SIRACH 25

Phungthluk bia

25    1Ka duh ngai mi thil pathum a um, cucu Pathian le minung vialte lung a nuamhtertu an si: unau hna lungkhahnak, innpa hna i hawikomhnak le nuam ngai in khua a sa ṭimi nupi le pasal an si. 2Ka huat ngai mi minung phunthum an um i an tlonlen ning cu ka fih ngai, cu hna cu porhlawtnak he a khat mi misifak, lihchim mirum le thluak ngei lo ṭangdangpom tarpa hna an si.

Putar pitar hna

3Na no lio ah zei hmanh na rak khon lo ahcun na tar tikah zei dah na hmuh ti lai? 4Zei tluk thil ṭha dah: a khuaruahnak a hmaan mi sampar, cun zei tin ruahnak pek ding ti a hngal mi khahmul sau! Zei tluk thil ṭha dah: 5Upa le fimnak, cun min ngei hna sin in ruahnak ṭha! 6Upa hna i sui luchin cu hmuhtonnak tam a si i an sunparnak cu Bawipa ṭihnak a si.  

Phungthluk bia a phunphun

7Lawmhnak a ka pe khotu ka timi thil pakua ka ruah khawh, cun a pahranak cu atu ka lei ah a um: cucu a fale aa uangthlar kho mi, a ral hna an tlak a hmu kho mi; 8khua a ruat kho mi nupi inn ah a chiahtak mi,  laa le caw he rian a ṭuan lo mi; a hmurka in a  sual rih lo mi; amah nakin a niam deuhmi kha a rian lo mi cu milunglawm a si. 9Lungfimnak a ngei mi le bia a chim tikah mi nih an ngaihpiak mi cu milunglawm a si; 10Fimnak a hmu cang mi cu zei tluk in dah a lianhngan, nain Bawipa a ṭihmi cu aho hmanh nih an tluk lo. 11Bawipa ṭih cu zeizongte cung ah a um i cu bantuk cu zei he dah kan tahchunh khawh hnga? 12 Bawipa ṭihzah cu zei zongte nak in a sang deuh, Hi hna a ngei cang mi cu aho nih dah a zuamcawh khawh lai?

Nule hna

13Zawtnak lak ah lung zawtnak! Thinchiatnak lak ah nu thinchiatnak! 14Ṭhat lonak lak ah ral nih a chuahpi mi ṭhat lonak! Teirul chamnak lak ah ral nih teirul chamnak! 15Sivai lak ah rul sivai tluk in a ṭhawng mi a um lo, Thinhunnak lak ah mah ral cung i thinhunnak nakin a fak deuh mi a um lo. 16Huattlai nupi he um nakin chiandeih le limkeng he um a ṭha deuh. 17Thinchiatnak nih nu cu a muisam a thlen i a hmai cu vom hmai bang a hinghter. 18A vapa cu a innpa hna he rawl ei awkah a chuah tikah a thawpi lawng a chuah ko.  19Nu thinchiatnak a tluk mi thinchiatnak a um lo, misual hna covo cu amah covo si hram seh.

20Tarpi nih thetsetlang a kai bantuk in a lung a dai mi ca ah a holh a tam tuk mi nu cu a si ve. 21Nu iang nih in hruhter hlah seh, nu ah na thluak tlau hin hlah seh. 22Nupi nih a va kha a cawm tikah chungkhar cu thinhunnak, hrocernak le ningzahnak in a khat.

 23Nu thinchia hna covo cu lungdonghnak, hmaichiatnak le lungfahnak hna hi an si. A vapa a lawmhter lo mi nupi ca ah cun thadihnak le zaangennak lawngte a si. 24Sualnak cu nu in aa thawk, kan thih dih te lai caah a mah cu lawm uh. 25Ti cu zuhter hlah, mithinchia nu cu duhduh in bia chimter hlah. 26Na chimh bangin a tuah lo ahcun maa ko.