Fimnak 13

Ser mi thil kha Pathian ah sernak

13 1A si, Pathian a um a hngal lo mi hna cu zei tluk mihrut dah an si, cun hmuh mi thil ṭha in a-nung-Amah kha an hmu kho lo, asiloah tuahser mi thil zoh in a Tuahtu kha an hmu kho lo. 2Annih nih mei, thli, a rang mi thli, van arfi rual hna, ṭihnung tilian le van meiceu hna kha vawlei a uktu hna pathian hna ah an relh.

3An i dawhnak nih a lung a lak hna ahcun annih kha pathian ah an i lak a si ahcun hi hna bawi cu anmah nakin zei tluk dah aa dawh deuh lai ti hngal hna seh, zei tin tiah dawhnak hrampi hrimhrim nih annih kha a ser hna. 4Cun an huham le an ṭhawnnak nih an khuaruah a harter hna ahcun anmah a sersiamtu cu anmah nakin zei tluk dah a lianhngan deuh lai ti cu hngalh thiam hna seh, 5zei tin tiah ser mi hna an i dawhnak le tleunak in zohchunh in anmah a Sertu cu khuaruahhar in kan zoh khawh nakhnga a si.

 6Sihmanhsehlaw amah an kawl i hmuh an duh tuknak ah lam a pial i an tlau a si ahcun an cung ah mawhchiatnak tlawmte lawng a um; a ruang cu a tuahser mi he aa lawh caah an ngiatthlainak ah aa dawhnak tamtuk an hmuh caah lenglei a langhnak ah an tlau. 8Zei tin a si zong ah mawhchiatnak in an luat hlei lo: 9cucu vawlei kha hlathlai i hngalhnak ngeihnak ding caah a herh mi thluak an ngeih ah cun ti bia, anmah a Sertu hmuh awkah zei tin dah cu tluk in an khul a nuarh?   

Siasal biaknak

10Sihmanhsehlaw a thi mi thil hna cung ah an ruahchannak chia in minung ser mi thil hna, sui le ngun, asiloah, dawh ngai in ser mi hna, saram milem hna, asilole hlanpi ah mizeimaw kut nih a rak ser mi santlai lo lungpi hna, pathian min a rak pe mi hna cu zaangfah awk ngai an si.  

11Zungthiam pa hi vun zoh hnik u: a duh mi thingkung cu a thluk, a hawng cu dawh tein a hawh dih, cun khuaruahhar a zungthiamnak in cu thing cu nifatin hman awk thilri ah a ser. 12 Cun a tang mi thingnge hna cu a khawmh, rawlchuannak ah a hman i khim tein a ei. 13Cu hnu ah zei hmanh hman awk ṭha lo, a ngerhnguai mi hna cu a khawmh hna i aa manh caan ah umhar pheng in a pehtonh hna, cun a hmuhtonnak tampi he minung muisam a chuahter, asiloah 14zeimaw saram santlai lo lem ah a chuahter, asiloah, leisen a thuh, a hmai cu a senter; a rem lonak vialte kha a khuh dih. 15Amah he aa rem mi inn a sakpiak, vanpang ah a benh i thir in a khenhchih. 16 Amah tein a dir a tho kho lo ti kha ṭha tein a hngalh caah a tluk sual nakhnga lo fek tein a khenhchih, zei tin tiah milem menmen a si i dirhthoh a hau. 17Cun a chawva ca ah nupi ṭhitnak ca ah le a fale hna ca ah thlacam a duh tikah hi nunnak ngei lo thil sin ah i mer cu a hmai a sen lo -ngandamnak ca ah a derthawm mi sin ah a au,18 nunnak ca ah a thi mi kha a nawl; bawmhnak ca ah hmuhtonnak zei hmanh a ngei lo mi sin ah a nawl; khualtlawnnak ca ah a ke hmanh a hmang thiam lo mi sin ah a au, 19 a miak ca ah, a rianṭuannak ca ah, cun a zungthiam rian hlawhtlinnak ca ah zei zuingthiamnak hmanh a ngei lo mi sin ah kutzung thiamnak a hal.