SIRACH 43

Ninu

43 1Van kaupi cu van sang i a sunparnak a si. Cu bantuk cu van hna an i dawhnak cu a si, a sunglawi mi khuaceu! 2 “Nika cu a rak man tikah a chuahnak kha a thanh,  ‘Cungnung Bik tuah mi thil cu zei tluk khuaruahhar dah an si,’ tiah a ti.  3Lu cung a phanh tikah vawlei cu a kahter, aho dah a linhnak cu a celh lai?  4Meiphu cu a linhnak chuahpi awkah chemchih a hau, sihmanhsehlaw ni nih cun tlang kha a letthum in a kangh; a thawchuah cu mei-alh a si, a alh hluahmah i mit a cerh tuk. 5Amah a sertu Bawipa cu a lianngan i a bia nih khan a lamthluan bang in khulrang in a kalter.

Thlapa

6Cun hnu ah thlapa, khuacaan rel awkah caan hmaan tein a kal, a hmun mi  hmelchunhnak: 7Puai hna a thanhtu cu thlapa a si, a lai hnu ah a kuai ṭhan.  8Thla hna cu amah min in a ra mi a si i duhsah tein phazawngdan bang khuaruahhar in a ziam dutmat; van ralkap bu hna thantar, cung van ah khan a ceu ko.

Arfi hna

9Arfi hna sunparnak nih van cu a dawhter, Cungsang um Bawipa sunlawinak thuam a si.  10A thianghlim mi Bawi bia bang in an dir i ralven an tlolh bal lo.

Chuncha hna

11Chuncha khi zoh law a Sertu cu thangṭhat tuah, zei tluk in dah an i dawh.  12Van khatlei in khatlei tiang sunglawi ngai in a kuaipi in a ser, Cungnung Bik kutṭial a si.

Ser mi thil hna khuaruahhar

13Amah nawl peknak in hawhra cu a umter, a nawl peknak in mimtlau a lekter. 14Cu bantuk in a chawbuk cu aa hun i minmei cu vate bang an zuang thluahmah hna.  15A lianngan mi a ṭhawnnak nih minmei cu a hahter hna i rial in a tlakter. A khuari a tur tikah vawlei nih nganfahnak a in, 16 a hmaika ah cun tlang cu an ther; A duh tikah thlanglei thli cu an hrang, 17 cun thlichia le thliher cu chaklei in an hrang ve. 18Vate aa fut bang hawhra cu nem tein a theh, aa fumi khaubok bang an rung ṭum. Mit cu a rang mi aa dawhnak ah khan a khuaruah a har i lungthin cu an ṭum kha a hmuh tikah a ar ko. 19Hawhra cu vawlei ah cite bang a phulh; an tit tikah hlingbor bang an si.

20Chaklei in thlikik a hrang, ti cung ah khan tikhal pi an chuak ṭangphaw bang an khuh dih; 21Thli nih tlang cu a dolh hna i thetse ram ah a ser, mei bang ramhring vialte kha an ut dih. 22Sihmanhsehlaw minmei nih damnak sii kha khulrang in a pek colh i ni linh hnu ah dap nih lawmhnak a pek ṭhan.

23A lung ṭhawnnak thawng in rili thukpi cu a nun a nemter i tikulh ram hna he a phunṭi hna. 24Rili in khual a tlawng mi nih ṭih a nunzia cu an chim i an chim mi nih kan hnar cu a khuaruah a harter: 25zei cah tiah cuka zong ah cun khuaruahhar thil an um ve, saram phuntling le rili saram ngan pipi hna an um. 26Pathian cu lawm hna usih, zei cah tiah a lamkaltu rilikam a phak khawh i zei zongte cu a bia ning in an si.

27Hi nak tam kan chim khawh rih i kan chim dih bal lai lo; a dik ning in chim ahcun, ‘Amah cu zeizongte,’ a si.

28Amah kha thangṭhat awkah khua zei ah dah a za in thazaang kan hmuh lai, zei tin tiah amah cu a tuah mi vialte cung i a um mi, Lianngan Bawi, 29khuaruahhar bawipa, khuaruahhar in a lianngan mi, cun a ṭhawnnak ah khuaruahhar mi a si. 30Bawipa cu hlorh in thangṭhat tuah u, zei tluk nan lianhngan zong ah amah cu–nangmah nakin a sang deuh rih. Amah kha na conglawmh tikah na thazaang dihlak-chuah, na tha ba hlah seh –a donghnak cu na phan bal lai lo. 31Amah kong chim awkah aho dah amah cu a rak hmu bal? Aho nih dah aa tlak ning in sunparnak a pek khawh lai?  32 B Biathuk tampi le hi hna nakin a lianngan mi biathuk tampi an tang rih, zei cah tiah a tuah mi thil tlawmte lawng kan hmuh rih, 33Bawipa hrimhrim nih zei zongte cu a ser hna i biaknak aa zuam mi hna kha fimnak a pek chap rih hna.