thonghleinga cu kum fatin ka pek ve lai. 41 Cun nikum ah zungbawi hna nih an chuahpi lo mi chawva hlei hna cu atu thawk in Biakinn chung rianṭuannak hna ca ah an pek lai. 42 Cu pin ah kumtin cazin ah a langh bang in hmunthiang a miak chung in kholh mi ngun tangka shekel thongnga zong kha Pathian biaknak hruaitu tlangbawi hna ca ah chiahpiak an si rih lai. 43Cun siangpahrang sin le midang sin in leiba a ngeih ruang ah Jerusalem Biakinn chung asilole a kulhchung i aa dor mi vialte cu an leiba in luatter an si lai i ka pennak chung in a ngeih mi an chawva vialte cu pek ṭhan an si lai. 44Hmunthiang saknak le remh ṭhannak he pehtlai in a dih mi phaisa vialte cu siangpahrang ngunkuang chung in pek dih a si lai. 45Jerusalem vanpang sak ṭhannak le a pawngkam kulhnak cu Judea ram adang khualipi hna kulhnak bang in, siangpahrang ngunkuang chung in chuahpiak a si lai.

Jonathan nih Demetrius i zaachanhnak cu a al. Demetrius thihnak

46Jonathan le a mi hna nih hi biatung kha an theih tikah Demetrius nih Israel cung ah a rak tuah mi ṭhat lonak liangluang le zei tin dah a rak hrem hna ti kha ruat in an zum lo i an cohlang kho hna lo. 47Alexander lemsoinak kha an hna a tlak deuh caah amah i zaa chanhnak cu an cohlan i amah he ṭangṭi ah an i cang. 48 Siangpahrang Alexander nih ralkap tampi kha a pumh i Demetrius tuk awkah aa thawh. 49 Siangpahrang pahnih hna cu an i tu i Demetrius ralkap cu an sung, cun amah Alexander kha lungtho ngai in an dawi. 50Ţhawng ngai in amah kha nitlak tiang a tuk. Mah ni ah Demetrius cu a thi.

Kleopetra he Alexander nupi ṭhit puai. Ralbawi ngan bik le uktu ralbawi Jonathan

51 Alexander nih Izip siangpahrang Ptolemy sin ah palai pakhat a thlah i amah kha:

52 "Kan ram ah ka kir cang, ka pupa hna bawi ṭhutdan ah ka ṭhu cang, Demetrius kha ka rialchihnak thawng in ka ram cu ka lak ṭhan cang caah - 53 amah cu ka tuk i amah cu a ralkapbu he kan naanchih cang caah atu a bawiṭhutdan cu ka co cang - 54 atu hawikom sernak minsen thu usih.  Na fanu kha ka nupi ca ah ka pe: na tupa ka si bang in nangmah le amah cu nanmah he a tlak mi laksawng kan pek hna lai,” tiah a ti.

 55Siangpahrang Ptolemy nih a tanglei bang in a leh ve:

       "Na pupa hna ram ah na kir i an bawi ṭhutdan cung na ṭhut ni cu ni sunglawi hrimhrim a si! 56Na cakuat ah na ṭial bang in kan tuahpiak colh lai; sihmanhsehlaw kan i hmuh khawh nakding Ptolemai ah ra, cuti cun na ka hal bang in na pu cu ka si lai,” tiah a leh. 57Ptolemy cu a fanu Kleopetra he Izip ram in a chuak i Ptolemai khua ah cun 162 kum ah a phan. 58Siangpahrang Alexander nih amah cu a va ton, cun siangpahrang Ptolemy nih amah kha a fanu Kleopetra kut cu a pek i siangpahrang hna nih an tuah tawn bang in, Ptolemai khua ah khan ṭhitumhnak puai cu sunglawi ngai in an tuah. 59Cu hnu ah siangpahrang Alexander nih Jonathan cu rat in a mah kha rak ton ding ah ca a kuat. 60Jonathan cu ramuk bawi thuam he Ptolemy ah a kal i siangpahrang pahnih cu a va ton hna; anmah le an hawile hna kha sui le ngun le laksawng tampi kha a pek hna i thangṭhatnak a co ngai. 61 Israel ram chung i mihrokhrol cheukhat cu an i pum i amah kha an hlawt; sihmanhsehlaw siangpahrang nih zei ah a rel hna lo. 62Siangpahrang nih Jonathan cu a hnipuan kha phoihpiak in puansen hruk awkah nawl a pek hna i an tuah colh ve. 63Cu hnu ah siangpahrang nih Jonathan cu a pawng ah a ṭhutter i a ralbawi hna kha, “Amah hi khua laifang tiang va zul ulaw amah cu mi zei hmanh nih sual phawt lo ding le aho hmanh nih a ruang lo in serhsat lo ding va thanh uh,’ tiah a ti 64Cucaah hi thanhnak in amah kha upatnak an pek ti le Jonathan puansen aa hruk kha an hmuh tikah sual a puhtu hna cu an zam dih. 65 Siangpahrang nih amah kha Pakhatnak Hawikom hna lak ah a min a khumhnak thawng in upatnak a pek i amah kha ralbawi nganbik le uktu bawi ngan bik a canter. 66Cun Jonathan cu Jerusalem ah lunglawm le hnangam tein a kir ṭhan.

