SUAL THLAHNAK 2

Tahchunh khawh lo zangfahnak in a kan dawtu le a kan tlanhtu Bawipa, kan thlarau hnangamter awk caah le na lianngannak langhter awkah sualthlahnak sacrament kha tha tein ka hmuh khawhnak hnga caah bawmhnak rak ka zangfah hram ko.

Bawi Jesuh nu le ka nu a si mi Ngaknu Thiang Mary, ka sualnak le ka palhnak vialte kha fiang tein ka hmuh khawhnak hnga le ka theih khawhnak ding caah siseh, a thalo mi vialte kha ka hlawt khawhnak hnga caah siseh, ka sual palhnak vialte kha thuhpheh lo in ka phuan khawhnak hnga, na Fapa Jesuh sinin bawmhnak vel ka halpiak hram ko.

4. Lungthin I Dahnak

Sualnak hngalh awkah a tanglei bangin lungthin i dah awk a si.

1. Nawlbia pakhatnak he aa ralchan mi sualnak hna:

- Pathian kha hlawt in pathian dang a si mi khuachia, milem, siasal, kha ka bia hna maw?

- Pathian nakin aanaa, rumnak, nuamhnak leminung cungah ka bochan deuh maw?

- Bedin kutlam zoh le tuakthiam mi ka rawih hna maw?

- Camh thil kha ka hmang hna maw?

  Hrirai biaknak ka hmang maw?

- Khuavang he i pehtlaihnak ka ngei maw? Mang ih ka hmang maw?

- Zumhnak bia ah lungawtawm in ka um maw?

- Zumhnak bia pakhatkhat kha hmurka in siseh ziaza in siseh ka al maw?

- Biaknak he aa ralchan mi ca ka rel maw? ka tial maw, ka phaw hna maw?

- Ka lung duhning in thil a can lo tikah, Pathian ka mawhchiat maw?

- Thlacam ka daithlang maw?

- Zumhnak bia cawnpiaknak ka tuah maw?

- Zumhnak bia le tuahsernak kha ka zahpi maw?

- Sacrament thiang hna hi a tlak loin ka cohlang maw?

- Pathian kong biatak kha hngalh awk le cawn awkah kaa zuam maw?

2. Nawlbia pahnihnak he aa ralchan mi sualnak hna:

- Pathian min kha upat loin ka hmang maw?

- Bu dang cawnpiaknak ngaih awkah ka fuh hna maw?

- Pathian min kha sullam ngei loin chiatserhnak le biakamnak ah ka hmang maw?

- Pathian sin i ka tuah mi biakamnak kha zulh lo le tuah loin ka um maw?

3. Nawlbia pathumnak he aa ralchan mi sualnak hna:

- Zarhpi ni le ulh awk ni caan ah kaa pum maw?

- Zarhpi ni ulhnak hi zei rel loin ka um maw?

- Missa ngaih ka zuam maw? Ka lung a vaivuan maw?

- Midang kha Zarhpini ulh awkah tha ka pe hna maw, ka forh hna maw?

- Zarhpini ah pumsa nuamhnak in caan ka hmang maw?

- Zarhpini ah thatnak tuah loin ka um maw?

- Rian hrang tuannak in ulhnak ni kha ka buar maw?

- Pathian le mithiang si hna seh, a thiang mi thil si hna seh, upatlonak, zawmhtaih serhsatnak ka tuah ka chim maw?

4. Nawlbia palinak he aa ralchan mi sualnak hna:

- Ka nu le ka pa ka upat hna maw?

- An bia ngaih loin keimah duhnak in khua ka sa maw?

- An thin ka hunter hna maw? An thil ka firpiak ka hrawhpiak hna maw?

- Innchungkhar ca i a herh mi rian kha tuan loin ka um maw?

- Chungkhar thlacam caan ah kaa tel maw, zei rel loin ka um maw?

- Ka unau hna he rem tein ka um maw?An caah thatnak ka tuah maw?

- Fale hna fimnak, ngandamnak le an zumh-fehnak caah lungtak tein ka tuan maw?

- Fale ka cawnpiak hna maw? An sual an palh tikah ka chimhhring hna maw?

- Ka fale kha hmurka le ziaza in a thalo mi ka hmuhsak hna maw?

5. Nawlbia panganak he aa ralchan mi sualnak hna:

- Mi ka that hna maw?

- Keimah lila siseh, midang siseh, thah ka duh maw, timhnak ruahnak ka ngei maw?

- Ka thin a hung maw? Ka thinhunnak kha daihter loin saupi tiang ka um maw?

- Midang cungah fahnak ka tuah maw?

- Midang cungah lehrulh duhnak lungthin ka ngei maw?

- Mi ka ngiar hna maw? Kaa si kaa vel maw?

