1 Maccabaeus 7

Dimetrius pakhatnak siangpahrang a cang, cun Bakhides le Alcimus cu Judea ah a kuat hna.

7 151 kum ah khan Seleucus fapa Dimetrius cu Rom in a chuak i a mi tlawmte he rilikam khuapi pakhat ah a rak phan i cuka ahcun a pennak a hun.  2Zei tin dah thil a can ti ahcun a pupa hna umnak hmun a vun luh ah khan ralkapbu nih Antiochus le Lysias cu an tlaih hna i a sin ah ratpi an timh hna. 3Hi bia a theih tikah, "Ka hmuh lonak ah va chia hna u," tiah a ti hna. 4Ralkap nih an thah hna i Dimetrius cu siangpahrang a cang. 5Mah hnu ah cun tlangbawi ngan can a duh mi Alcimus nih a hruai mi, phunglam le biaknak zei a rel lo mi, Israel mi hna cu 6Siangpahrang sin ah an va kal i a hmai ah kan mi cu an kan hlawt. Annih nih: “Judas le a unau hna nih na hawi vialte kha an thah hna i kannih cu kan ram in an kan ṭhawl cang. 7Cucaah atu na zumh mi pakhat kha thlah law Judas nih kanmah cung le na pennak chung ah a tlunter mi rawhralnak vialte cu va zoh seh, cun amah nih ṭhat lonak a tuah mi le a bawmtu vialte cu dan tat hna seh,” tiah an va ti.  

       8 Siangpahrang nih siangpahrang Hawi hna lak i pakhat, Transeu-pharets uktu Bakhides kha a thim, amah cu pennak chung i bochan ngai mi le siangpahrang bia a ngai ngai mi a si. 9Amah cu Tlangbawi ngan cang ding a fehter mi pathian hngal lo Alcimus he khan a thlah i Israel misual teirul cham khawhnak nawl he a thlah. 10 Cucaah annih cu ralkap tampi he an chuak i Judea ram an phak tikah Judas le a unau hna sin ah palai an hei thlah i annih kha remnak ser awkah a chimhter hna, nain rawiphiarnak men a si. 11 Ralkap tampi hna he an rat kha an hngalh caah an bia kha an zum hrimhrim lo. 12Asinain phungbia cawnpiaktu phukhat cu remnak minthut awkah Alcimus le Bakhides hmai ah an va chuak. 13 Israelmi hna lak ah daihnak a hna a tla hmasa pawl cu Hasidian hna hi an si, 14 annih nih, “Hihi ralkap tampi he a ra mi Aaron chung i tlangbawi a si ko; kan cung ah ṭhat lonak a tuah lai lo,” tiah an ruah. 15Anmah he daihnak bia a ceihpi hna i hiti hin bia a kamh hna: "Nanmah le nan hawile hna kha fahnak pek kan i zuam lai lo,” tiah a ti hna. 16Amah cu an zumh; sihmanhsehlaw an sawmruk ning in a tlaih hna i nikhat chung ah a thah dih hna, cuti cun cathiang bia: 17 Na mithiang hna ruak cu an hlonh men hna, cun Jerusalem cu an thisen in a khat dih, a vuitu ding pakhat hmanh an nganhtak lo,” ti mi cu a hung tling 18Hi tikah mi vialte cu thinphan thlalau in an um i annih, "An chung ah biatak le ziaza ṭhatnak a pelte hmanh a um lo; hnatlaknak le chiatserhnak an tuah mi vialte an hrawh dih cang,”tiah an ti.

19 Bakhides cu Jerusalem in a chuak i Beth-Zeth ah khan a riak, cun mi kha a thlah i amah a kaltak mi tampi le kanmah mi tlawmpal zong kha an tlaih hna; cun annih kha a thahter hna i tikhor thukpi chung ah a thlakter hna. 20Alcimus kha ramṭhen uktu ah a chiah i amah bawmtu ding ah ralkapbu bukhat zong kha a chiahtak rih fawn; Bakhides tu cu siangpahrang sin ah a kir ṭhan. 21Alcimus cu tlangbawi ngan si awkah aa zuam rih ko; 22 cun mipi daihnak hna a hnawhtu vialte cu amah he an i kawm; cun Judea kha a kuttang i a chiah hnu ah Israel ah khan harnak tampi a tuah. 23 Alcimus le a hawile hna nih Israel cung ah an tuah mi palhnak cu Jentailmi hna nih an tuah mi nakin a tam deuh ti mi kha an hmuh tikah, 24 Judas cu amah a zaamtak mi hna kha teirul cham awk le ram chung ah duhduh in an cawlcanghnak kha khamh awkah Judea ram cu a vak.  