Demetrius Pahnihnak. Coele-Syria uktu, Apollonia cu Jonathan nih a tei

67 165 kum ah khan Demetrius fapa Demetrius cu Crete in a pupa hna ram ah a rak ra. 68 Cucu siangpahrang Alexander nih a theih tikah a ngaih a chia tuk i Antiok ah a vaa din. 69Siangpahrang Demetrius nih Apollonia cu Coele-Syria ram uktu ah a fehter; Apollonia nih ralkap tampi kha a pumh, Jamnia ah riahbuk a khuar i tlangbawi ngan Jonathan sin ah a tanglei bia a cah:

       70 Keimah doh awkah na thawh tikah nangmah te lawng na si, cucaah kanih a chuak i keimah lila kha sual kaa phaw. Zei ruang ah dah na nawlngeihnak cu tlangcung i kan sunghnak ca ah na hman? 71 Na ralkap thazaang na zumh tak a si ahcun nelrawn ah hin rung ṭum law kan sum i tah hnik usih; keimahleikap cu khuapi thazaang ka ngei. 72 Keimah cu aho ka si i a ka bawmtu hna hi aho an si ti cu hlathlai law fimnak i lak tuah. Na pupa hna cu an vawlei cia ah voihnih tiang ṭhio an rak ton cang caah na ka orh kho lai lo cu na hngalh ko lai, 73 cun dornak ca ah lungpang, lungpi le zei hmanh a um lonak rawn ah cun hi tluk tam ralkapbu le rangcung ralkap hna cu na dirh kho hrimhrim hna lai lo," tiah a ti.

74Apollonia bia a theih tikah Jonathan cu a lung a tho ngaingai; ralkap kha thonghra a thim hna i Jerusalem in a chuak, cun a naupa Simon nih a ralkapbu he a zulh. 75 Khuami nih hauka an rak kharkanh cang caah Apollonia nih Joppa i ral vengtu hna kha Joppa khualeng ah khan a riahpi hna. 76 I tuk hram an thawk tikah khuami cu an thin a phang i kutka kha an hun, cun Jonathan cu Joppa khua chung ah a lut i a um hnawh hna. 77 Hi kong a theih tikah Apollonia cu rang ralkap thongthum le ralkapbu nganpi he khuachung a lut lai bang Azotuslei ah a kal i hmunrawn kha a hei fuh; zei tin tiah khika ah khan aa bochan ngai mi rang ralkap tampi a ngei. 78Jonathan nih anih kha Azota tiang a dawi i mahka ah cun an i tu. 79 Apollonia nih a thli tein rang ralkap thongkhat kha a thuhtak hna. 80 Jonathan nih a hnulei i a ral hna dirhmun kha a hngalh ve. Rang ralkap hna nih a ralkap hna cu an kulh hna i a mi hna kha li le thal in zingka in zanlei tiang an kah hna. 81 Sihmanhsehlaw a ralkap hna cu Jonathan nih nawl a pek hna bang in fek tein an dir ko. 82 Rang ralkap hna an tha a dih tikah Simon nih amah ralkap kha a thlahpiak, maan cikcek in an den hna i an ṭhio hna. 83Rang ralkap hna cu rawn ah khan an i ṭhek dih i Azotalei ah an zam; cun an sialsal biakinn, Beth-Dakon hmunthiang ah khan an i dor. 84 Sihmanhsehlaw Jonathan nih Azota le a pawngkam khuapi dang hna kha a khangh i a ramh hna, cun Dakon Biakinn cu a chung-um ralzam hna he a khanghchih.  85 Ral cu an sung i vainam in a thi mi he mei nih thi lak a kangh mi hna he an dihlak in thongriat tluk an si. 86 Jonathan cu a chuak i Askalon khualeng ah khan riahbuk a khuar, mahka ah  cun khuami hna nih laam le hla he an va ton. 87Jonathan cu hranchaw khatlak aa phorh mi he a zultu hna he Jerusalem ah a tlung ṭhan.  88Siangpahrang Alexander nih thil a cang mi kong a theih tikah, Jonathan kha upatnak tampi a pek rih. 89 Amah kha siangpahrang unau hna sin ah pek tawn mi sui medal kha a kuat; cun, Ekron khua le a kiangkap ram chung ah nawl ngeitu sinak kha a pek rih.