- Mi i chuihpah sual hna seh tiah forh, hlen, fial, tuksawh, tipiak ka hmang maw?

- Nau ka that maw? Hrin kaa phit maw?

Hrinphihnak sii le thilri ka hmang maw?

6. Nawlbia paruknak le pakuanak he aa ralchan mi sualnak hna:

- Nungak/ tlangval he ka sual maw?

- Mi nupi/ mi va ka sualpi hna maw?

- Paa le paa, nuu le nuu, keimah pum cung lila ah sualnak ka tuah maw?

- Nuu le paa sualnak kha duhnak he lungtho tein ka ruat, ka chim, ka tuah maw?

- Hawr sualnak lam hi hrial kaa zuam maw?

- Mahte, mi he, zerpannak ka tuah, ka rel maw?

- Mi kha sualnak lam ka hmuhsak hna maw?

7. Nawlbia pasarihnak le pahranak he aa ralchan mi sualnak hna:

- Mi thil ka fir maw, ka fir mi kha pek than loin ka um maw?

- Mi thil kha mitthit in ka hngar hna maw?

- Mi thil ka hrawk maw?

- Lei ka bat mi cham duh loin ka um maw?

- Mi thil ka hleng hna maw? Ka ei ka hmuar hna maw?

- Cheuhra cheukhat asiloah ahlu ka pe maw?

- Biakinn thil le Bupi thil siseh, tlang thil siseh, keimah pumpak thathnemnak caah ka hmang maw?

- Midang kha firduhnak lungthin ka forh hna maw? Fir mi thil cohlan awkah tha ka pe hna maw?

- Mi nihlawh hmaan tein ka pe hna maw?

- Ka nihlawh man zat in rian ka tuan maw?

- Mi thil kha hramhram in ka chut hna maw?

8. Nawlbia pariatnak he aa ralchan mi sualnak hna:

- Biahman chim loin lih chim ka hmang maw?

- Mi thangchiat ka hmang maw?

- A hmaan lo mi bia ah tette ka khaan maw?

- Ziarngeih bia chim ka hmang maw?

- Thatlonak bia an chim tikah lungtak tein kaa tel maw?

- Mi sual phuanpiak le sualphawtnak in mi ningzahter mualphoternak ka tuah maw?

- Mi i ral hna seh tiah bia ka tuksawh hna maw?

Thihnak Sualhrampi Pasarih

(Seven Deadly Sins)

Sualhrampi hna cu;

1. Ruamkainak: Kaa porhlaw maw? Mi ka nautat hna maw? Mi tangah kaa dor maw?

2. Hakkauhnak: Keimah zawn lawng kaa ruat maw? Nuhmei, ngaktah, sifak zawn ka ruat maw? Mi thil ka duh tuk maw?

3. Thinhunnak: Mi cungah ka thin a hung maw? Ka ral hna maw? Kaa si kaa vel maw? Mi ka hua hna maw?

4. Hawrnak: Thisa duhnak lungthin kha kaa sum maw?

5. Thathutnak: Ka tha a thu maw? Ka daithlang maw chuahter.Thatnak tuah zuam loin ka um maw?

6. Nahchuahnak: Mi ka nahchuah hna maw? Ziar ka ngei maw? Mi rawhnak ka tuah maw? Mi harnak an ton ah ka lung a riam maw?

7. Orkhutnak: Ti le rawl, zuu le sa, luan tuk in ka ei ka ding maw? Eidin awkah mi kha ka lemsoi ka forhfial hna maw?

Khrifabu nawlbia paruk hna cungah sualnak hna

- Zarhpi ni le biaknak puai ni ah Missa `ha tein ka ngai maw?

- Sualthlah ka daithlang maw?

- Sualnak pakhatkhat kha phuang duh loin ka pheh ka thup maw? Lungchung biatak in ngaihchihnak ngeih loin sual ka thlah maw?

- Bawipa Thisa ei ka daithlang maw? A tlak loin ka ei maw?

- Sa le rawl ulhnak kha tuah loin ka um sual maw?

- Sa le rawl ulh phung kha tha pek loin ka um maw?

- Bupi riantuannak ah bawmh loin ka um maw? Ka thazang le ka ngeihchiah ka siang maw?

- Bupi riantuantu hna kha ka bawm hna maw? Upatnak ka pe hna maw?

- Thitumnak kha ulhnak caan ah ka tuah maw? Ulhnak caan thiang kha buar awkah midang kha ka forh hna maw? Tha ka pe hna maw?

Voi zeizat dah?

(Thlarau nunning a san bantuk in sual hmete zong hi sual ngan in hmuh khawh a si. Hika chungah hin sualnak a zapi in tial dih khawh a si lo caah lungthin a thurter mi sualnak paohpaoh kha lungthin i dah in ruah le phuan i zuam awk a si.)