Judea ram i Nikanor le Kaphar-Salama ah i dohnak

25 Alcimus nih Judas cu zei tluk in an ṭhawn i a bawmtu hna cu zei tluk in dah an tlak cang i anmah dohnak ding thazaang a ngei ti lo ti kha a hngalh tikah siangpahrang sin ah a kir i anmah ṭhat lonak kong lawngte kha a va chim. 26 Cu tikah siangpahrang cu a ralbawi hna lak ah pakhat, a min a thang mi le Israel a hua tuk mi Nikanor kha a thlah i Israelmi kha hloh dih ding ah nawl a pek. 27 Ralkap tampi he Jerusalem a phanh tikah Nikanor nih Judas le a hawile hna kha hiti hin hawikomhnak bantuk in rawiphiarnak ca kha a kuat hna:  28"Nanmah le kanmah karlak ah raltuknak um hlah seh, nanmah he i ton awkah ralkap tlawmte he ka ra lai," tiah a ti hna. 29 Judas he an i tong i daihnak in an i chawn; sihmanhsehlaw ral hna nih cun Judas kha fir ding ah timhtuahnak an rak ngei ziar! 30 Nikanor cu amah sin ah leirawinak lungthin he a rat kha a hngalh tikah Judas cu a lau i ton a duh ṭhan ti lo. 31 Nikanor nih kaa timhtuahnak an hngalh cang ti kha a hngalh tikah Kaphar-Salama pawng ah khan Judas cu a tuk. 32 Nikanor minung zanga hrawng an thi i a tang mi hna cu David Khualipi ah an i dor.

Biakinn ralchanh in ṭhihphaihnak

33 Hi hnu ah hin Nikanor cu Zion Tlang ah a va kai. Amah kha hawikomhnak in don awkah tlangbawi cheukhat cu upa cheukhat hna he a Thiang Hmun khan an rak chuak i amah siangpahrang ca i an tuahpiak mi khanghthawinak kha an hmuhsak. 34Sihmanhsehlaw annih kha a nihsawh, capo in a saih hna, a serhsat hna, cun a thinhun in hiti hin chiatserh in bia a kam mi cu: 35 Judas kha a ralkap hna he atu bak ah hin nan ka chanh lo a si ah cun bia kan kamh hna, him tein ka rak kir cangka in hi hmunthiang cu ka khangh lai,” tiah a ti hna. 36Cun thinhung ngai in a chuak. Cun tlangbawi hna cu an lut ṭhan, ṭah bu in biakṭheng le Biakinn hmai ah dir in, 37 “Bawipa, hi innpi cu na min in auh awkah na mi hna ca thlacamnak le nawlnak inn si awkah na rak thim. 38 Hi pa le a ralkap hna cu teirul cham hna law vainam in that ko hna; na thang an in chiatnak kha philh hlah law hnangamnak pe hna hlah,” tiah thla an cam.

Adasa i ‘Nikanor Ni’

39 Nikanor cu Jerusalem in a chuak i Beth-Haron ah a riak, mahka ah cun Syria in ralkap hna an hun i betchih. 40 Mah lio ah Judas cu Adasa ah minung thongthum hna he riahbuk a khuar ve i hiti hin thla a cam: 41 “Siangpahrang palai nih an thangchiat tikah na vancungmi hna cu an chuak i a mi thongzakhat thongsawmriat le thongnga kha a rak thah dih hna. 42 Cu bang in hi ralkapbu na den kha nihin ah hmu u si law mikip nih hipa nih na hmunthiang thangchiat in bia a chim cang ti kha hngal hna seh: a ṭhat lonak he aa tlak mi dantatnak kha pe ko,”

43Kaphnih ralkap hna cu Adar thla ni hleithum ni ah an i tong, cun Nikanor ralkapbu cu an sung i amah cu a thi hmasa bik a si. 44 Nikanor a thih kha a ralkap hna nih an hmuh tikah an hriam cu an hlonhtak hna i an zam dih. 45 Jew hna nih Adasa in Kezar tiang nikhat lamkal chung an dawi hna, an hnu in an dawipah hna in ralrin peknak ah muko an tumpah; 46 cun Judea pawngkam khuate i mi vialte cu ralzam hna dum awkah an rak chuak, ralzaam hna cu anmah mi lila kha an mer hnawh hna. Pakhat hmanh tang lo in an thi dih. 47An hranchaw le an thilri  an pumh dih hnuah Nikanor lu le porhlawtnak he a hler mi a orhlei kut cu an tan; cun an put i  Jerusalem i zapi hmuh khawhnak hmun ah an tar hna. 48 Mipi cu an i lawm tuk i cu ni cu dinhni ah an hman;49 Ataktak in kum fatin Adar thla ni 13 ni ah puai tuah ding in bia an chah. 50 Caan tawite cu Judea nih daihnak a hmu.