1 Maccabaeus 8

Rom hna thangṭhatnak

8 Atu cu Judas nih Rom miphun hna minthannak: zei tluk in an ṭhawn i anmah he an tinhnak a khat mi hna cung ah zei tluk in dah an ṭhat, anmah a fuk mi hna poh kha hawikom biakamnak an tuah hna ti kha a theih.  2(cun an ṭhawn ning cu a mak taktak ko). Gaul hna he ral an i tuknak le an thiamzia, annih kha an tei hna i ngunkhuai an kholh hna, 3an sui le an ngun khor hna lak awkah Spain ramṭhen ah thil an tuah mi, 4an ram in a hlat ngai nain an lung fehnak le teimaknak thawng in an ram pumpaluk i bawi an i ser ning; anmah tuk awkah vawlei deng in a ra mi siangpahrang hna kha anmah tu nih an den hna i harnak an pek hna ning, cun  annih kha kumtin ngunkhuai a pe mi adang hna kong; 5 anmah doh a ngamh mi Philip, Kittim siangpahrang Perseus le adang hna kha zei tin dah an tei i an kut tang ah an chiah hna ning, 6cu lio ah, anmah doh awkah vui 120, rang ralkap,  rangleng hna le ralkapbu nganpi he a rak ra mi Asia siangpahrang, siangpahrang Lian Antiochus kha an tei cikcek ning; 7a nung in an tlaih, cun lungtlin hnatlaknak in amah le a chaangtu hna kha ngunkhuai tampi pek awk le an tlaih mi hna kha thlahpiak awk; 8 Media, Lidia le a ramṭhen ṭhaṭha cheukhat hna kha India ram sinak in ngol awk; hi ram cu Eumenes siangpahrang kha a pek an chimh dih.  9Judas nih Rom miphun hna hrawh awkah Grikmi hna an i timh kha 10 Rom pawl nih an theih i anmah doh awkah ralbawi pakhat te lawng thlah in  a tuk tikah thahnawnnak tampi a chuahter, an nupile an fale hna cu sal ah a hruai hna; an chawva vialte an hrawh dih, an ram kha an kuttang ah a chiah, an ralhau kha a ṭhehpiak dih hna i annih cu nihin tiang sal ah an canter hna ning;  11 cun anmah kha a doh mi pennak le tikulh hna kha zei tin dah an hrawh i an kuttang ah an chiah dih hna ti zong kha a theih fawn.

 12Sihmanhsehlaw an hawikom le anmah aa hngatchan mi hna he pehtlai in an hawikomhnak ah fek tein an dir; lamhlat he lamnai he siangpahrang hna kha an tang ah an chiah hna, cun an min a thei mi vialte cu thinphang in an ther dih. 13Mi pakhat kha siangpahrang canter an timh ahcun an canter taktak i adang pakhat kha thlak an timh ahcun an thlak taktak ko; an thil tikhawhnak cu a sang hringhran ko. 14 Hi tluk a si ko nain aho hmanh nih amah tein bawiluchin aa chinh bal lo i aho hmanh nih amah rumra ngeihnak ca ah puansen kha aa aih bal lo. 15Khawngsil pakhat an ngei, ruahnak petu 320 an um i annih cu nifatin mi zapi ca ah zei dah a ṭha bik ti kha zalonnak he an i ruah i an i ceih. 16An ram uknak kha mi pakhat cung ah kumkhat le caankhat ca in an chuan i amah cu an pennak pumpaluk cung nawlngeihnak tling a ngei, cun mi vialte nih hi pa cu nahchuahnak le hngarnak um lo in a nawl an ngaih ti zong kha a theih.

Jew le Rommi hna karlak i hawikomhnak

17 Akos chungkhar, Johan fapa Eupolemas le Eleazar fapa Jeson kha a thim hna i Rom ah a thlah hna, 18 cucu Grik uknak nih Israel cu sal cannak ah a ṭhumh cang ti kha an hmuh cang caah an uknak khingrit in luat ding ruahchannak he a thlah mi an si. 19 Palai hna cu saupi an kal hnu ah Rom an phan i hlutdaw ah cun an chuak i annih kha, 20 "Judas Makabi le a unau hna nih Judah mipi hna le nanmah he hawikomhnak minsen thut in daihnak ser awkah le kanmah cu nanmah he hawi le ṭangṭi cazin ah khumh ve awkah an kan thlah,” tiah an ti.

21An biatung cu hlutdaw chungtel pawl nih an cohlan. 22 Hika ah hin daihnak le hawikomhnak ca minsen an thut i dar calung ah an ṭial mi i chiah awkah Jerusalem ah an kuat mi:

       23 "Rommi hna le Jewmi hna cung ah, rili cung le tlangcung ah siseh thluachuah vanni um ko seh; vainam le ral in luat hram seh!

24 Rom asilole a pennak chung i a ṭangṭi ram pakhatkhat ral nih a hung chim ahcun 25Jew miphun cu a ṭangṭi ram a si bang in, a herh ning in, a cawl lai, cun lungthin tak in a tuah lai. 26 Ral kha zei rawl, hriamnam, phaisa le tilawng hmanh a pe i a bawm lai lo:  Rom nih bia a chah cang bang in, an ṭuanvo cu man pek lo in an ṭuan hrimhrim lai. 27 Cu bang in, Jew miphun hna sin ah ral a rat hmasa a si ahcun, Rom miphun nih a herh ning in thazang dihlak he a bawmh ve lai, 28 dotu kha rawl, hriamnam, phaisa le tirawl tlawmte hmanh a bawm lai lo, cucu Rom biachahnak a si bang in, rawiphiarnak um lo in an ṭuanvo cu an ṭuan ve lai. 29Cu bantuk cu Rom miphun le Jew miphun hna karlak an hnatlaknak a si. 30 Cun hnu ah ram khatkhat nih betchap le zuhbang a duh ahcun a duh in a tuah khawh i cu bantuk betchih le zuhbang mi zong cu zulh a si lai.

       31 Siangpahrang Dimetrius nih an cung ah ṭhat lonak a tuah mi he pehtlai in an sin ah hiti hin ca kan kuat cang hna: zei cah dah kan hawi le kan ṭanṭi Jew miphun hna cung ah thilrit nan khin? 32Bawmhnak an kan hal ṭhan ahcun an covo cu kan pek hna lai i rili cung le tlangcung in kan in tuk hna lai,’ ti hi a si.