1 Maccabaeus 16

Sendebi cung ah Simon fapale hna teinak

16 1Cu hnu ah Johan cu Kezar in a kai i Sendebius nih a tuah mi thil cu a pa Simon kha a va chimh. 2Cu tikah Simon nih a fapa upa pahnih Judas le Johan kha a auh hna i annih kha, “Keimah le ka unau le ka pa Chung cu kan no lio tein nihin tiang Israel ral kha kan tuk cang hna, cun voi tampi cu Israel tlanhnak ah kan hlawh a tling ko. 3Sihmanhsehlaw atu keimah cu ka tar cang i nanmah cu Vancung zaangfahnak thawng in nan chan saling a si; keimah le ka u hmun kha la ulaw kan miphun ca ah ral tu uh, cun Vancung bawmhnak cu nanmah he um ko seh,” tiah a ti hna. 4Cu hnu ah ramchung raltu kho le rang ralkap thongkul kha a thim hna, cun hi hna cu Sendebi doh awkah an chuak i Modein ah khan an riak. 5Tuante in an tho i nelrawnlei ah an kal, an hmai in ke ralkap le rang ralkapbu nganpi an rat kha an va hmuh; asinain an karlak ah tiva-kuang pakhat cu a um. 6Johan le a minung hna cu hmunhma lak in timhcia in an um. Asinain a mi hna nih ti tan an ṭih a hmuh tikah amah nih a tan hmasa. A mi hna nih an hmuh tikah a hnu zulh in an tan ve.  7An ral ralkap hna cu an tam tuk caah a ralkapbu kha phuhnih ah a ṭhen hna, rangcung ralkap kha a lai ah, cun ke ralkap kha a sir veve ah a chiah hna. 8Muko thawng a than tikah Sendebius le a ralkap hna cu an zaam, tampi cu thi deng in an i hliam i a tang mi cu ralhau kulh chung ah an zaam. 9Cuka ah cun Johan naupa Judas cu hma a pu; sihmanhsehlaw Johan nih Sendebius cu amah nih a rak sak ṭhan mi Kedron a phak tiang a dawi. 10Azota tlangram innsang tiang a dawi hna i Johan nih innsang cu a khangh dih. Ral nih an minung thonghra tiang an sung, Johan cu Judea ram ah him tein a rak kir.

Dok ah ṭihnung Simon thihnak. A fapa Johan nih a chaan

11Abubos fapa Ptolemy cu Jeriko nelrawn ah khan ralbawi lu bik ah an rak thim cang; amah cu sui le ngun tampi a ngei, cun amah cu tlangbawi ngan tupa zong a si. 12A saduhthah a ngan; ram pumpaluk saya si ding aa ruahchan, cucaah Simon le a fapa hna kha rawiphiar in hrawh ding khua kha a khaan. 13Simon cu ramchung i khuapi hna kha a tlawn i zohfelnak a tuahpah in kum 172 kum, thlahleikhatnak thla, Sebat thla ah a fapale hna a si mi Mattathias le Judas hna he khan Jeriko ah a rak phan. 14Abubos fapa nih annih kha amah hrimhrim nih a rak dirh mi Dok ti mi ralhau ah a lem hna i mahka ahcun rawl a dangh hna, nain mahka ah khan a mi hna kha a rak thuh diam cang hna. 15Simon le a fapale hna cu an rit tikah Ptolemy le a hawile hna nih an hriamnam cu an i lak zau i annih kha mah khaan chung ah cun an zuanhnawh i Simon cu a fapale pahnih hna le a salle cheukhat hna he an thah hna. 16Cuti cun rawiphiarnak nganpi kha a tuah i ṭhatnak cu chiatnak in a cham.  

       17Ptolemy cu ralkap tam deuh chap ding le khualipi le ramṭhen hna kha amah kut tang ah chiah ding ruahchan in thil si ning kha a ṭial i siangpahrang cu a kuat. 18Johan thah awkah a mi kha Kezar zong ah a thlah hna, cun sui le ngun le laksawng hna i lak awkah amah sin rat ding  in ralkapbawi hna kha ca a kuat hna; 19cun Jerusalem le Biakinnpi Tlang zong kha lak awkah midang kha a thlah fawn hna. 20Sihmanhsehlaw mi pakhat cu a chuak i Kezar um Johan cu a pa le a unau hna cu an thi cang ti kha a va chimh manh, cun amah nih, "Nangmah thah ding zong mi pakhat a thlah,” ti a chimhchih. 21Johan cu mah thawngpang nih khan a lauter tuk, amah thah awkah a ra mi hna cu lainawn an i timhnak kha a theihcia caah a tlaih hna i a thah dih hna. 23Johan i adang a cawlcanghnak, ral a tuk mi hna le ral chimnak a tuah mi hna, a dirh mi khualipi vanpang hna,  24 tlangbawi ngan sinak in a pa a chan thawk in adang a hlawhtlinnak vialte cu tlangbawi ngan a ṭuannak kumtin cauk ah khumh dih an si ko.